काठमाडौं– ललिता निवास जग्गा प्रकरणमा विशेष अदालतको आदेशले थुनामा रहेका अख्तियार दुरुपयोग अनुसन्धान आयोगका पूर्वप्रमुख आयुक्त दीप बस्न्यातको बन्दीप्रत्यक्षीकरणको निवेदन सर्वोच्चमा पेसी तोकिएको छ। न्यायाधीशद्वय दीपककुमार कार्की र ईश्वरप्रसाद खतिवडाको इजलाशमा पेशी रहेको छ।
कोरोना संक्रमण भएर अस्पतालमा भर्ना भएको र मुटु रोगीसमेत भएकाले धरौटीमा रिहा भई मुद्दा लड्न पाउनुपर्ने माग उनले बन्दीप्रत्यक्षीकरणको निवेदन दायर गरेका थिए। २०७८ वैशाख १७ गते बस्नेतका तर्फवाट छोरी ज्वाई प्रज्वल अधिकारीले सर्वोच्चमा बन्दीप्रत्यक्षीकरणको निवेदन दर्ता गराएका थिए।
बस्नेत हाल कोभिड संक्रमणका कारण ओम अस्पतालमा भर्ना भएको र त्यहाँ उपचाररत रहेको भन्दै उनले महामारीको समय भएकाले धरौटीमा रिहा हुनुपर्ने जिकीर गरिएको छ।
सरकारी जग्गा व्यक्तिको नाममा ल्याउन मुख्य भूमिका निर्वाह गरेको आरोपमा बस्न्यातविरुद्ध विशेष अदालतमा मुद्दा दायर भएको थियो।
भौतिक पूर्वाधार सचिव रहेको समयमा बस्नेतले उक्त जग्गा व्यक्तिको नाममा बनाउन भूमिका खेलेको अख्तियारको आरोपपत्रमा उल्लेख छ।
विशेषले थुनामा पठाउने निर्णय गैरकानुन भएको जिकिर बस्न्यातको निवेदनमा उल्लेख छ। उनले आफूवाहेक अरु निवेदक धरौटीमा रिहा भएकाले थुनामा राख्ने निर्णय गैरकानुनी भएको जिकिर गरेका छन्। तल्लो अदालतले पुर्पक्षका लागि थुनामा पठाएपछि त्यसविरुद्ध माथिल्लो अदालत जान पाउने सुविधाअन्तर्गत बस्नेत सर्वोच्च पुगेका थिए।
अख्तियारले बालुवाटारको ११३ रोपनी सरकारी जग्गा कीर्ते गरी व्यक्तिको नाममा दर्ता गरेको अभियोगमा ४ मन्त्री र तीन पूर्वसचिवसहित १ सय १० जनाविरुद्ध २०७६ माघ २२ गते भ्रष्टाचार मुद्दा दायर गरेको थियो। अख्तियारकै पूर्व प्रमुख आयुक्त, भूमिसुधार तथा मालपोतका कर्मचारी, जग्गा खरिदबिक्री गर्नेहरूविरुद्ध पनि मुद्दा दायर भएको थियो।
मुद्दा दायर गरिएकामा नेपाली कांग्रेसका नेता गच्छदार तथा भाटभटेनीका सञ्चालक मीनबहादुर गुरुङसमेत थिए। विशेष अदालतले उनीहरुलाई फागुनमै अदालत उपस्थित हुन म्याद जारी गरेको थियो।
लकडाउन खुकुलो भएसँगै अदालत खुल्न थालेपछि केही आरोपी अदालतमा उपस्थित भएपनि गच्छदारसहितका केही भिआइपी भने उपस्थित भएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766152266.png)
-1764146706.png)
-1763721444.png)
