काठमाडाैं- परराष्ट्रमन्त्री प्रदीपकुमार ज्ञवालीले सदनलाई सरकारले बिजनेस नदिएको भन्ने सांसदहरूको भनाइलाई अस्वीकार गरेका छन्। उनले विभिन्न सन्धि संसद्मा दर्ता गराएको तर, सदनले अगाडि नबढाएको भन्दै किन अगाडि नबढाएको हो भनेर प्रश्न गरेका छन्।
प्रतिनिधि सभाको सोमबारको बैठकमा सांसदहरूले उठाएका प्रश्नको जवाफ दिनेक्रममा मन्त्री ज्ञवालीले यस्तो प्रश्न उठाएका हुन्। ‘विभिन्न सन्धिहरू सदनमा सरकारले अनुमोदनका लागि पेस गरेको छ ’ उनले भने ‘किन अगाडि बढेका छैनन् ? म भन्न सक्दिनँ। सदनको अजेन्डा सरकारले तय गर्ने होइन। सरकारले दर्ता गर्ने मात्र हो।’
कांग्रेस सांसद दिव्यमणी राजभण्डारीले एमसीसीलगायतका सन्धि सदनबाट अगाडि बढाउन सरकार किन अग्रसर नभएको हो भनेर प्रश्न गरेका थिए। सोही प्रश्नको जवाफ दिँदै मन्त्री ज्ञवालीले सरकारले दर्ता गराएको तर, संसदले अघि नबढाएको आरोप लगाए।
‘एमसीसी भन्नुस्, आईएईएको एटोमिक इनर्जीसँग सम्बन्धित सम्झौता भन्नुस्, अन्तर्राष्ट्रिय सन्धिहरू अनुमोदनका लागि दर्ता सरकारले गरेको छ’ उनले भने, ‘हामी त सधैं तयार छौं। सदनले किन अगाडि बढाइरहेको छैन। सदन स्वयंले यसको जवाफ दिनुपर्छ।’
अमेरिकी सहयोग निकाय एमसीसीसँग भएको सम्झौता लामो समयदेखि संसद्मा दर्ता भएर विचाराधीन रहेको छ। यसलाई अगाडि बढाउने विषयमा सत्तारूढ दलभित्र नै विवाद भएपछि यो सन्धि अलपत्र परेको छ। दलहरूबीच सहमति हुन नक्सदा यो संसद्मा अलपत्र रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
