नेकपा एमालेका स्थायी कमिटी सदस्य बेदुराम भुसालले राष्ट्रिय सभामा स्वतन्त्र सांसदका रुपमा मान्यता दिन निवेदन दिएका छन्। तत्कालीन नेकपाको उम्मेदवारका रुपमा राष्ट्रिय सभा सदस्यमा निर्वाचित भएका उनले कुनैपनि दल रोज्न मन नलागेको बताउँदै आइतबार निवेदन दिएका हुन्।
सर्वोच्च अदालतले २०७७ फागुन २३ गते आफू निर्वाचित पार्टी नेकपाको अस्तित्व समाप्त गरेपछि नै स्वतन्त्र सांसद भुसालको भनाइ छ। नेकपा एमालेमा माधव नेपाल समूहमा रहेका भुसालसँग नेपाल लाइभले गरेको संक्षिप्त कुराकानी:
तपाईंले स्वतन्त्र सांसदको हैसियतमा राखिदिन संसद सचिवालयमा निवदेन दिनुको कारण के हो?
नेकपा नरहेपछि अर्को दलमा जानुपर्यो। जान मन लागेन। म स्वतन्त्र नै रहेँ भन्ने रुपमा बुझ्ने हो।
एमाले त्यागेको रुपमा पो बुझ्ने कि?
नेकपाबाट निर्वाचित व्यक्ति नेकपा नै रहेको हुँ।
नेकपा नै अस्तित्वमा नभएपछि तपाईं कसरी नेकपा?
नेकपा नरहेपछि स्वत: दलिवहीन भएँ र स्वतन्त्र सांसद रहें।
अहिलेसम्म एमाले हुनुहुन्थ्यो नि त?
म एमाले भनेर गरिएका कुनैपनि भेलामा, संसदीय दलको बैठकमा र अन्य कुनै कार्यक्रममा गएको छैन।
पार्टीमा अन्तरसंघर्ष चुलिएकै बेला स्वतन्त्र सांसदका लागि दिइएको निवेदनको अर्थ त अनेक लाग्ला नि?
राष्ट्रिय सभाको बैठक बोलाइएको छ। मैले कुनै दल रोजेको छैन। त्यही भएर स्वतन्त्र सांसदका रुपमा त्यहाँ रहन चाहेको हुँ। फागुन २३ पछि एमालेका अध्यक्ष केपी शर्मा ओलीले बोलाएको बैठकमा गएको छैन। म कि नेकपा नै छु कि नेकपा छैन भने कुनै दलको छैन।
तपाईंको पार्टीमा अन्तरसंघर्ष छ । त्यो मिल्यो भने एमालेतिर लाग्नुहुन्छ कि स्वतन्त्र नै रहने निर्णय यथावत रहन्छ?
स्वतन्त्रहरुले कुनै पनि बेला कुनै पनि दल रोज्न पाउने व्यवस्था छ, कानुनी रुपमा। कि जुन दलबाट निर्वाचित भयो त्यहीको सांसद हुनुपर्छ। तर, मेरो हकमा दल नै रहेन।
त्यसैले मलाई अहिले कुनै दल रोज्न मन लागेन। नेकपाकै हैसियतमा स्वतन्त्र रहन मन लागेको हो। त्यसैले सचिवालयमा निवेदन दिएको छु। पछि त कुनै पनि बेला जुनसुकै दल रोज्न पाउने व्यवस्था छ। त्यहीअनुसार गरिएला।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791196217.png)
-1791194094.png)
-1786602170.png)
-1791090469.jpeg)
