काठमाडाैं- कृषि तथा पशुपक्षी विकास मन्त्रालयले यस वर्षको मनसुनजन्य विपद्बाट क्षति बेहोरेका किसानहरुलाई आगामी आर्थिक वर्षमा क्षतिपूर्ति दिनेगरी लगत संकलन गरिरहेको बताएको छ।
मन्त्रालयका सचिव योगेन्द्रकुमार कार्कीले शुक्रबार कुरा गर्दै यस वर्षको मनसुनका कारण आएको बाढी तथा पहिरोका कारण कृषकहरुलाई परेको क्षतिको सम्बन्धमा मन्त्रालयले लगत संकलन गरिरहेको बताए। मन्त्रालयले कृषि विभाग, पशु सेवा विभागलगायत प्रदेश सरकारमार्फत् के-कति क्षति भएको छ त्यसको तथ्यांक संकलन गरिरहेको उनले जानकारी दिए।
एकहप्ताभित्र लगत संकलन भइसक्ने र असार २० गतेसम्मको प्रारम्भिक रिपोर्ट तयार पारेपछि किसानहरुलाई आगामी आर्थिक वर्षमा क्षतिपूर्तिमार्फत् सम्बोधन गरिने उनले बताए। उनले भने, 'एक हप्ताभित्र डेटा सबै ठाउँबाट संकलन हुन्छ। यो असारको २० गतेसम्मको प्रारम्भिक रिपोर्ट तयार गर्न लागिरहेका छौँ। रिपोर्ट आइसकेपछि किसानलाई अर्को वर्षको कार्यक्रममा कसरी सम्बोधन गर्न सकिन्छ? खासगरी बीउ, मल, प्रविधिलाई कसरी सम्बोधन गर्ने भन्ने विषयमा हामी छलफललाई व्यापकता बनाइरहेका छौँ।'
संघीय सरकारको दायित्व मुख्य रुपमा प्रदेश र स्थानीय सरकारसँग समन्वय गर्ने भएको उनले बताए। क्षतिबाट मुक्त हुन र अब बढी क्षति नहोस् भन्ने सतर्कताका लागि म्यासेजहरु एफएममार्फत्, एप्सहरुमार्फत् दिइरहेको पनि उनले जानकारी दिए। 'आगामी आर्थिक वर्षको कार्यक्रममा हामीले केही पैसाहरु क्षतिपूर्तिमा दिने गरी केही बजेटको व्यवस्था पनि पहिलोपटक गरेका छौँ, संघीय मन्त्रालयको बजेटमा। भौगोलिक बनोटको आधारमा, बालिको आधारमा, नोक्सानीको आधारमा जिल्लास्थित प्रमुख जिल्ला अधिकारीको संयोजकत्वमा भएको समितिको सिफारिसको आधारमा यसलाई अगाडि बढाउँछौँ,' सचिव कार्कीले भने।
उनले यस वर्ष औसतरुपमा धान रोप्न ढिलाइ भइरहेको बताए। हालसम्म ५६ प्रतिशत धान रोपाइँ भएको उनले जानकारी दिए। यस वर्ष १५ लाख हेक्टरमा ६० लाख मेट्रिक टन धान फलाउने लक्ष्य लिइएको उनले बताए। निरन्तर भेलबाढी आइरहेमा सरकारको लक्ष्य प्राप्तिमा समस्या पैदा हुने उनको भनाइ छ। बाढीपहिरोबाट किसानलाई क्षति हुन नदिनका लागि मन्त्रालयको ध्यान केन्द्रित रहेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
