काठमाडौं- सशस्त्र प्रहरी बलको नम्बर ४ गण सुनसरीका एसपी माधव पौडेलविरुद्ध अख्तियार दुरुयोग अनुसन्धान आयोग र सशस्त्र प्रहरी हेडक्वार्टरले एकसाथ अनुसन्धान अघि बढाएका छन्।
पदीय दुरुपयोग गर्दै तस्कर र व्यापारीहरुबाट रकम असुल गरेको भन्ने उजुरी अख्तियार र हेडक्वार्टरमा परेपछि एसपी पौडेलविरुद्ध अनुसन्धान अघि बढेको हो।
सीमा नाकामा हुने तस्करीमा मिलेमतो गरी रकम असुल गर्ने गरेको उजुरी आएपछि अनुसन्धान अघि बढाइएको अख्तियार स्रोतले नेपाललाइभलाई जानकारी दियो। ‘एसपी पौडेलले सादा पोसाकमा सशस्त्र प्रहरी परिचालन गरी रकम असुल्ने गरेको भन्दै व्यापारीहरुबाट रकम असुल गरेको सूचीसहित उजुरी परेपछि अनुसन्धान अघि बढाइएको हो,’ अख्तियार स्रोतले भन्यो।
एसपी पौडेलले सुनसरीमा कार्यरत सशस्त्र प्रहरी हवल्दार सचनकुमार चौधरी र सशस्त्र प्रहरी सहायक हवल्दार भाष्कर दर्लामी मगरलाई सादा पोसाकमा खटाएर रकम असुल गरेको भन्दै उजुरी परेको थियो।
उजुरीमा रकम असुलीको विवरणसमेत उल्लेख गरिएको छ। उजुरीमा उल्लेख भएअनुसार कप्तानगञ्जका खिला यादवबाट दुई लाख, पोकिनी ग्रुप अमडुवाबाट ८० हजार, लौकहीका व्यापारी राम पुरीबाट ७० हजार रुपैयाँ असुलेको विवरण अख्तियारमा छ।
त्यसैगरी उल्टी नाका, घुस्कीबाट पनि रकम असुल्ने गरेको उजुरीमा उल्लेख छ। लौकहीका विद्यानन्द साहबाट एक लाख, श्रीपुरका रमेश थापाबाट तीन लाख रुपैयाँ असुल गरेको विवरणसहित उजुरी परेको हो।
भुटाहाका प्रमोद मेहताबाट ८० हजार, अमरुवाका व्यापारी दीलिप सहनीबाट ८० हजार, अमरुवाकै वनोद मेहताबाट ७० हजार, भुटाहाका भोला गुप्ताबाट ५० हजार, लौकहीका दुर्गा यादवबाट एक लाख ५० हजार रुपैयाँ असुल गरेको भन्दै उजुरी परेको छ।
उक्त उजुरीमाथि सशस्त्र हेडक्वार्टरले समेत अनुसन्धान गरिरहेको छ। सीमा सुरक्षा र सीमा नाकाबाट हुने तस्करीलगायतका अपराध रोक्ने मुख्य जिम्मेवारी पाएको सशस्त्रका एसपी नै रकम असुलीमा संलग्न भएको आरोप लागेपछि प्रहरी हेडक्वार्टरले समेत तीव्र रुपमा छानबिन अघि बढाएको छ।
एसपी पौडेलमाथि व्यापक गुनासो र उजुरी आएपछि हेडक्वार्टरसमेत एसपी पौडेललाई जिम्मेवारीबाट हटाउने तयारी गरेको स्रोत बताउँछ। यसअघि डिएसपी हुँदासमेत कमाण्ड कन्ट्रोलमा कमजोर देखिएको भन्दै हेडक्वार्टरले पौडेललाई तानेको थियो। एसपी पौडेल स्टाफ कलेज पास गरेका अधिकृत हुन्। सशस्त्रमा स्टाफ कलेज पास गर्ने अधिकृतलाई अब्बल मानिँदै आएको छ। तर, कतिपय अधिकृतको फिल्ड कमाण्ड फितलो भएको भन्दै अवधि नपुगी जिम्मेवारी हेरफेर भएका छन्।
भारतसँग ६१.९ किलोमटर सीमा जोडिएको सुनसरीमा सशस्त्रका एक दर्जन बोर्डर आउट पोस्ट (बिओपी) छन्। विभिन्न ५१ वटा नाकाबाट मान्छेहरुको आउजाउ हुने गरेको छ। उक्त नाकाहरुबाट भन्सार छलेर अवैध मालसान भित्रने/बाहिरिने गरेकाले तस्करहरुको सेटिङमा प्रहरीले आँखा चिम्लिँदा राम्रो आम्दानी हुने गरेकाले सशस्त्रका अधिकृतको रोजाइमा सुनसरीलगायत भारतसँग सीमा जोडिएका तराईका जिल्लाहरु पर्ने गरेका छन्। तराईका जिल्लाको कमाण्ड सम्हाल्न शक्तिकेन्द्रमार्फत दबाबसमेत दिने गरिन्छ।
यसअघि पनि आर्थिक अनियमिततामा मिलेमतो गरेको आरोप लागेका प्रहरी अधिकारीहरूलाई हेडक्वार्टरले कारबाही गरेको थियो।सशस्त्र प्रहरी ऐन, नियमावलीविपरीत काम गर्न कसैलाई छुट नभएकाले आचरणविपरीत काम गरेको पाइएमा जो कोहीलाई कारबाहीको दायरामा ल्याइने सशस्त्रका प्रवक्ता तथा डिआइजी राजु अर्याल बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787645626.png)
-1786602170.png)
-1786513116.png)
