काठमाडौं– नेपाल प्रहरीको केन्द्रीय अनुसन्धान ब्यूरो (सीआईबी)ले प्राथमिकतासाथ अनुसन्धान गरेको एउटा केसका अभियुक्तलाई शनिबार मात्रै पोर्चुगलबाट अन्तर्राष्ट्रिय प्रहरी संगठन (इन्टरपोल)को सहयोगमा काठमाडौं ल्याइएको छ।
काभ्रेपलाञ्चोक भुम्लु गाउँपालिका–१ का केदार ढुंगानालाई इन्टरपोलको सहयोगमा शनिबार पोर्चुगलबाट काठमाडौं ल्याइएको हो। ठगीका ‘राजा’ ढुंगानाको अपराध यात्रा भने बिचौलियाबाट सुरु भएर बैंक नै ठगी गर्ने गिरोहसम्मको रहेको छ।
ढुंगाना पहिले यातायात व्यवस्था कार्यालय एकान्तकुनामा लेखापढीको काम गर्थे। उनले त्यसबेला सेवाग्राहीलाई प्रभावमा पारेर छिटोछरितो काम गर्ने भन्दै रकम लिएर काम गराइदिन्थे। खासमा उनी यातायात कार्यालय अघि बिचौलियाको काम गर्थे। गाडी पासदेखि नामसारीसम्ममा उनले काम गरेका थिए। सीआईबीका अनुसार उनले गाडीकै रिकन्डिशन सोरुम समेत सञ्चालन गरेका थिए।
बिचौलियाबाट केही कमाई गर्न थालेपछि रिकन्डिसन सोरुम सञ्चालन गरेका उनी गाडीको नक्कली कागजात बनाउनेसम्मका काम गर्न थालेका थिए। यसरी गाडीकै नक्कली कागजात बनाउन थालेका उनले तीनै नक्कली कागजाताको आधारमा सवारी कर्जा निकालेर बैंक ठगी गर्ने योजना बनाएर ठगीको धन्दा सुरु गरेको सीआईबीका डीआईजी धिरजप्रताप सिंह बताउँछन्।
त्यसपछि उनले आफू र नारायणबहादुर श्रेष्ठसहित १२ जनाको समूह बनाएका थिए। यो समूहले गाडीका सबै कागजात नक्कली बनाउने र त्यही कागजात पेश गरेर बैंकबाट सवारी कर्जा निकाली ठगी गर्ने योजना बनाएका थिए। सोही अनुसार उनीहरुले धन्दा सुरु गरे।
उनले नारायणबहादुरलाई रोज्नुको पछाडी उनका दुई वटा कन्टेनर समेत रहेको र उनैलाई विश्वासमा पारी बैंकबाट कर्जा निकाल्ने दाउमा थिए। पहिलो चरणमा उनीहरुले देव विकास बैंकबाट बा ११ च १३४६ नम्बरको कारको नक्कली कागजात बनाएर ऋण लिए। यातायात व्यवस्था कार्यालय एकान्तकुमानामा नक्कली कागजात पेश गरी उक्त कार देव विकास बैंकको नाममा नामसारी गरी उनीहरुले २०७१ सालमा १५ लाख ऋण लिन सफल भए। यसरी लिएको ऋण ढुंगानासँगै नारायण र कृष्णबहादुर खत्रीले बाँडफाँड गरेका थिए।
त्यसपछि यही शैली अपनाएर एकैपटक विभिन्न नम्बरका ६ वटा गाडी बैंकको नाममा नामसारी गरेर उनीहरुले ऋण लिएको अनुसन्धानमा खुलेको थियो। यसरी नक्कली कागजात बनाएर ढुंगानासिहत १२ जनाको यो गिरोहले बैंकबाट पटक पटक गरी २ करोड ७१ लाख ७६ हजार रुपैयाँ कर्जा लिएर ठगी गरेका थिए।
सवारी कर्जा बापतको मासिक किस्ता हाल्दै गरेको ढुंगानाको यो गिरोहले २०७४ सालपछि भने किस्ता हाल्नै छाड्यो। बैंकले पटक पटक ताकेता गर्दा समेत उनीहरुले किस्ता हाल्न छाडेका थिए। त्यसपछि आफ्नो नाममा रहेका भनिएका गाडी बैंकले लिलामीका लागि प्रक्रिया अघि बढाउँदा बैंक नै झस्किएको थियो।
ती गाडी बैंकको नाममा नभएको यातायात कार्यालयले जानकारी दिएपछि ढुंगाना गिरोहको ठगी धन्दा पर्दाफास भएको थियो। बैंक नै ठगिएको थाहा भएपछि बैंकले उनीहरुविरुद्ध सीआईबीमा २०७५ मंसिर २१ गते उजुरी दिएको थियो।
ठगी प्रकरणमा संलग्न भएको आरोपमा त्यसबेला नारायणबहादुर, बालकृष्ण श्रेष्ठ, चेतबहादुर, विकास श्रेष्ठ, नवीन श्रेष्ठ, कृष्णबहादुर खत्री, बैंकका भ्यालुएटर नरेशमान सिंह, ब्रान्च म्यानेजर सरिनशंकर श्रेष्ठ पक्राउ परेका थिए।
तर, ढुंगाना भने फरार हुँदै आएका थिए। ढुंगानाविरुद्ध सरकारी कागजात कीर्तेमा काठमाडौं र ललितपुर जिल्ला अदालतमा गरी १५ वटा मुद्दा दर्ता भएका थिए। १० वटा मुद्दामा ढुंगानालाई प्रत्येक मुद्दाको १ वर्षका दरले १० वर्ष र प्रत्येक मुद्दामा ७० हजार रुपैयाँका दरले जरिवानाको फैसला भएको छ। बाँकी पाँच वटा मुद्दाको भने सुनुवाइ हुनै बाँकी छ। यसैगरी, ढुंगानाविरुद्ध बैंकिङ कसूरका १६ मुद्दा परेका छन्। बैंकिङ कसूर सम्बन्धी १६ वटा मुद्दा पनि विचाराधीन छन्।
फरार रहेका ढुंगानालाई पक्राउ गर्न २०७५ पुस ४ गते पक्राउ पूर्जी जारी भएको थियो। तर, त्यसबेला ढुंगाना भने नेपाल नै छाडेर भागिसकेका थिए। त्यसबेला उनी दुबई पुगेको सूचना सीआईबीले पाएको थियो।
त्यसपछि भने २०७५ पुस १७ इन्टरपोलमार्फत् डिफ्युज नोटिस जारी गरेर ढुंगानाको खोजी सुरु गरिएको थियो। गत वैशाख ३१ गते उनीविरुद्ध रेड नोटिस जारी भएको थियो।
त्यतिबेला उनी पोर्चुगल पुगिसकेका थिए। पोर्चुगलमा रेसिडेन्स परमिटका लागि आवेदन दिएको जानकारी पाएपछि उनलाई इन्टरपोलको सहयोगमा पोर्चुगल प्रहरीले पक्राउ गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787645626.png)
-1787643624.jpg)
-1786602170.png)
-1786513116.png)
