कास्की– कास्की जिल्ला अदालतले पहिलोपटक भर्चुअल माध्यबाट प्रतिवादीको बयान गराउँदै थुनछेक आदेश गरेको छ।
मंगलबार जिल्ला अदालत कास्कीका न्यायाधीश श्रीकृष्ण भट्टराईको इजलाशबाट मात्रै तीनवटा मुद्दामा प्रतिवादीको बयान भर्चुअल माध्यमबाट गरिएको थियो भने बाँकि इजलासका मुद्दाहरुमा पनि भर्चुअल माध्यमबाटै सुनुवाइ गर्दै आदेश गरेको सूचना अधिकारी निर पनेरुले जानकारी दिए।
यसरी भयो भर्चुअल सुनुवाइ
यसअघि प्रहरीमा दर्ता भएका मुद्दाहरुको सुरुमा अदालतमा मिसिल मगाइएको थियो। उक्त मिसिल अदालतमा पुगेपछि मुद्दाका वादी/प्रतिवादीहरुलाई तोकिएको पेसी अनुसार दिन र समय उपलब्ध गराइएको थियो। फोन सम्पर्क मार्फत् प्रहरीको हिरासतमा रहेका अभियुक्तहरुलाई अनलाई भिडियो कन्फरेन्सको प्रविधि उपलब्ध गराइ उनीहरुलाई दबावरहित स्वतन्त्र वातावरण सृजना गर्न लगाइयो।
प्रहरीमा दिएको बयान अनुसार प्रहरीकै रोहवरमा अनलाइन मार्फत् गरिने प्रतिवादीको बयान प्रहरी कार्यालयबाटै दिइँदा थुनुवा दबावमा परि प्रहरीमै दिएको बयानमै स्विकारोक्ति दिनसक्छ कि भन्ने चुनौतिलाई मध्यनजर गरेर जिल्ला अदालत कास्कीले दवावरहित वातावरणमा अभियुक्तलाई राख्न लगाएको थियो।
त्यसपछि जुम एप्लिकेशन मार्फत् सम्पर्क स्थापना गरि भचुर्अल माध्यमबाट अभियुक्तको बयान गरिएको थियो। त्यसरी भचुर्अल माध्यमबाट गरिएको अभियुक्तको बयानलाई अभिलेखीकरणसमेत गरियो भने भिडियो कन्फरेन्समा भएका कुराकानीलाई रेकर्डसमेत गरिएको थियो।
अभियुक्तको बयान सम्बन्धी प्रावधान मुलुकी फौजदारी कार्यविधि संहिता २०७४ को दफा १२२ मा उल्लेख छ। जसमा, अभियुक्तलाई दफा १२१ बमोजिम अभियोग तथा त्यस्तो अभियोगमा हुन सक्ने सजाय सुनाई सकेपछि अदालतले त्यस्तो अभियोग उपर निजको के भनाइ छ सोधि निजको बयान अभिलेख गर्नु पर्ने उल्लेख छ। यसको उपदफा ५ मा, अभियुक्तको बयान अभिलेख गर्दा प्रत्येक प्रश्न र त्यसको जवाफ दुबै लेखबद्ध गर्नु पर्नेछ र श्रव्य दृश्य संवाद (भिडियो कन्फरेन्स) मार्फत बयान लिएको भए त्यसको अभिलेखसमेत राख्नुपर्नेछ, भनिएको छ।
यही दफालाई प्रयोग गरी कास्की जिल्ला अदालतले भचुर्अल माध्यमबाट अभियुक्तको बयान लिएको सूचना अधिकारी पनेरुले जानकारी दिए।
त्यसरी गरिएको बयान अभिलेख भइसकेपछि सो अभिलेखमा अभियुक्तको सहीछाप हुनुपर्ने व्यवस्था सोही दफाको उपदफा (६)ले गरेको छ। तर अभियुक्तको भौतिक उपस्थिति बिना श्रव्य दृश्य (भिडियो कन्फरेन्स) मार्फत बयान लिएकोमा सोही उपदफा (६) को प्रतिबन्धात्मक वाक्याँश अनुसार न्यायाधीशले त्यस्तो कुरा प्रमाणित गरी राख्नु पर्नेछ, भन्ने कुरालाई आधार मानेर न्यायाधीशले हस्ताक्षर गरी प्रमाणित गरेको सूचना अधिकारी पनेरुले बताए। प्रहरीको दवावमा बयान दिन लगाउँदा कतै स्विकारोक्ति मात्रै बयान आउने होकि भन्ने जिल्ला अदालत कास्कीको आशंका थियो। तर मंगलवार भएको बयानमा यस्तो नदेखिएको पनेरुले बताए। अभियुक्तले इन्कारी बयान दिएकाले दवावमुक्त वातावरणमा राखिएको पुष्टि गर्ने उनको भनाइ थियो।
कोरोनाको महामारी दिनप्रतिदिन बढ्दै गएसँगै वैशाख ३० गते सर्वोच्चको फुल कोर्टले भर्चुअल माध्यमबाट मुद्दाको सुनुवाइ गर्ने प्रयास गरिने भनेको थियो। तर जिल्ला अदालतको हकमा के गर्ने भनेर सबै जिल्ला अदालतहरु अझै अलमलमै रहेका बेलामा कास्की जिल्ला अदालतले मंगलबारबाट भर्चुअल माध्यममै पहिलोपटक प्रतिवादीको बयान लिन सुरु गरेको हो। यसअघि नै थुनछेक बहस भर्चुअल माध्यमबाट अन्य जिल्ला अदालत र कास्की जिल्ला अदालतले गरेको भएपनि प्रतिवादीको बयान अनलाइन माध्यमबाट भने अझै सुरु भएको थिएन।
यस्तै कास्की जिल्ला अदालतले वकालतनामा पनि अब अनलाइन माध्यमबाटै ग्रहण गर्न सकिने बताएको छ। त्यस्तै कानुन व्यवसायीहरुले भर्चुअल माध्यमबाट बहस गर्नु अघि बहसनोटको स्क्यान कपीलाई अदालत पठाउनु पर्ने ब्यवस्था गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
