जनकपुर– प्रदेश २ को सरकारले १०औं गणतन्त्र दिवसको अवसरमा प्रभातफेरी निकालेको छ। पहिलो संविधानसभाको पहिलो बैठकले २०६५ सालमा आजैका दिन नेपालबाट २ सय ४० वर्षे शाही राजतन्त्रको अन्त्य तथा संघीय लोकतान्त्रिक गणतन्त्रात्मक मुलुक घोषणा गरेको अवसरलाई स्मरण गर्दै प्रत्येक वर्ष जेठ १५ गते गणतन्त्र दिवस मनाउने गरिन्छ।
सोही अवसरमा प्रदेश सरकारले आज बिहान प्रभातफेरीको आयोजना गरेको हो। जानकी मन्दिरबाट सुरु भएको प्रभात फेरी रामानन्द चोक, पिराडी चोक हुँदै जनकपुर चुरोट कारखानास्थित कभर्ड हलमा पुगेर सभामा परिणत भएको थियो।
गणतन्त्र दिवस मुल समारोह समितिका संयोजक एवम् मुख्यमन्त्री लालबाबु राउतको अध्यक्षतामा आयोजित औपचारीक कार्यक्रममा प्रदेश सरकारका मन्त्रीहरु, प्रदेश सभाका सदस्यहरु, उच्च अदालत जनकपुरका न्यायधीश, प्रदेश सरकारका सचिवहरु, सुरक्षा निकायका प्रमुख तथा कर्मचारीहरुको सहभागिता थियो।
कार्यक्रमलाई सम्बोधन गर्दै मुख्यमन्त्री राउतले शहीदहरुको बलिदानीबाट प्राप्त गणतन्त्रलाई अझै सुदृढ गर्ने जिम्मेवारी सबैको काँधमा रहेको बताए। उनले गणतन्त्रका प्रथम अभियन्ता रामराजा प्रसाद सिंहलाई स्मरण गर्दै त्यसका लागि जीवन बलिदानी दिने शहीदहरुप्रति श्रद्धाञ्जली व्यक्त गरे। २००७ सालको क्रान्तिदेखी विभिन्न चरणको प्रजातान्त्रिक आन्दोलन, माओवादीको जनयुद्ध र मधेश विद्रोहको जगमा मुलुकले लोकतान्त्रिक गणतन्त्रको सुखानुभूति गरेको उनको भनाइ छ।
यसैगरी, प्रदेश २ अन्तर्गतका ८ वटै जिल्लामा गणतन्त्र दिवसको अवसर पारी विभिन्न कार्यक्रम सम्पन्न भएका छन्। सप्तरीमा प्रमुख जिल्ला अधिकारीको निवासबाट सुरु भएको प्रभातफेरी जिल्ला समन्वय समितिको सभा कक्षमा पुगी औपचारीक कार्यक्रममा परिणत भएको थियो।
गणतन्त्र दिवस जिल्ला सहारोह समितिका संयोजक तथा जिससका प्रमुख प्रभाकर यादवको अध्यक्षतामा आयोजित कार्यक्रममा सिडिओ सुरेन्द्र पौडेल, जिल्ला अदालत राजविराजका न्यायाधिस हरिशचन्द्र ढुङ्गाना, तथा सुरक्षा निकायका प्रमुखहरु र कार्यालय प्रमुखहरुको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
