डडेल्धुरा- डडेल्धुराको अमरगढी नगरपालिकाले सूचना प्रविधि केन्द्र (टेक्नो हब) को स्थापना गरेको छ। नगरपालिकाले शुक्रबार सूचना प्रविधि केन्द्रको शुभारम्भ गर्दै सूचना प्रविधि केन्द्र स्थापना गर्नेमा देशभरमै दोस्रो स्थानीय तह बनेको छ।
स्थानीय जनतालाई सुसूचित पार्ने र नगरका हरेक गतिविधिलाई सूचना प्रविधिसँग अपडेट गराउने उद्देश्यले सूचना प्रविधि केन्द्रको स्थापना गरिएको नगरपालिकाले जनाएको छ। सेसी नेपालको सहयोगमा स्थापना भएको सूचना प्रविधि केन्द्रको उदघाट्न गर्दै प्रदेश ७ का आन्तरिक मामिला तथा कानुन मन्त्री प्रकाश शाहले अमरगढी नगरपालिकाले यस्तो सुविधा पाउनु खुसीको कुरा भएको बताए।
उनले अब नगरपालिकाले कार्यालयबाटै सम्पूर्ण नगरबासीको समस्या बुझ्न सकिने बताए। ‘जनताको खुसियाली पूरा गर्ने युगको सुरुवात भएको छ,’ उनले भने, ‘अब मेयरले आफ्नै च्याम्बरमा बसेर जनताको समस्या बुझ्न सक्नेछन्।’
छिटो-छरितो काम गर्न र सुशासनका लागि स्थापना भएको सूचना प्रविधि केन्द्रले सबैलाई सघाउने नगरपालिकाले जनाएको छ। सूचना प्रविधि केन्द्रमार्फत नगरपालिकाभित्र भएका सबै नीतिगत निर्णय तथा कार्यक्रमबारे सजिलै जानकारी पाउन सकिने अमरगढी नगरपालिकाका प्रमुख विशेश्वरप्रसाद ओझा बताए।
‘अब अमरगढी वडा नम्बर ११ मा बस्ने जनताले त्यहाँ पहिरो गएमा उक्त स्थानबाटै फोटो पठाउन सक्नेछन्,’ उनले भने, ‘त्यसपछि यहाँका जनप्रतिनिधिले त्यसको समाधान गर्नेछन्।’ टेक्नो हबको स्थापनापछि अब योजना डुब्लिकेसन हुने समस्या नरहने उनको भनाइ थियो।
देशभरका ७ सय ५३ स्थानीय तहमध्ये साँफेबगर नगरपालिकापछि अमरगढी नगरपालिका डाटा पोर्टल तथा सूचना प्रविधि केन्द्र स्थापना गर्ने दोस्रो स्थानीय तह हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
