पोखरा– मादी गाउँपालिकाका अधिकांश वडाका आफ्नै कार्यालय भवन छैनन्। वडा कार्यालय कुनै आमा समूहका भवनमा छन् त कुनै व्यक्तिको घर भाडामा लिएर सञ्चालन भइरहेका छन्।
उचित ठाउँको अभावले कार्यालय भवन बन्न नसकेको गाउँपालिकाका अध्यक्ष वेदबहादुर गुरुङले बताए।
‘धेरै भवन उचित ठाउँ नपाएकाले पनि बन्न सकेका छैनन्, अहिले भाडाका भवनमै काम चलाइरहेका छौं’, उनले भने। धेरैजसो कार्यालयविहीन वडा भवनका लागि जग्गा खोजी भइरहेको उनको भनाइ छ।
गाउँपालिकामा १२ वडा छन्। त्यसमध्ये ४ वटा वडाले साविक गाविस भवनलाई वडा कार्यालय बनाएर काम गरिरहेका छन्।
‘वडा नम्बर १, २, ९ र १० ले साविक गाविस भवनबाट काम गरिरहेका छन्’, अध्यक्ष गुरुङले भने, ‘९ नम्बर वडा साविक वडा भवनमा भए पनि त्यो अपायक ठाउँमा भएकाले सर्नुपर्नेछ।’
वडा नम्बर ३ ले अहिले परियार आमा समूहको भवनमा कार्यालय खडा गरेको छ। आमा समूहसँग वडाले १० वर्षका लागि भाडा लिएको वडा अध्यक्ष मनबहादुर गुरुङले बताए।
‘पहिले १ वर्षका लागि भाडामा लिएका थियौं, अहिले थपेर १० वर्षका लागि लिएका छौं’, उनले भने।
१२ नम्बर वडाको कार्यालय गाउँकै विद्यालय भवनमा छ।
‘हिमालय आधारभूत विद्यालयको एउटा कोठा खाली रहेछ, अहिले त्यसैमा काम गरिहरेका छौं’, वडाध्यक्ष चित्रबहादुर गुरुङले भने। कार्यालय बस्ने समयको सम्झौता नभएको तर भवन निर्माणका लागि जग्गा खोजी भइरहेको उनले बताए।
८ नम्बर वडा अन्नपूर्ण क्षेत्र संरक्षण आयोजना (एक्याप)को भवनमा छ। वडा नम्बर ६ पुरानो हुलाक कार्यालयको भवनमा रहेको वडाध्यक्ष पसबहादुर बास्तोलाले जानकारी दिए। उनले भने, ‘कार्यालयको आफ्नै भवन छैन, साविक हुलाक कार्यालयलाई नै वडा कार्यालय बनाएर काम गर्दै छौं।’
कार्यालय भवन निर्माण गर्न जग्गा नकिन्ने र दान पाएको ठाउँमा गाउँपालिकाले निर्णय गरेको गाउँपालिका अध्यक्ष गुरुङले बताए।
‘वडावासीबाट दान पाएको जग्गामा नै भवन बनाउने भनेका छौं’, उनले सुनाए।
वडा नम्बर ५, ७, ८ र ९ ले अहिले कार्यालय भवन बनाउन जग्गा खोजिरहेका छन्। गाउँलेले जग्गा दिन राजी भइसकेकाले चाँडै त्यसको टुंगो लाग्ने गाउँपालिकाका अध्यक्ष गुरुङले बताए।
गुरुङका अनुसार वडा भवन निर्माण गर्न गाउँपालिकाले प्रतिवडा कार्यालय १५ लाखका दरले दिने गरेको छ। जुन रकम घडेरी सम्याउन र मिलाउनका लागि मात्रै हो। ४ र ६ नम्बर वडाका लागि जग्गा प्राप्त भइसकेकाले चाँडै भवन बन्ने तयारीमा रहेको उनले बताए। वडा नम्बर ४ का लागि तारकाङका स्थानीयले २० रोपनी जग्गा दान गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
