काठमाडौं- बाँकेका थप ७ कोरोना संक्रमितको उपचारका क्रममा निधन भएको छ।
जिल्ला कोभिड- १९ संकट व्यवस्थापन केन्द्र(डिसिसिएमसी) बाँकेका फोकल पर्सन तेजबहादुर वलीका अनुसार भेरी अस्पतालमा वैशाख छ गते उपचारका लागि भर्ना भएका ६६ वर्षीय पुरुषको आज बिहान ४ बजे मृत्यु भएको छ। नेपालगन्ज उपमहानगरपालिका १ का ती पुरुषको वैशाख १६ गते पीसीआर परीक्षण गर्दा संक्रमण पुष्टि भएको थियो।
त्यसैगरी नेपालगन्ज मेडिकल कलेज कोहलपुरमा उपचाररत नेपालगन्ज उपमहानगरपालिका ५ का ४८ वर्षीय पुरुषको पनि गयराति ९ः१० बजे निधन भएको छ। उनको वैशाख १४ गते भेरी अस्पतालमा पीसीआर परीक्षण गरिएको थियो।
भेरी अस्पतालमा उपचाररत नेपालगन्ज उपमहानगरपालिकाका २ का ५१ वर्षीय पुरुषको पनि आज बिहान ३ः३० बजे निधन भएको छ। उनको वैशाख ६ गते भेरी अस्पतालमा पीसीआर परीक्षण गरिएको थियो। उनी वैशाख ७ गते भेरी अस्पतालमा भर्ना भएका थिए।
नेपालगन्ज मेडिकल कलेज कोहलपुरमा उपचाररत ६० वर्षीया महिलाको आज बिहान १ः२० बजे मृत्यु भएको छ। वैजनाथ गाउँपालिका ८ उनलाई हिजो नै पीसीआर पोटिटिव आएपछि अस्पताल भर्ना गरिएको थियो।
डीसीसीएमसी बाँकेका अनुसार बढैयाताल गाउँपालिका ८ का ४७ वर्षीय पुरुषको पनि आज बिहान ६ः ३० बजे भेरी अस्पतालमा निधन भएको छ। वैशाख १७ गते भेरी अस्पतालमा पिसिआर परीक्षणमा संक्रमण पुष्टि भएका उनलाई वैशाख १८ गते अस्पतालमा भर्ना गरिएको थियो।
त्यसैगरी, खजुरा गाउँपालिका २ का ३२ वर्षीय पुरुषको भेरी अस्पतालमा आज बिहान ८ः३० बजे मृत्यु भएको छ। वैशाख ५ गते पिसिआर रिपोर्ट पोजिटिव आएका उनलाई वैशाख ७ गते अस्पताल भर्ना गरिएको थियो।
काेहलपुर नगरपालिका १५ का ६० वर्षीय पुरुषको आज बिहान १ बजे नेपालगन्ज मेडिकल कलेज कोहलपुरमा मृत्यु भएको छ। उनकाे १७ गते पिसिआर रिपोर्ट पोजिटिव आएकाे थियाे। उनी १७ गते नै अस्पताल भर्ना भएका थिए।
योसँगै हालसम्म बाँके जिल्लाका १३५ संक्रमितको मृत्यु भएको छ। बाँकेमा उपचाररत रहेका बाहिरी जिल्लाका १२२ संक्रमितको मृत्यु भएको डिसिसिएमसी बाँकेले जनाएको छ।
बाँकेमा हाल ३ हजार ८९६ जना सक्रिय संक्रमित रहेका छन्। हिजो मात्र बाँकेमा जिल्लाका ९ र बाहिरी जिल्लाका ३ गरी १२ संक्रमितको मृत्यु भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
