काठमाडौं– डा बाबुराम भट्टराईले अहिले आफू ३० वर्षको भएको भए के गर्थें भन्ने योजना सुनाएका छन्। राजधानीमा सोमबार नयाँ शक्ति निकट युवा संगठनले पार्टी स्थापना दिवसको दिन गर्न लागेको भेलाबारे जानकारी दिन आयोजना गरेको पत्रकार सम्मेलनमा भट्टराईले ३० वर्षे उमेर भइदिएको भए गर्ने कामहरु सुनाएका हुन्।
भट्टराईले नेपालमा काँठे पुँजीवाद मौलाएको भन्दै त्यसलाई अन्त्य गर्ने बताए। 'नेपाल नाम गरेको जुन भूभाग छ त्यो विश्व पुँजीवादको एउटा किनाराको, एउटा काँठको पूँजीवाद बनेको छ', उनले भने, 'यहाँको पुँजीवादलाई काँठको पुँजीवाद (पेरिफेरियल क्यापिटलिजम) भन्न सकिन्छ। विश्व पुँजीवादको किनारामा नेपाल पनि पर्दै गएको छ।'
'अहिले जसरी क्रोनी क्यापिटलिजम चलिरहेको छ। कमिसनखोरबाट कमिसन लिने, आफ्ना आसेपासेलाई पोसेर राज्यसत्ताको दोहन गर्ने प्रवृत्ति बढेको छ। यो काँठे पुँजीवादको एउटा अभिव्यक्ति हो। त्यसैले म ३० वर्षको भएको भए, यो काँठे पुँजीवादलाई अन्त्य गरेर सबै जनतालाई सुखी र समृद्ध बनाउने बाटो के हुनसक्छ भन्ने नयाँ विचारको खोजी गर्थें', भट्टराईले भने।
भट्टराईले आफूले १२ घन्टासम्म लाइब्रेरीमा बसेर अध्ययन गरेको र पुराना जर्नलहरु खोजीखोजी पढेको सम्झँदै अहिले त्यस्तो अवस्था नरहेको बताए। अहिले स्मार्टफोनको सहयोगमा गुगलबाट तत्काल सबै जानकारी लिन सकिने बताए।
'जुन अध्ययन अनुसन्धान गर्थ्यौं अहिले स्मार्टफोनबाट गुगलमा खोजेर सबै थाहा पाउन सकिने भएकाले घरमै बसेर अनुसन्धान गर्थें', उनले भने, 'र, नेपाललाई अहिलेको युग सुहाउँदो नयाँ विचारको आविष्कार गर्थें।'
अहिले विकास र समृद्धिका कुरा थेगोजस्तो भएको भन्दै आलोचन गरे। 'म यो गर्दिन्छु, त्यो गरिदिन्छु भनिन्छ। भन्नु मात्रै कुनै ठूलो कुरा होइन। म अहिले चन्द्रमामा पुग्छु, मंगल ग्रहमा पुग्छु भन्न पनि सकिन्छ। सबै मान्छेलाई पखेँटा लगाएर ब्रह्माण्डमा चहार्ने बनाइदिन्छु पनि भन्न सकिन्छ', उनले भने, 'त्यसका निम्ति के-के स्रोत र साधन हुनसक्छन्। त्यसको व्यवस्था मैले कसरी गर्छु भन्नेचाहिँ मुख्य कुरा हो। तर हाम्रा नेताहरु अहिले पानी जहाज पनि ल्याइदिने, रेल पनि ल्याइदिने भनिरहनुभएको छ। प्रधानमन्त्रीले पनि कसरी ल्याउने भन्न सक्नुभएको छैन।'
'म ३० वर्षको भएको र सत्ताको नेतृत्व गर्ने अवसर प्राप्त गरेको भए अहिलेको नेपाललाई १० वर्षभित्र, २० वर्षभित्र यहाँ पुर्याउँथे भनेर ठोस खाका लिएर अगाडि लैजाने थिएँ', उनले भने।
उनले युवालाई देशभित्रै काम गर्ने वातावरण बनाउने पनि बताए। त्यसका लागि शिक्षा, स्वास्थ्य निःशुल्क बनाउनेदेखि प्राविधिक शिक्षालाई जोड दिन उपाय भट्टराईले सुझाए।
उनले महिलाको महिनाबारीदेखि दलितलाई हेर्ने पुरानो सोच अझै हाबी भएको भन्दै आलोचना गरे। आफू ३० वर्षको भए वैज्ञानिक चेत विकासका लागि अभियान नै सञ्चालन गर्ने थिएँ भन्ने सुनाए। डा भट्टराईले इन्द्रेणी राष्ट्रियताको विकासका लागि भूमिका खेल्ने बताए।
भट्टराईले केही काम गर्नका लागि शरीर स्वस्थ हुनुपर्ने बताए। आफू ३० वर्षको हुँदा स्वस्थ रहनका लागि धेरै विकल्प नभएको बताउँदै अहिलेका युवालाई व्यक्तिगत स्वास्थ्यमा पनि ध्यान दिन सुझाए।
भट्टराईले यौन तथा प्रेमको चाहना स्वाभाविक भएको बताउँदै अहिले अनावश्यक ढंगले यसबारे संकुचित धारणा बनाइएको बताए। यसले युवाको महत्त्वपूर्ण ऊर्जा यस्तै विषयमा कुण्ठित भएर बितेको बताए। 'म ३० वर्षको भए, यस्ता विषयमा खुला ढंगले कुरा गर्थें', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
