काठमाडौं- नेकपा एमाले सभामुख अग्निप्रसाद सापकोटाले बोलाएको सर्वदलीय बैठकमा सहभागी नहुने भएको छ।
एमाले कार्यालय सचिवसमेत रहेका केन्द्रीय सदस्य शेरबहादुर तामाङले सभामुखले बोलाएको भनिएको सर्वदलीय बैठकमा पार्टीको सहभागिता नहुने जानकारी दिए। ‘सत्तापक्ष र प्रतिपक्षबीचको बैठक छलफल भएमा हामी भाग लिन्छौं,’ उनले भने, ‘तर, सभामुखले बोलाएको सर्वदलीय भनिएको बैठकमा सहभागिता हुँदैन।’
एमाले कारबाही गरेका सांसदहरुले सनाखत गरेर गठन भएको दललेसमेत भाग लिने बैठकमा आफूहरुको सहभागिता नरहने एमालेले प्रष्ट पारेको हो।
‘त्यो दल गठन भएको भन्ने विषयको छिनोफानो नभएसम्म हामी स्वीकार्दैनौं। सभामुखकोसमेत गैर संवैधानिक संलग्नता देखिएकाले त्यो ठाउँमा भाग लिदैंनौं,’उनले भने,‘जुन दल गठन भएको भनिएको छ त्यसलाई हामीले मानेका छैनौं।’ उनले कारबाही गर्ने कानुनी अधिकार पार्टीको भएको भन्दै सभामुखले त्यसलाई गलत रुपमा प्रस्तुत गरेको बताए।
प्रमुख प्रतिपक्षी दल नेकपा एमालेले लगातार संसद बैठक अवरुद्ध पारेपछि आइतबार सभामुखले संसदमा प्रतिनिधित्व गर्ने दलहरुसँग छलफल गर्ने निर्णय गरेका थिए। आज दिउँसो साढे २ बजे सभामुखले सर्वदलीय बैठक बोलाएका हुन्।
एमालेले एकीकृत समाजवादी गठन हुनु पहिले नै कारबाही गरिएको १४ जना सांसदको सूचना सभामुख सापकोटाले जारी नगरेको र नयाँ पार्टी गठनका लागि सनाखतमा सहभागी भएकाले उनीहरुको पार्टी वैधानिक नभएको भन्दै संसद बैठक अवरुद्ध गर्दै आएको छ।
सभामुखको सचिवालयका अनुसार बैठकका लागि प्रधानमन्त्री एवं कांग्रेस संसदीय दलका नेता शेरबहादुर देउवा, विपक्षी दलका नेता एमाले अध्यक्ष केपी शर्मा ओली, माओवादी केन्द्रका संसदीय दलका नेता एवं अध्यक्ष पुष्पकमल दाहाल प्रचण्ड, नेकपा एसका संसदीय दलका नेता एवं अध्यक्ष माधव कुमार नेपाल, जसपा संसदीय दलका नेता एवं अध्यक्ष उपेन्द्र यादव, लोसपाका नेता महन्थ ठाकुर, जनमोर्चाकी उपाध्यक्ष दुर्गा पौडेल, नेमकिपाका प्रेम सुवाल र राप्रपाका राजेन्द्र लिंदेनलाई आमन्त्रण गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
