फिचर

९ तस्बिरमा हेर्नुहोस् शनिबार उद्घाटन हुने धरहरा

निमेषजंग राई शुक्रबार, वैशाख १०, २०७८ २१:३९

काठमाडौं– १२ वैशाख २०७२ को भूकम्पले ढलेको धरहरा 'नयाँ' बनेर ठडिएको छ। भूकम्पले ढलेको धरहराको छेवैमा बनाइएको 'नयाँ धरहरा'को शनिबार उद्घाटन गरिने जनाइएको छ।

०७२ सालको भूकम्पले भत्किएको धरहरालाई भने कपडाले छोपेर राखिएको छ।

तत्कालीन प्रधानमन्त्री भीमसेन थापाले महारानी त्रिपुरासुन्दरीको सम्झना स्वरुप १८८२ सालमा धरहराको निर्माण गर्न लगाएका थिए। १९९० सालको भूकम्पले भत्किनु अगाडि धरहरा ११ तलाको थियो। २ माघ १९९० को भूकम्पले बर्दाली माथिको १० र ११ तला भत्किएको थियो।

९० सालमा भत्किएपछि तत्कालीन राणा प्रधानमन्त्री जुद्ध शम्शेरले २ वर्षपछि ९ तला नै कायम गरी धरहराको पुन:निर्माण गराएका थिए।

७२ सालको भूकम्पले ९ तले धरहरा पूर्ण रुपले ध्वस्त बनेको थियो। नयाँ बनाइएको धरहरा २२ तलाको छ।

नयाँ धरहराको निर्माणमा सिमेन्ट, फलाम लगायत आधुनिक प्रविधिको प्रयोग गरिएको छ।

पहिलेको धरहरा चुना र सुर्कीले बनेको थियो। सिमेन्ट र फलामको प्रयोग गरेर निर्माण गरिएका कारण सम्पदाविद्‌हरुले भने नयाँ धरहरालाई 'झिल्के टावर'को संज्ञा दिने गरेका छन्।

नवनिर्मित धरहरा भीमसेन थापाले बनाएको जस्तै ऐतिहासिक नहुने सम्पदाविद्हरुको भनाइ छ। अहिले बनेको धरहरा पुन:निर्माण नभइ नवनिर्माण मात्रै भएकाले यसलाई 'टावर' मात्रै भन्नुपर्ने उनीहरुको तर्क छ।

प्रधानमन्त्री केपी शर्मा ओलीले शनिबार उद्घाटन गर्ने धरहरा सर्वसाधारणका लागि भने करिब ८ महिना पछि मात्रै खुला हुने छ।

धरहरा 'टावर' मात्रै बने पनि आसपासका अन्य संरचनाको काम भने सकिएको छैन। धरहरा क्षेत्रमा वाटर फाउन्टेन पार्क रहने छ।

चार सय चार पांग्रे गाडी र हजार वटा दुई पांग्रे गाडीलाई पार्क गर्न मिल्ने गरी पार्किङ स्थल पनि बनाइँदै छ। धरहरा परिसरमा म्युजियमका साथै नेपालमा उत्पादन हुने सामानहरुको पसल समेत रहने जनाइएको छ।