काठमाडौं- ओस्कारको ९३ औं संस्करण आउने महिनाको मार्च १५ मा हुँदैछ। विश्वका चलचित्र प्रेमीका आँखा कुन फिल्मले कति विधामा यो अवार्ड जित्ने हुन् भन्नेमा अडिएको छ।
यही सिलसिलामा लघु चलचित्र र डकुमेन्ट्रिमध्ये टप टेनमा भारतीय लघु चलचित्र बिट्टु पनि परेको छ ।
हुन त, ओस्करको लडाइँबाट साउथ इन्डियन मलालियम फिल्म जालीकट्टु पनि ओस्कर नोमिनेसनमा परेको थियो। तर यो अहिले बाहिरिसकेको छ। अर्को साउथ फिल्म (जुन बायोपिक विधामा बनेको छ) सुराराइ पोट अहिले नोमिनेसनमा भिडिरहेको छ।
तर भारतीयहरुको आँखा भने बिट्टुमा परेको छ। बिट्टुले लघु चलचित्रको विधामा ओस्कार जित्नेमा ढुक्क छन् उनिहरू।
कस्तो छ त बिट्टु?
काँटोमे पडा फूल उठाउँ मे कैसे
पब्लिकमे खडि लड्की पटाउँ मे कैसे
केही युवाहरुलाई जम्मा पारेर बिट्टुले कविता सुनाइरहेको दृश्यबाट फिल्म सुरु हुन्छ। पैसा दिँदै बिट्टु र उनकी साथी चाँदलाई कविता र गीत गाउन हौस्याएको दृश्यसँगै चाँद र बिट्टुको दोस्ती देखाइन्छ।
यी दुईबीच बोलचाल बन्द हुन र फेरि मिलाप हुन समय लाग्दैन। पैसाको भागबन्डा नमिल्दा चाँद ठुस्किएर बिट्टुसँग बोल्दिनन्, बिट्टुले फकाउनका लागि यदि नबोले आफू गुडिरहेको गाढाबाट हाम फाल्ने कसम खान्छिन्। यस दृश्यले यी दुईबीचको गाढा सम्बन्ध प्रस्ट्याउँछ।
एकदिन बिट्टुको सानो पहाडी गाउँमा घटना घट्छ। शिक्षकले विद्यार्थीलाई अंग्रेजीमा बोल्न भन्छन्। तर बिट्टुले शिक्षकलाई तपाईं चाहीँ किन हिन्दीमा बोलेको त भन्ने प्रश्न गर्छिन्। बिट्टुको प्रश्नले शिक्षक झन् रिसाउँछन् र अंग्रेजीमा मात्रै बोल्न भन्छन्। सानी बिट्टुले- सर सुसु ब्रेकभन्दा कक्षाका सबै साथीहरु हाँस्छन्।
हाँस्ने भीडमा चाँद पनि हुन्छे। यसले बिट्टु चाँदसँग रिसाउँछिन्। अनि कक्षाबाट ठुस्किएर बाहिर निस्कन्छिन्।
अर्को दृश्यमा बिट्टुकी आमा समेत रहेकी स्कुलकी भान्से महिलाले स्कुलकी प्रिन्सिपललाई खाजा पकाउने तेलबाट गन्ध आउन थालेको बताउँछिन्। तर प्रिन्सिपलले तेलमा अलिअलि गन्ध आउनु सामान्य भएको भन्दै त्यहि तेलमा साना विद्यार्थीका लागि खाजा तयार पार्न अह्राउँछिन्।
खाजा पकाउने क्रममा बिट्टु पनि आमालाई सहयोग गर्न भान्छामा छिर्छिन् ।
बिट्टुलाई शिक्षकले माफी माग‚ नत्र खाजा खान पाउँदैनौ भन्छन्। बिट्टु कुनै पनि हालतमा माफी माग्न सहमत हुन्नन्। खाजा खाने समयमा चाँदले निकै बोलाउँदा पनि बिट्टु बोल्दिनन्। उल्टै रिसाएर हिँड्छिन्।
बिट्टु आमाले दिएको बीस रुपैयाँ बोकेर मेला लागेका ठाउँमा पुग्छिन् र त्यहाँको खानेकुरा किनेर खान्छिन्। त्यहि समयमा स्कुलकी प्रिन्सिपल दौडिँदै आउँछिन्।
प्रिन्सपलको छोराको सानो गल्तिका कारण तेलमा विषादी परेको हुन्छ। त्यही खाएर स्कुलका सबै बिद्यार्थी ढल्छन्। बिट्टु चाँदको नाम पुकार्दै आउँछिन्, चाँद पनि त्यही ढलिरहेका विद्यार्थीको बीचमा फेला पर्छिन्‚ त्यो पन मृत अवस्थामा।
यहीँबाट कथा सकिन्छ। सन् २०१३ मा भारतको एक पहाडी इलाकामा घटेको सत्य कथामा आधारित लघु चलचित्र हो बिट्टु। निकै कम बजेटमा तयार पारिएको बिट्टुको निर्देशन करिष्मा देव दुवेले गरेकी हुन्। फिल्म करिब १६ मिनेटको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778914053.png)
-1764146706.png)
-1775812183.jpg)
-1779545841.jpg)
