काठमाडौ– वन तथा वातावरण मन्त्री प्रेमबहादुर आले आफ्ना अभिव्यक्तिका कारण बेला–बेला विवादमा आइरहन्छन्। पछिल्लो समय पनि उनी आफ्नो एउटा अभिव्यक्ति (निर्देशन)का कारण आलोचनाको केन्द्रमा छन्।
कोरोना भाइरसको संक्रमणबाट मृत्यु हुने दर बढिरहँदा मन्त्री आलेले आर्यघाटमा दाउराको कमी हुन नदिनू भनेर दिएको निर्देशनलाई लिएर अहिले सवत्र आलोचना भइरहेको छ।
मन्त्री आलेले आइतबार पशुपति क्षेत्रको शवदाह गर्ने स्थान (आर्यघाट)मा दाउराको कमी हुन नदिन वन तथा वातावरण मन्त्रालय मातहतको नेपाल वन निगमका महाप्रबन्धक धनञ्जय पौडेललाई निर्देशन दिएका थिए।
वन मन्त्री आलेले शव जलाउन दाउराको कमी हुन नदिनू भनेर निर्देशन दिएको विषयमा समाचार सार्वजनिक भएपछि सरकारको प्राथमिकताको क्षेत्रलाई लिएर समेत अहिले आलोचना भइरहेको छ। कोरोना संक्रमितहरु अक्सिजन नपाएर मृत्युवरण गरिरहेको अवस्थामा सरकारले भने अक्सिजनको व्यवस्था गर्नुको सट्टा आर्यघाटमा दाउराको जोहो गर्न जोड दिएको आलोचकहरुको टिप्पणी छ।
मन्त्री आले भने आफूले बोलेको कुराको गलत ब्याख्या भएको दाबी गर्छन्। ‘कोरोना संक्रमितहरु अक्सिजन नपाएर मरिरहँदा घाटमा दाउराको अभाव नहोस् भनेर निर्देशन दिन अप्ठेरो लागेन?’ भन्ने नेपाल लाइभको प्रश्नको जवाफमा मन्त्री आलेले भने, ‘घाटमा दाउराको कमी नहोस् भनेर विभागीय मन्त्रीका हिसाबले निर्देशन दिएको हुँ। त्यसको गलत ब्याख्या गरेर अहिले सामाजिक सञ्जालतिर विरोध भइरहेको छ। आफूले सम्हालेको मन्त्रालयको जिम्मेवारीअनुसार मैले निर्देशन दिएको हुँ। दाउराको कमी हुन नदिनू भनेर मैले के गल्ती गरेँ ?’
कोरोना संक्रमितको मृत्युदर बढेसँगै आर्यघाटमा दाउराको अभाव हुन थालेपछि आफूले चासो लिएर सम्बन्धित निकायका व्यक्तिलाई समस्या समाधानका लागि निर्देशन दिएको मन्त्री आलेको दाबी छ।
‘पहिला एक ट्रक दाउरा हुँदा तीन दिनलाई पुग्ने गरेको रहेछ, तर कोरोनाको दोस्रो लहर फैलिएपछि तीन ट्रक दाउराले पनि एक दिनलाई धानेको छैन,’ मन्त्री आलेले भने, ‘अहिले दाउराको अभाव भएको र वन मन्त्रालयअन्तर्गतका निकायका प्रमुखहरुले पशुपतिमा शव जलाउन समेत दाउरा अभाव हुन थाल्यो भनेपछि मैले तत्काल आफ्नो मन्त्रालयको जिम्मेबारीबोध गर्दै निर्देशन दिएको हुँ।’
आइतबार मन्त्रालयमा बैठकपछि आफूले पशुपति क्षेत्रको शवदाह क्षेत्र आर्यघाटमा दाउराको कमी हुन नदिन निर्देशन दिएको उनले बताए।
पशुपतिमा शव जलाउन दाउरा वितरणको जिम्मेवारी पाएको वन तथा वातावरण मन्त्रालय मातहतको निकाय, नेपाल वन निगम लिमिटेडका महाप्रवनधक धनञ्जय पौडेललाई पशुपतिस्थित आर्यघाट क्षेत्रमा शवदाहका लागि आवश्यक पर्ने दाउरा अभाव भएको, त्यहाँवाट आपूर्ति बढाउन माग आएको जानकारी गराएपछि यस्तो निर्देशन दिएको उनले सुनाए। वन निगम लिमिटेडका महाप्रवनधक पौडेलले शव जलाउनका लागि आफूहरूसँग कम्तिमा पनि एक महिनाका लागि दाउरा अहिले नै दिनुपर्ने भनेपछि यस्तो निर्देशन दिएको उनले बताए।
‘वैज्ञानिक वन व्यवस्थापन खारेज भएको र त्यहाँको दाउरा रोकिँदा रौतहट, बारा जिल्लाबाट दाउरा ढुवानी भएर आउँदैछ, उक्त दाउरा आइपुगे कम्तिमा पनि एक महिनाका लागि शव जलाउन पुग्ने भएकाले अहिलेलाई अभाव हुन नदिने मैले निर्देशन दिएको हुँ,’ आलेले भने।
मन्त्री आलेले निजी क्षेत्रसँगको सहकार्यमा समेत दाउरा ल्याउनका लागि पहल भइरहेको बताए।
पछिल्लो हप्ता यता पशुपतिस्थित आर्यघाटमा कोरोनाका कारण मृत्यु भएका दिनमा कम्तिमा पनि १०० देखि १०४ सम्म शव आउने गरेको कुरालाई मध्यनजर गर्दै यस्तो निर्देशन दिएको आलेले प्रष्ट पारे।
पशुपति क्षेत्रस्थित नेपाल वन निगम लिमिटेडको डिपो कार्यालयका इञ्चार्ज द्रोण पोख्रेलले कोरोनाबाट मृत्यु भएकाको एक शव जलाउन कम्तिमा चार क्विण्टल दाउरा लाग्ने गरेको जानकारी दिए।
कोभिड नभएकाको शव जलाउन दुई क्विण्टल जती दाउरा आवश्यक पर्ने गरेकोमा अहिले कोभिडबाट मृत्यु भएकाको शव जलाउन दोब्बर दाउरा आवश्यक पर्ने भएपछि यस्तो निर्देशन दिन परेको मन्त्री आलेले बताए। पछिल्लो दुई हप्तायता आर्यघाटमा शव जलाउनका लागि दैनिक २५ हजार केजी दाउराको माग भइरहेको छ।
आलेले भने, ‘सरकारले वैज्ञानिक वन खारेज गर्यो। म नै मन्त्री भएर आएपछि वैज्ञानिक वनका नाममा भष्टाचार भएपछि रोकेको हुँ।’
वैज्ञानिक वन भित्रका काठ दाउरा प्रतिबन्ध लगाएका कारण रोकिएको छ। वैज्ञानिक वनको काठ दाउरा खारेज भएपछि निगमको दायरा रोकिएकाले यस्तो निर्देशन दिएको उनले बताए। ‘मन्त्रीपरिषद्बाट वैज्ञानिक वनको काठ फुकुवा गर्ने निर्णय त भयो तर तत्काल आउने सम्भावना नभएपछि ज्यान त गुमाए, शव पनि जलाउन नरोकियोस् भनेर यस्तो निर्देशन दिएको हुँ,’ उनले भने।
आफूले सकारात्मक रुपमा लिएर यस्तो काम गरेको, तर नकारात्मक रुपमा प्रस्तुत गरिएको उनले दावी गरे।
‘मन्त्रीहरु अहिले कोरोना संक्रमितको उपचार र मृत्यु नै हुन नदिनेमा केन्द्रित हुनुपर्नेमा दाउरा व्यवस्थामा कति हतारो देखाएको’ भनेर आलोचना भइरहेको छ नि ? भन्ने प्रश्नमा मन्त्री आलेले अक्सिजन व्यवस्था गर्ने जिम्मेवाारी आफ्नो मन्त्रालयको नभएको बताए।
‘अक्सिजन ल्याउने र उपचारमा ध्यान दिने काम स्वास्थ्य मन्त्रालय र मन्त्रीले गर्ने हो। अक्सिजवन अभावको कुरा गर्ने हो भने मैले डोटी र कैलालीमा आफ्नो पैसाले खरिद गरेर पठाएको छु’, उनले भने, ‘कोभिड नेपालमा मात्र फैलिएको हैन। विश्वभर फैलिएको छ। यसको नियन्त्रण तथा रोकथामका लागि सरकारले आफ्नो भरपुर प्रयास जारी नै राखेको छ।’
सामूहिक रुपमा मन्त्रीको जिम्मेवारीमा गर्ने कार्यमा आफू कतै पछि नहेटेको भन्दै उनले सबै कुरालाई नकारात्मक रुपमा चित्रित गरेर आलोचना गर्न नहुने बताए।
‘कोरोना नियन्त्रणका लागि मन्त्रिपरिषद्बाट गम्भीर रुपमा निर्णय गर्नेदेखि अन्य कुरामा सहभागी भएकै छु,’ उनले भने, ‘यहाँ सकारात्मक कुराको प्रचार गर्ने भन्ने छैन, नकारात्मक कुरालाई मात्रै बिकाउने चलन छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
