सांकेतिक तस्वीर
काठमाडौं- सर्लाहीको ईश्वरपुर नगरपालिका-३ का वडा अध्यक्ष सूर्यकुमार श्रेष्ठको हत्या भएको छ। शुक्रबार राति करिब ११ बजेतिर श्रेष्ठको हत्या भएको हो।
पोखरी खन्न प्रयोग गरिएको जेसीबी स्काभेटरको बकेटले हानेर उनको हत्या भएको जिल्ला प्रहरी कार्यालय सर्लाहीका प्रहरी निरीक्षक कृष्ण गिरीले बताए।
नगरपालिकाको बजेटमा निर्माणाधीन मुखलाल राजपोखरीमा पुगेर साँझ घर फर्कने क्रममा वडा अध्यक्ष श्रेष्ठको हत्या भएको हो। उक्त पोखरी निर्माणको ठेक्का इल्धन सहनीले लिएका थिए। इल्धनले पोखरी खन्नका लागि प्रेमराज दाहाललाई ठेक्का दिए। जेसीबी ठेकेदार दाहालले हरिपुर नगरपालिका-१ का रविन तामाङ भन्ने हर्कबहादुर तामाङलाई जेसीबीमार्फत पोखरी खन्न लगाएका थिए।
शुक्रबार साँझ पोखरी खन्न बन्द गरेर उनीहरु चारै जनाले सँगै बसेर मादक पदार्थ सेवन गरेका थिए। राति ११ बजेतिर घर फर्कने क्रममा उनीहरुबीच विवाद भएपछि अपरेटरले जेसीबीको बकेटले हानेर वडा अध्यक्ष श्रेष्ठको हत्या गरेको प्रहरी निरीक्षक गिरीले बताए।
पानी परेकाले बाटो चिप्लो भएपछि अपरेटर रविनले आफ्नो चप्पल वडा अध्यक्षलाई बोक्न लगाएका थिए। चप्पल बोक्न लगाएपछि आफूलाई हेपेको महसुस गरेका वडा अध्यक्ष र अपरेटरबीच विवाद सुरु भएको थियो। विवाद र गालीगलौज बढ्दै गएपछि आवेशमा अपरेटर रविनले वडा अध्यक्षको हत्या गरेको प्रारम्भिक अनुसन्धानमा खुलेको गिरीले बताए।
बकेटले हानेर वडा अध्क्षको हत्या गरेको भन्ने खबर आएपछि एसपीसहतिको टोली घटनास्थल पुगेको थियो। घाइते वडा अध्यक्ष श्रेष्ठलाई तत्काल जिल्ला अस्पताल मलंगवा पठाइएको भएपनि डाक्टरले मृत घोषणा गरेका थिए।
हत्याको आरोपमा ठेकेदार सहनीलाई शुक्रबारै प्रहरीले पक्राउ गरेको थियो भने जेसीबी अपरेटर रविनलाई शनिबार विहान पक्राउ गरिएको प्रहरी निरीक्षक गिरीले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768538433.png)
-1764146706.png)
-1768395492.png)
