भैरहवा– पश्चिमाञ्चल क्षेत्रीय राजश्व अनुसन्धान कार्यालयले भन्सार छली गरेको आशंकामा दुई वटा ट्रक नियन्त्रणमा लिएको छ।
भन्सार पास भएर काठमाडौं जाँदै गरेका ना७ख ९३२८ र ना५ख ७३८३ नम्बरका ट्रकमा दुई वटा एक्जाभेटर र दुई वटा ह्यामर (ब्रेकर) लोड गरिएका थिए। भारतबाट आयात गरिएका यी सामान आइतबार साँझ भैरहवाबाट काठमाडौं लैजाँदै गर्दा गोप्य सूचनाका आधारमा नवलपरासीको दाउन्नेबाट नियन्त्रणमा लिई थप अनुसन्धानका लागि क्षेत्रीय कार्यालय बुटवल ल्याइएको पश्चिमाञ्चल क्षेत्रीय राजश्व अनुन्धान कार्यालय बुटवलका प्रमुख अनुसन्धान अधिकृत नरेन्द्रराज पाण्डेले बताए।
पाण्डेका अनुसार, दुई वटा एक्जाभेटरको प्रज्ञापनपत्र भए पनि दुई वटा ह्यामरको भने प्रज्ञापनपत्र छैन। ह्यामरको भ्याट बिल मात्रै काटिएको छ। एकचोटि भन्सार पास गरिएको सामानमा एउटाको प्रज्ञापन हुनु र अर्कोको प्रज्ञापन नहुनु शंकास्पद रहेको बताइएको छ।
स्रोतका अनुसार, भन्सार कर्मचारी र भन्सार एजेन्टको मिलेमतोमा उक्त ह्यामर भन्सार छली गरी ल्याइएको हो। एउटा ह्यामरको भन्सार मूल्य १७ लाखभन्दा बढी छ। यसरी दुई ह्यामरको मूल्य ३४ लाख हुन आउँछ। ट्रकमा लोड गरिएका ह्यामर बतास प्रालि गैरीधारा काठमाडौंको भ्याट नम्बर ३०४००६८७७ बाट बैसाख २४ गतेको मितिमा काटिएको छ। सिरियल नम्बर नभएको र फोटोकपी गरिएकोे उक्त भ्याट बिल नक्कली समेत हुनसक्ने आशंका समेत उब्जिएको छ।
भ्याट बिलमा एउटा ह्यामर कार्की रोड्स ढुंगा उद्योग प्रालि बनेपाका नाममा काटिएको छ भने अर्को ह्यामरको भ्याट बिल हङपाङ निर्माण सेवा प्रालि अत्तेरिया त्रिवेणीको नाममा काटिएको छ। बतास कम्पनीले ह्यामर १३ प्रतिशत भ्याटसहित २० लाखमा बिक्री गरेको देखाएको छ। पूर्व र पश्चिमका दुई वटा कम्पनीका नाममा भ्याट बिल काटेर सामान काठमाडौंतिर लैजानुले भन्सार छलीसँगै नक्कली भ्याट बिल प्रयोग गरिएको हुनसक्ने राजश्व कार्यालयले जनाएको छ।
स्रोतका अनुसार खरिदार कम्पनी कार्की रोड्स ढुंगा उद्योग प्रालि र हङपाङ निर्माण सेवा प्रालिले बैशाख २४ गते नै बतास कम्पनीबाट एक÷एक ओटा ह्यामर खरिद गरेका थिए। तर विक्रेता कम्पनीले तिनै भ्याट बिललाई फोटोकपी गरी आइतबार भन्सार छलेर ल्याइएका ह्यामरको बिल भनी प्रयोग गरेका थिए। कम्पनीले उक्त ह्यामर स्टक रहेकाले भ्याट बिल काटेर लैजान लागिएको दाबी गरेको छ।
भन्सार पास भएका दुई वटा एक्जाभेटरको प्रज्ञापनपत्रमा हस्ताक्षर गर्ने भन्सार अधिकृतको नाम गोप्य राखिएको छ। एजेन्टको तर्फबाट भने मधुप्रसाद पन्थीको हस्ताक्षर छ। एजेन्ट पन्थीले लामो समयदेखि बतास प्रालिको मालसामान भन्सार पास गराउँदै आएका छन्। उनले उक्त कम्पनीको भैरहवा क्षेत्रको व्यवस्थापन समेत गर्दै आएका छन्। प्रज्ञापनपत्रबिना सामान भन्सार पास गराउन एजेन्ट पन्थीलाई भैरहवाका मुक्तर अली पठानले सहयोगीको रुपमा सघाउँदै आएका छन्।
पठानले बतास कम्पनीको सामान लोड/अनलोड र सम्बन्धित ठाउँमा पुर्याउन सहयोग समेत गर्दै आएका छन्। बतास कम्पनीका सञ्चालक देवेन्द्र श्रेष्ठले भन्सारमा सेटिङ मिलाई एजेन्ट पन्थी र पठान मार्फत काम गर्दै आएको स्रोतको भनाइ छ। एक कर्मचारीका अनुसार, उनीहरुले लामो समयदेखि ह्यामरको भन्सार छली गर्दै आएका छन्।
ह्यामर आयात प्रक्रियाबारे बुझ्दा सञ्चालक श्रेष्ठ र भन्सार एजेन्ट पन्थी र उनका सहयोगी पठानबीचको कुरा बाझिएको छ। श्रेष्ठले ह्यामर पुरानो खरिद गरेको, भन्सारले लिलामी निकालेर खरिद गरेको र स्टक भएकाले भ्याट बिल काटेर काठमाडौं ल्याउन लागेको जस्ता प्रत्येक पटक फरक प्रतिक्रिया दिए। एजेन्ट पन्थीले भने पहिले नै आयात भएको भन्दै स्टक भएको दाबी गरे। भैरहवा भन्सार कार्यालयले भने ह्यामरको लिलामी ननिकालेको बताएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
-1736477475.jpg)
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
