कास्कीको मादीमा केबलकार सम्भव रहेको विज्ञको प्रतिवेदन, साढे एक अर्ब लाग्ने

ब्लग

नेपाल लाइभ शनिबार, जेठ २६, २०७५ १२:०४

पोखरा– कास्कीको मादी गाउँपालिकाले सिक्लेसबाट हिमालफेदीसम्म केबलकार सञ्चालन गर्न ल्याएको योजना कार्यान्वयन गर्न सम्भव रहेको प्राविधिकले जनाएका छन्।

गाउँपालिकाले उक्त योजनाको सभ्वानाबारे अध्ययन गर्न क्युबिक इञ्जिनियरिङ कन्सल्टेन्सीलाई जिम्मा दिएको थियो। कन्सल्टेन्सीले ३ महिना लगाएर प्रारम्भिक अध्ययन गरी गाउँपालिकालाई बुझाएको प्रतिवेदन शनिबार पोखरामा सार्वजनिक गरियो।

सिक्लेसको भुलुचुदेखि हिमालफेदीको कोरी भन्ने ठाउँसम्म केबलकार सञ्चालन गर्न सम्भव देखिएको इञ्जिनियरिङ कन्सल्टेन्सीका निर्देशक इञ्जिनियर दण्डराज पौडेलले बताए।

उनले भने, ‘एउटा केबलकारमा ६ जना बस्न मिल्ने सुझावसहितको प्रतिवेदन तयार पारेका छौं।’

केबुलकार सञ्चालन गर्न १ अर्ब ५० करोड लाग्ने प्रारम्भिक प्रतिवेदनले देखाएको छ।प्रतिवेदन अनुसार केबलकार सञ्चालन भएपछि वार्षिक ३६ करोड आम्दानी हुनेछ भने १० करोड खर्च हुनेछ।

‘यसरी हेर्दा साढे ५ वर्षमै लगानी फिर्ता गर्न सकिन्छ’, इञ्जिनियर पौडेलले भने।

१ दिनमा १२ सय जना यात्रुले केबलकारबाट आवतजावत गर्ने अनुमान गरी कन्सल्टेन्सीले प्रतिवेदन तयार पारेको इञ्जिनियर पौडेलले बताए।

उनले भने, ‘१ घन्टामा ३ सय जनाले केबलकारको यात्रा गर्न सक्नेछन्।’

साढे ६ किलोमिटर दूरीमा बन्ने उक्त केबलकारका लागि ५ प्रकारका २१ वटा केबल टावर राख्न सकिने कन्सल्टेन्सीका निर्देशक पौडेलले बताए। भौगोलिक कारणले केबलकार माथि उक्लिँदाभन्दा तल आउँदा धेरै समय लाग्ने उनले जानकारी दिए।

‘जाँदा १५ मिनेट लाग्ने देखिन्छ भने आउँदा २० मिनेटसम्म लाग्नसक्छ’, उनले भने।

सम्भाव्यता अध्ययनका लागि कन्सल्टेन्सीका तर्फबाट ५ जना विज्ञ र ४ जना सहायकले अध्ययन गरेका थिए। ‘वातावरण, भूगोल, सिभिल इञ्जिनियर लगायतको विज्ञ टोलीले केबलकार निर्माण गर्ने भनिएको ठाउँको स्थलगत अध्ययन गरेको इञ्जिनियर पौडेलले जनाए।

यो प्रारम्भिक अध्ययन मात्रै भएकाले विदेशी विज्ञ टोली ल्याएर अध्ययन गर्नुपर्ने खाँचो पौडेलले औंल्याए। ‘विदेशी विज्ञले तयार पारेको प्रतिवेदनसँग हाम्रो प्रतिवेदन भिडाएर मात्र थप तथ्य निकाल्न सकिन्छ’, उनले भने, ‘अहिलेसम्म नेपालका कुनै पनि केबलकारको सम्भाव्यता अध्ययन गरेको छैन।’

मादी गाउँपालिकाका अध्यक्ष वेदबहादुर गुरुङले केबलकार सञ्चालन सकारात्मक भए प्रदेश तथा पोखरा महानगरपालिकासँग सहकार्य गर्ने बताए।

‘निजी क्षेत्रसँग पिपिए मोडलमा पनि काम गर्न सकिन्छ’, उनले भने।

मादीमा केबलकार सञ्चालन गर्न चिनियाँ कम्पनी पनि सकारात्मक भएको गुरुङले जानकारी दिए। उनका अनुसार चिनियाँ टोलीले पनि अहिले सोही केबलकारका लागि छुट्टै अध्ययन गरिरहेको छ।

कार्यक्रममा प्रदेश सांसद मनबहादुर गुरुङले केबलकार सञ्चालनपछि मादी गाउँका बासिन्दा सुखी र समृद्ध हुने अपेक्षा व्यक्त गरे।

प्रदेश ४ का आर्थिक मामिला तथा योजनामन्त्री किरण गुरुङले मादी गाउँपालिकामा केबलकार सञ्चालन भए प्रदेशमा पनि पर्यटक बढ्ने बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सम्पदालाई न्यायोचित रुपमा प्रयोग गर्नुपर्छ : उपप्रधानमन्त्री सिंह

आचरसंहिता उल्लङ्घन गर्ने अनलाइन कालोसूचीमा

फ्रान्सले युक्रेन बिना नै युद्धबारे छलफलका गर्न चाहेको रूसी दावी