राजविराज– नेपालका लागि भारतीय राजदूत मञ्जीवसिंह पुरीले भारतीय सहयोगमा सप्तरीमा सञ्चालित अधुरा योजना यथाशीघ्र पूरा गरी हस्तान्तरण गर्न आग्रह गरेका छन्।
दूतावासकै बेवास्ताका कारण भारतीय लगानीमा सञ्चालित आधा दर्जनभन्दा बढी योजना वर्षौदेखि अलपत्र परेको भन्दै आलोचना भइरहेका बेला पुरीले यस्तो आग्रह गरेका हुन्।
हनुमाननगर जेलकाण्डको ७५औं स्मृति दिवसका अवसरमा जेपी लोहिया रामेश्वर मेमोरियल ट्रस्टले शनिबार राजविराजमा आयोजना गरेको कार्यक्रममा बोल्दै राजदूत पुरीले भने, ‘भारतीय दूतावास मार्फत सञ्चालनमा रहेका कतिपय विकासका योजना पूरा भएका छन् र कतिपय पूरा हुने क्रममा छन्। अधुरा रहेका योजना पूरा गरेर हस्तान्तरण गर्न आग्रह गर्छु।’
यसअघि प्रदेश २ का सांसद तथा राजपाका महासचिव मनिष सुमन र राजविराज नगरपालिकाका मेयर शम्भु यादवले भारतले नेपाको विकासमा पुर्याएको योगदानको चर्चा गर्दै सप्तरीमा रहेका अधुरा योजना पूरा गर्नेतर्फ पनि ध्यान दिन राजदूत पुरीको ध्यानाकर्षण गराएका थिए।
भारतीय दूतावासको लगानीमा तीन वर्षभित्र सम्पन्न गर्नेगरी ९ वर्षअघि शिलान्यास गरिएको सप्तरीको राजविराज नगरपालिका–१६, बोरियास्थित नरेन्द्र मेमोरियल माध्यमिक विद्यालयको भवन ९ कोठे भवन, सन् २००६ भित्रै सम्पन्न गर्नुपर्ने राजविराजस्थित मुलुककै पुरानो महेन्द्र विन्देश्वरी बहुमुखी क्याम्पसको कन्या छात्रावास, सन २०१० भित्र सम्पन्न गर्नुपर्ने सगरमाथा अञ्चल अस्पताल राजविराजको प्रसूति तथा आकस्मिक कक्ष भवन, २०६४ असारमै पूरा गरिसक्नुपर्ने जनता रामेश्वर मेमोरियल माध्यमिक विद्यालयको भवन तथा २०६४ असारभित्र सम्पन्न गर्नुपर्ने कुनौली–फत्तेपुर सडक लगायतका योजना अझै अधुरा छन्।
कार्यक्रममा बोल्दै राजदूत पुरीले भारतले आफ्नो ७०औं स्वतन्त्रता दिवस मनाइरहेका बेला यो अवसर ल्याउनमा नेपालको भूमिका अतुलनीय र अविस्मरणीय रहेको बताए।
‘हामी यतिबेला ७०औं स्वतन्त्रता दिवस मनाइरहेका छौं’, उनले भने, ‘भारतको स्वतन्त्रताका पछाडि नेपाली जनताको योगदानलाई स्वर्ण अक्षरले लेखिएको छ।’
प्रधानमन्त्री नरेन्द्र मोदीको हालै सम्पन्न नेपाल भ्रमणले दुवै मुलुकबीच विकासको मार्ग अझै फराकिलो बनेको बताउँदै उनले भौगोलिक, सांस्कृतिकसँगै आर्थिक उन्नतिमा एक–आपसको भागीदारीले सम्बन्धलाई अझै बलियो बनाउने तर्क गरे। उनले भने, ‘नेपालको प्रगति नै भारतको लागि पनि खुसीको विषय हो।’
राजदूत पुरीले जनकपुरमा केही महिनामै ब्रोडगेजको रेलमार्गमा भारतबाट रेल गुड्ने बताउँदै विराटनगरमा पनि रेल आएपछि दुई देशबीचको व्यापार अझै फस्टाउने दाबी गरे। व्यक्तिगत, सांस्कृतिकसँगै वाणिज्य सम्बन्धले दुई देशबीचको मित्रतालाई अझ दिगो बनाउने उनको कथन थियो।
कार्यक्रममा भारतीय स्वतन्त्रता संग्रामका क्रममा राणा सरकारले सप्तरीको हनुमाननगरमा बन्दी बनाई राखिएका भारतीय 8वादी नेता जयप्रकाश नारायण र डा राममनोहर लोहियालाई जेलमुक्त गराउन भूमिका खेलेका स्वर्गीय कृष्णवीर कामीका नाति अर्जुन विश्वकर्मा र मो. अब्दुल मियाँका नाति इव्राहिम मियाँलाई राजदूत पुरीले सम्मान गरे।
हनुमाननगर जेल तोडेर जयप्रकाश र राम मनोहरलाई मुक्त गराउन भूमिका खेलेको आरोपमा राणा सरकारले अब्दुल, कृष्णविर, रामेश्वरप्रसाद सिंह, तारिणीप्रसाद सिंह, जयमंगलप्रसाद सिंह, कमानन्द मिश्र, जमुनाप्रसाद सिंह, चतुरानन्द सिंह लगायतलाई पक्राउ गरी केन्द्रीय कारागारमा बन्दी बनाएको थियो। सोही कारागारमा कामी र तारिणीप्रसाद सिंहको मृत्यु भएको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
