रत्ननगर, चितवन- जिल्लाको पर्यटन प्रवर्द्धनका लागि उद्योग वाणिज्य संघ चितवनले अभियान सुरु गरेको छ।
संघको पर्यटन समितिले जिल्लाका सबै पर्यटन क्षेत्रको अभिलेख तयार गर्नेगरी प्रवर्द्धनात्मक अभियान थालेको हो।
सन् २०२० सम्म नेपालमा करिब १५ लाख पर्यटक भित्र्याउने लक्ष्य सरकारको रहेकाले त्यसलाई साकार पार्न काम थालिएको उद्योग वाणिज्य संघ चितवन, पर्यटन समितिका संयोजक अशोक अधिकारीले जानकारी दिए।
चितवनमा तीन लाख पर्यटक भित्र्याउने लक्ष्य छ। चितवनमा हाल करिब दुई लाख पर्यटक आउँछन्। पहिलो चरण अन्तर्गत पर्यटकीय क्षेत्रको अभिलेख तयार पारी ‘गाइड बुक’ बनाउने प्रक्रिया थालिएको संयोजक अधिकारीले बताए।
त्यस्तै चितवनको सबै पर्यटकीय क्षेत्रको पहिचान झल्कने गरी जिल्लाका सबै होटलमा पर्यटकीय क्षेत्रको तस्वीर राखिने समेत उनले जानकारी दिए।
'यसले होटल आएका पर्यटकलाई गन्तव्यको पहिचान दिलाउँछ', संयोजक अधिकारी भन्छन्, 'जान चाहने पर्यटक, त्यो हेरेर बसाइ लम्ब्याउन सक्छन्।'
सोही अभियान अन्तर्गत शुक्रबार मात्रै संघको पर्यटन समितिको नेतृत्वमा चितवन पर्यटन विकास समिति र होटल व्यवसायी संघको सहकार्यमा इच्छाकामना गाउँपालिकाको पर्यटन प्रवर्द्धनबारे कुरिनटारमा छलफल समेत भएको उनले बताए।
छलफलमा इच्छाकामना गाउँपालिकाकी अध्यक्ष गीताकुमारी गुरुङले पर्यटन गुरुयोजना बनाएर अघि बढ्न लागिएको बताउँदै यसका लागि उद्योग वाणिज्य संघ, चितवन पर्यटन विकास समिति तथा चितवन होटल व्यवसायी संघसँग सहकार्य गर्न तयार रहेको धारणा व्यक्त गरे।
चितवनको इच्छाकामना ऐतिहासिक धार्मिक र पहाडी पर्यटनका हिसाबले महत्वपूर्ण छ। जिल्लाका ४० पर्यटकीय गन्तव्यमध्ये यस गाउँपालिकामा सिंराइचुली, उपरदाङगढी, जलविरे झरना, इच्छाकामना मुख्य पर्यटकीय क्षेत्र हुन्।
जिल्लामा सौराहा मात्रै होइन, अन्य धेरै क्षेत्र पर्यटकीय दृष्टिले उत्तिकै महत्वपूर्ण छ भनेर प्रचार अभियान जरुरी रहेको संघका उपाध्यक्ष भोजराज कौडेलले बताए।
पर्यटनविज्ञ विश्वराज सुवेदीले चितवनमा धेरै पर्यटकीय सम्भावना भए पनि पूर्वाधार निर्माण र प्रचार हुन नसकेको बताए। उनले भने, 'अब सामूहिकरुपमा प्रवर्द्धनात्मक कार्यक्रम गर्नु जरुरी छ।'
चितवन पर्यटन विकास समितिका अध्यक्ष दिलीप मैनाली र चितवन होटल व्यवसायी संघका अध्यक्ष कमल शर्माले इच्छाकामना पर्यटनका लागि महत्वपूर्ण क्षेत्र भएको उल्लेख गर्दै यो अभियानमा आफूहरुले सहकार्य गर्ने बताए।
चितवनमा मुख्यगरी सौराहा, मेघौली, जगतपुर, पटिहानी, देवघाट, सिंराइचुली, उपरदाङगढी, कुमरोज, कंकाली, शक्तिखोर, जलविरे झरना, चित्राम झरना, सिन्ती झरनालगायत उत्कृष्ट पर्यटकीय गन्तव्य छन्। (रासस)
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
