काठमाडौं- इंग्लिस क्लब म्यानचेस्टर सिटीले पछिल्ला १८ खेल लगातार जितिरहेको छ। २५ खेलमा हेर्दा २२ खेल जितेको छ भने ३ खेल बराबरी खेलेको छ। यो पेप गार्डिओलाको प्रशिक्षणमा २०१७ को अप्रिल–डिसेम्बरको समयमा २८ खेलको अपराजित यात्राको नजिक देखिन्छ।
डिसेम्बर १६ मा वेस्टब्रुमसँग बराबरी खेलेपछि म्यानचेस्टर सिटीले सबै खेल जितिरहेको हो। त्यसअघि टोटनह्यामसँग २–० ले हार्दा, लिभरपुलसँग १–१ को बराबरी हुँदा र लेस्टर सिटीसँग ५-२ ले हार्दा म्यानचेस्टर सिटीको यो सिजनमा बिग्रिएको लयमा प्रश्न उठिरहेको थियो। अहिलेसम्म आइपुग्दा पनि सिटी लिग विजेताको बाटोमा बलियो देखिन्छ।
यसैले त प्रशिक्षक गार्डिओला अहिले आफ्नै टिमको जितको यात्राले आश्चर्यचकित भएको बताइरहेका छन्। कोभिडपछिको समयमा चोटमा बढेको संख्या र ठूला टिमहरुले भोग्नुपरेको अप्ठ्यारोबीच सिटीको लगातारको जितमा अचम्मित भएको आर्सनलसँगको खेलपछि गार्डिओलाले बताएका हुन्।
‘म अहिलेको अवस्थाले अचम्मित र प्रभावित छु। विश्व फुटबलमा सबै टिमहरु कठीन अवस्थामा बढिरहँदा, सबै टिमले लिगमा अंक गुमाइरहँदा हामी पनि एउटै लयमा बढ्न सकिरहेका छौँ, त्यो पनि गएको दुई महिनादेखि। मैले यस्तो होला भन्ने सोचेको थिइनँ। मान्छेहरु जित र कीर्तिमानमा रहेर कुरा गर्छन् तर यसरी यस्ता खेलहरु जितिरहन सहज हुने कुरा होइन’ गार्डिओलाले भनेका छन्।
लिगमा अब १३ खेल बाँकी रहँदा म्यानचेस्टर सिटी १० अंकले अघि छ। सिटीको २५ खेलमा ५९ अंक रहेको छ। दोस्रोमा रहेको म्यानचेस्टर युनाइटेडको २५ खेलमा ४९ अंक छ। उति नै खेलमा लेस्टरको ४९ र वेस्ट ह्यामको ४५ अंक छ। सुरुवातमा लिग प्रतिस्पर्धामा हेरिएका चेल्सीको ४३ र लिभरपुलको ४० अंक रहेको छ।
म्यानचेस्टर सिटीमा प्रशिक्षक पेप गार्डिओलाको शैली र खेलाडीको उच्च मनोबलले लिगमा पछिल्ला खेलहरु लगातार जित्न सकिरहेको हो।
म्यानचेस्टर सिटी अहिलेको जितको निरन्तरतामा विश्वस्त पनि देखिन्छ। आइतबार राति आर्सनलविरुद्ध खेलको दोस्रो मिनेटमा नै रहिम स्टर्लिङको गोलमा बनाएको अग्रता सिटीले अन्तिमसम्म कायम राख्न सक्यो। ५५ प्रतिशत समय बलमा नियन्त्रण बनाएको सिटीले गरेका १५ प्रहारमा ३ प्रहार पोस्टमा थिए।
म्यानचेस्टर सिटीका लागि जितको निरन्तरता मात्रै होइन गोलमा बढ्ने संख्यामा पनि राम्रो भइरहेको देखिन्छ। २५ खेलमा सिटीले ५० गोल गरेको छ भने १५ गोल खाएको छ। गोलमा ३५ को यो भिन्नता अरु टिमको भन्दा निकै राम्रो देखिन्छ।
म्यानचेस्टर सिटीमा प्रशिक्षक पेप गार्डिओलाको शैली र खेलाडीको उच्च मनोबलले लिगमा पछिल्ला खेलहरु लगातार जित्न सकिरहेको हो। गएको सिजनको अवस्थाबाट यो सिजनमा सिटीमा धेरै कुरामा परिवर्तन देखिएको छ। सिटीले पहिले जस्तो ‘हाइ प्रेस’मा खेलिरहेको छैन। खेलमा नियन्त्रण बनाउन त्यसले सहयोग पुगिरहेको छ।
म्यानचेस्टर सिटीमा रहिम स्टर्लिङ, बर्नार्डो सिल्भा, रियाद महरेज मिडफिल्डमा इल्के गुन्डोइवान, केभिन डे ब्रइन साथै डिफेन्समा रुबेन डायस, जोन स्टोन्स जस्ता खेलाडीहरु सिटीमा एकै लयमा देखिइरहेका छन्। अरु टिमको तुलनामा सिटीमा अतिरिक्त खेलाडीका नामसमेत मैदानमा प्रभावकारी हुने नै छन्। भर्खरै चोटबाट फर्किएका सर्जियो अग्युरोदेखि गाब्रियल जिसस हुँदै फिल फोडेनसम्मका खेलाडी आर्सनलविरुद्ध सुरुवाती टिममा थिएनन्।
गएको सिजन स्पेनिस क्लब बार्सिलोनाबाट कप्तान लियोनल मेस्सीले छाड्ने बताएसँगै उनलाई लैजान सबैभन्दा अघि म्यानचेस्टर सिटी नै देखिएको थियो। यही टिममा मेस्सी जस्ता खेलाडी मिसाउँदा सिटीको दबदबा अझ कस्तो होला भन्ने कल्पना फुटबल समर्थक गरिरहेका छन्। अहिले नै प्रिमियर लिगमा देखिएको उपाधिको बलियो यात्रामा च्याम्पियन्स लिगमा उस्तै निरन्तरता सिटीमा चिन्ताको विषय छ।
म्यानचेस्टर सिटीले च्याम्पियन्स लिग अन्तिम १६ को पहिलो लेग अन्तर्गत खेलमा बुधबार राति पौने २ बजे जर्मन क्लब बोरुसिया मोन्चेनग्लादबाखसँग खेल्दैछ। च्याम्पियन्स लिग समूह चरणमा ‘समूह सी’ को शीर्षमा रहँदै अघि बढेको सिटीले पाँच खेल जितेको थियो भने एक खेल बराबरी खेलेको थियो। जहाँ सिटीले १३ गोल गरेको थियो भने एक गोल मात्र खाएको थियो।
प्रिमियर लिगमा पछिल्लो समय देखिएको स्तर च्याम्पियन्स लिगमा निरन्तर गर्न सके म्यानचेस्टर सिटी युरोपमा आफ्नो फरक क्षमता देखाउन सक्षम हुने नै छ। हुन पनि प्रिमियर लिगको यो सिजन अंक तालिकाको शीर्षमा विभिन्न नौ टिम यताउता भए। जहाँ सिटीले अहिले अंक दुरी भेटाउन मुस्किल हुने गरी बढाइरहेको छ।
टोटनह्यामसँग २–० ले हारेको खेलसम्म म्यानचेस्टर सिटीले ८ खेलमा ११ गोल खाइसकेको थियो। जहाँ गरेको गोल संख्या १० मात्र थियो। त्यस्तो गोल संख्याको अवस्थापछि गार्डिओलाले सेन्टर डिफेन्समा परिवर्तन गरे। जोन स्टोन्ससँगको सहकार्यका लागि एमेरिक लापोर्तेको स्थानमा रुबेन डाएस आएदेखि सिटी डिफेन्स बलियो देखिएको छ।
मिडफिल्डर इल्के गुन्डोइवानले गोलमा बढाइरहेको संख्या पनि सिटीका लागि सुधारको संकेतका रुपमा बढिरहेको छ। धेरैले गुन्डोइवानलाई सुस्त खेल र धेरै समय बलमा नियन्त्रण बनाउने शैली बेमेल गरेको रुपमा आरोप लगाइरहेका हुन्थे। तर अहिले सिटीको अट्याकमा गुन्डोइवानको प्रयोग सफल भइरहेको छ। लिगमा नै उनले ११ गोल गरिसकेका छन्।
यो सबै परिस्थिति हेर्दा गार्डिओलाको प्रशिक्षणमा म्यानचेस्टर सिटीको समय थप स्वर्णीम बन्ने संकेत देखिएको छ। प्रिमियर लिगमा देखिएको उल्लास च्याम्पियन्स लिगका आउँदा खेलमा पनि देखिए युरोपियन प्रतिस्पर्धामा सिटीलाई अघि बढाउन नसकेको आरोप खेपिरहेका गार्डिओलाले त्यसबाट मुक्ति पाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766824868.png)
-1764146706.png)
-1763721444.png)
-1766648928.png)
