पोखरा– पोखरा–लेखनाथ महानगरपालिकाले एक वर्ष अवधिमा गरेको कार्यप्रगति सार्वजनिक गरेको छ।
मेयर मानबहादुर जिसीले महानगरले एक वर्षमा सोचेजस्तो प्रगति नगरे पनि कामको सुरुवात गरेको बताए। ‘जनप्रतिनिधिका रुपमा आएपछि केही अलमल थियो। तर पछि सिस्टममा ल्याउन कोसिस भने गरेका छौं,’ मेयर जिसीले भने।
पहिलो चरणमा स्थानीय चुनाव नभई संघीय र प्रदेश हुँदै आएको भए कार्य सम्पादनमा कानुनको झमेला खेप्नुनपर्ने उनले सुनाए। कानुनी कार्यमा ढिलाइ भए पनि विकास निर्माण कार्यमा महानगरले गति लिएको उनको दाबी छ।
महानगरले कार्य सम्पादनका लागि २८ वटा ऐन, नीति कार्यविधि, निर्देशिका र नियमावली तयार गरेको मेयर जिसीले जानकारी दिए।
महानगरका सबै वडामा कर्मचारी व्यवस्थापन गरिसकेको र ३३ वटै वडामा अनलाइन पञ्जीकरण सुरु गरिएको जिसीले बताए। ‘महानगरले सबै वडामा इन्टरनेट सेवा पु¥याएको छ। पञ्जीकरण लगायतका काम अनलाइनबाटै गर्न सकिन्छ,’ उनले महानगरले गरेको प्रगति सुनाए।
योजनातर्फ ३० स्थानमा वडादेखि वडासम्म जोड्ने ८ मिटर चौडाइका कनेक्टिभिटी सडक निर्माण सुरु भएको जिसीले जानकारी दिए।
महानगरले आगामी असार १० मा नीति तथा कार्यक्रम ल्याउने तयारी गरेको मेयर जिसीले बताए।
भूउपयोग नीतिबिना कामको परिणाम नआउने विश्लेषण गरी महानगरले फ्रान्सको प्राविधिक सहयोगमा नीति बनाउन सुरु गरेको छ उनले बताए। महानगरपालिकाले फेवाताल, फिर्केखोला, सेती नहर लगायतको अतिक्रमण गरेर बनेका संरचना हटाउने तयारी गरिरहेको जिसीले जानकारी दिए। उनले भने, ‘फिर्केखोला र सेती नहरको सीमाङ्कन तथा रेखाङ्न भइसक्यो काम चाँडै अगाडि बढ्छ।’
उनले फेवातालको मापदण्डभित्र परेका जग्गाधनीलाई मुआब्जा दिलाउन पहल गरी अतिक्रमित गरी बनाइएका संरचना हटाउने बताए।
महानगररका उपमेयर मञ्जु गुरुङले ऐन कानुन अभावमा सोचे जस्तो काम गर्न नसकेको बताइन्।
दोस्रो नगरसभाबाट न्यायिक समितिले पूर्णता पाएको जानकारी दिँदै उनले अहिलेसम्म ६७ वटा निवेदन परेको बताइन्। ‘ती मध्ये १५ वटा निवेदन सुल्झाइसकेका छौं, बाँकी केही प्रक्रियामा छन्, केही हाम्रो क्षेत्राधिकारभन्दा बाहिर भएकाले सम्बन्धित निकायमा पठाएका छौं,’ उनले भनिन्।
समितिमा धेरै जसो नागरिकता, जन्मदर्ता, विवाहदर्ता, मेलमिलाप सम्बन्धी निवेदन आउने उनले बताइन्। ‘प्रायः मुद्दा वडा स्तरमा मिलेका छन्,’ उपमेयर गुरुङले भनिन्।
कार्यप्रगति प्रतिवेदन सार्वजनिक कार्यक्रममा महानगर प्रमुख जिसीले ‘स्मार्ट वडापत्र एप’ समेत सार्वजनिक गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
