काठमाडौं- नेपाल धितोपत्र बोर्डले बोर्डका अध्यक्ष भीष्मराज ढुंगानाले छोरीमार्फत् गरेको सर्वोत्तम सिमेन्टको सेयर कारोबारको बचाऊ गरेको छ।
आइतबार प्रतिनिधिसभा अन्तर्गतको अर्थ समितिको बैठकमा बोल्दै बोर्डका उपकार्यकारी निर्देशक डा. नवराज अधिकारीले विवाहित छोरीले गरेको सो सेयर कारोबारमा अध्यक्ष ढुंगानाको संलग्नता हुने कुनै पनि कानुनी प्रावधान नरहेको स्पष्टीकरण दिएका हुन्।
बैठकमा समितिका सदस्यहरुले परिवारका सदस्यहरुलाई सेयर कारोबारमा संलग्न गराएर सेयर बजार कब्जा गर्न खोजेको भन्दै अध्यक्ष ढुंगानाप्रति आक्रोश व्यक्त गरेका थिए। बोर्डको तर्फबाट त्यसको जवाफ दिने क्रममा उपकार्यकारी निर्देशक अधिकारीले विवाहित छोरी परिवारमा भित्र पर्ने व्यवस्था धितोपत्रसम्बन्धी कुनै पनि ऐनमा व्यवस्था नभएकाले अध्यक्ष ढुंगानालाई सो विषयमा विवादमा तान्न नमिल्ने तर्क गरे।
‘धितोपत्रसम्बन्धी ऐनमा परिवार भन्नाले विवाहित छोरी नपर्ने स्पष्ट उल्लेख गरिएको छ। र, विवाहित छोरीले सेयर खरिद-बिक्री गर्ने निजी अधिकार भएकाले त्यसमा उनको बुबाको संलग्नता नहुने स्पष्ट देखिएको छ। हामीले अर्थ मन्त्रालयलाई पनि सोही प्रावधान खुलाएर स्पष्टीकरण दिएका छौं,’ उनले भने।
सर्वोत्तम सिमेन्टको सेयरमा धितोपत्र बोर्डका अध्यक्ष ढुंगानाले पदीय मर्यादा नाघेर कानुनविपरीत छोरीको नाममा १० हजार कित्ता सेयर खरिद गरेको आरोप लागेको थियो। सर्वोत्तम सिमेन्टलाई बुक बिल्डिङ प्रणालीमा आईपीओ जारी गर्न अनुमति दिनुभन्दा करिब तीन साताअघि अध्यक्ष ढुंगानाकी छोरीले उक्त सेयर किनेको देखिएपछि ढुगाना विवादमा तानिएका थिए।
सोही विषयमा अर्थ समितिले बोर्डका पदाधिकारीलाई बोलाएर स्पष्टीकरण लिएको हो। बैठकमा बोल्दै समितिका सभापति कृष्णप्रसाद दाहालले परिवारका सदस्यहरुलाई पुँजी बजारमा ल्याउने काम नियमनकारी निकाय आफैंले गरेको भन्दै आपत्ति जनाएका थिए। उनले अन्य क्षेत्रमा लगानी नगरेर परिवारकै सदस्य भएको क्षेत्रमा लगानी बढाउनुको कारण के हो? भनी बोर्डका सदस्यहरुलाई प्रश्न गरेका थिए।
यता, बोर्ड अध्यक्ष ढुंगानाले भने विवादित छोरीको सेयर कारोबारलाई बन्देज लगाउन मिल्ने कानुनी प्रबन्ध नभएको जवाफ दिए। उनले विवाहित छोरी परिवारका सदस्य नरहने धितोपत्रसम्बन्धी ऐनमा स्पष्ट व्यवस्था भएकाले छोरीको सेयर कारोबारमा आफूलाई मुछ्न नमिल्ने जिकिर गरे।
समितिका सदस्यहरुले परिवारलाई सेयर बाँडफाँट गरेर गलत काम नगर्न बोर्डका पदाधिकारीहरुलाई सचेत गराएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
