काठमाडौं– इंग्लिस प्रिमियर लिगमा विजेता लिभरपुलले यो सिजन २४ खेल खेल्दा ६ खेल हारेको छ। जुन यसअघिका दुवै सिजनमा भएको हारभन्दा बढी हो। लिगमा लामो बाटो अझै बाँकी रहेपनि ढलमलाएको लिभरपुलमा मैदानको अवस्थाले चिन्ता गर्नुपर्ने विषय थपिइरहेका छन्।
गएको सिजन ३० वर्षपछि प्रिमियर लिग उपाधि जित्दा लिभरपुलको ९९ अंक थियो। जहाँ ३ खेल हारेको लिभरपुल दोस्रोमा रहेको म्यानचेस्टर सिटीभन्दा १८ अंकले अघि थियो। त्यसअघि २०१८–१९ को सिजन म्यानचेस्टर सिटीले ९८ अंकसहित लिग जितेको थियो। जहाँ दोस्रोमा रहेको लिभरपुलको ९७ अंक थियो। त्यो सिजन लिभरपुल एक खेलमा मात्र पराजित भएको थियो।
प्रिमियर लिगमा पछिल्लो तीन खेलमा ब्राइटनसँग १–०, म्यानचेस्टर सिटीसँग ४–१ र लेस्टर सिटीसँग ३–१ ले पराजित हुँदा पहिले जस्तो लिभरपुलको डिफेन्समाथि मात्र प्रश्न छैन। लेस्टरसँगकै खेलमा ६७औँ मिनेटमा सलाहको गोलमार्फत बनाएको अग्रता जोगाउन नसक्नु तालमेलको कमि थियो। जसले आठ मिनेटमा तीन गोल खान पुग्यो।
२०१९–२० को सिजनमा लिभरपुलले ३३ गोल खाएको थियो। यो सिजन २४ खेलमा नै ३२ गोल खाइसकेको छ। पछिल्ला दुई खेलमा नै लिभरपुलले ७ गोल खायो। चोटले सताइएको टिम भएपनि यो संख्या विजेता लिभपुलका लागि सुहाउँदो होइन। यसैले पछिल्लो अवस्थापछि प्रशिक्षक योर्गेन क्लोपले यो सिजन लिभरपुलको उपाधि भिडन्त सकिएको बताएका छन्।
गएको सिजन ३० वर्षपछि प्रिमियर लिग उपाधि जित्दा र त्यसअघिको सिजन च्याम्पियन्स लिग उपाधि जित्दा प्रशिक्षक क्लोपले टिममा लगातार खुसी फर्काएका थिए। जुन उनी प्रशिक्षकका रुपमा लिभरपुल आउँदाको योजना सफल भएको प्रमाण थिए।
सन् २०१५ को अक्टोबर ८ मा लिभरपुलको प्रशिक्षक नियुक्त हुँदा क्लोपले भनेका थिए, ‘हामीले शंका गर्नेहरुलाई विश्वास गर्न सक्ने बनाउनुछ।’ नभन्दै क्लोप र उनको प्रशिक्षणमा रहेको लिभरपुलले लगातार दुई सिजनको अवस्थाले शंकालाई विश्वासमा बदलेको नै थियो। अहिलेको अवस्थामा भने त्यो आश पूरा भइरहेको छैन।
सन् १८९२ देखि १९९२ सम्म इंग्ल्यान्डको माथिल्लो डिभिजनलाई ‘फुटबल लिग फस्ट डिभिजन’ का नामले चिनिन्थ्यो। जसमा १९००–०१ मा लिभरपुलले पहिलो उपाधि जितेको थियो। त्यसपछि १९०५–०६, १९२१–२२, १९२२–२३ लिग जित्यो। १९३९ देखि दोस्रो विश्वयुद्धका कारण रोकिएको लिग १९४६–४७ को सिजनमा हुँदा उपाधि लिभरपुलले नै जितेको थियो।
त्यसपछि भने लिभरपुलले उपाधि जित्न १७ वर्ष पर्खनुपर्यो। १९६३–६४ को सिजनमा र त्यसपछि १९६५–६६, १९७२–७३ मा उपाधि जितेको लिभरपुलले त्यसपछिको लामो समय एकछत्र राज गरेजस्तो भयो। १९७५–७६, १९७६–७७, १९७८–७९, १९७९–८०, १९८१–८२, १९८२–८३, १९८३–८४, १९८५–८६, १९८७–८८ हुँदै १९८९–९० मा लिभरपुलले १८ पटक उपाधि जितिसकेको थियो।
यो सिजनको सुरुवाती खेलमा लिभरपुलले आफ्नो उपाधि रक्षा गर्ने लक्षण देखाएको थियो। अहिले शीर्षमा रहेको म्यानचेस्टर सिटी लेस्टरसँग ५–२ ले हारेको खेलपछि त धेरैले लिभरपुलको बाटो खुला भएको विश्लेषण सुरु गरिसकेका थिए। तर अवस्था उस्तै रहेन। सिटीमा सुधारको संकेत मैदानमा देखिँदै गयो, जहाँ लिभरपुलमा कठिन समय थपियो।
लिभरपुल अहिले लेस्टर सिटी र म्यानचेस्टर युनाइटेडभन्दा पछि छ। लेस्टरको २४ खेलमा ४६ अंक छ भने म्यानचेस्टर युनाइटेडको २४ खेलमा ४६ अंक नै छ। लिभरपुलको २४ खेलमा ४० अंक छ। शीर्षमा रहेको म्यानचेस्टर सिटीको २३ खेलमा ५३ अंक छ। लिभरपुलभन्दा तल रहेका चेल्सी र वेस्टहामको २३ खेलमा समान ३९ अंक छ।
लेस्टरसँगको खेलअघिसम्म उपाधि जित्ने प्रश्नमा प्रशिक्षक क्लोप आफूहरुको सम्भावना अझै रहेको र हरेक खेलमा विचार गर्दै जाने बताइरहेका थिए। तर लेस्टरसँगको हारपछि भने उनले उपाधिमाथिको आश छाडेको प्रतिक्रिया दिए। पछिल्ला खेलहरुमा संषर्घ गरिरहेको लिभरपुलका लागि आत्मबल कमजोर हुने अवस्था लेस्टरको खेलपछि नै आइपरिदियो।
अहिले शीर्षमा रहेको म्यानचेस्टर सिटी लेस्टरसँग ५–२ ले हारेको खेलपछि त धेरैले लिभरपुलको बाटो खुला भएको विश्लेषण सुरु गरिसकेका थिए। तर अवस्था उस्तै रहेन। सिटीमा सुधारको संकेत मैदानमा देखिँदै गयो, जहाँ लिभरपुलमा कठिन समय थपियो।
कोरोना माहामारीका कारण टिमहरुले सिजनअघिको तयारी राम्ररी गर्न पाएनन्। लगातार धेरै खेल खेल्नुपर्दा चोटको समस्या पनि बढिरहेको छ। त्यसैको ठूलो मारमा लिभरपुल पनि परिरहेको देखिन्छ। इभर्टनसँगको खेलमा घाइते हुन पुगेका डिफेन्डर भर्जिल भ्यान डाइकले त्यसअघि दुई सिजनदेखि प्रिमियर लिगमा सबैजसो खेल खेलिरहेका थिए। जसले आवश्यक आरामको समय समेत रहेन।
विजेता टिममा वैकल्किप खेलाडीको कमि हुनु राम्रो विषय होइन। लिभरपुलको डिफेन्समा देखिएको समस्यामा विकल्प को भन्ने उत्तर मिलिसकेको छैन। सेन्टर ब्याकमा जोर्डन हेन्डरसन र फाबिन्होलाई प्रयोग गरिरहँदा मिडफिल्डमा पासको शैली पनि बिग्रिएको छ। त्यसको असर लिभरपुलले खेल्ने ‘प्रेसिङ’ फुटबलमा पनि परेको छ।
क्लोप प्रशिक्षकका आउँदा सुरुमा लिभरपुल ४–२–३–१ को फर्मेसनमा धेरै खेलिरहेको हुन्थ्यो। जसमा उनको विशेष ‘काउन्टर प्रेस’मा खेलाडीले ध्यान दिन्थे। २०१८–१९ को सिजनमा ४–३–३ को शैलीमा पनि लिभरपुलले राम्रो नै गरेको हो। जसमा बलमाथिको नियन्त्रणको समयमा अझ सुधार भएको देखिन्थ्यो। अहिले भने खेलका दौरान मिडफिल्डमा खेलाडी संख्या बढाएर अटयकमा बढ्ने शैलीमा राम्ररी काम हुन सकिरहेको देखिँदैन।
योर्गेन क्लोपले नै यो सिजन लिभरपुलले उपाधि जित्ने आश मारेको देखिँदा म्यानचेस्टर सिटीका प्रशिक्षक पेप गार्डिओलाले भने लिभरपुलले अझै आफूहरुलाई भेट्न सक्ने बताएका छन्। शनिबार राति टोटनह्यामलाई ३–० ले हराएको खेलपछि प्रशिक्षक गार्डिओलाले भनेका छन्– ‘लिभरपुलले लेस्टरसँग खेलेको खेल हेर्दा उनीहरु अझै माथि आउन सक्ने देखिन्छ नै। यो त्यही नै लिभरपुल हो जसलाई हामीले गएको सिजन भेटेका थियौँ। उनीहरुको खेल स्तर अझ उस्तै नै छ, बक्समा गोलमा देखिने प्रहार मात्र कमी आएको हो।’
हुन त गार्डिओलाको यो भनाइमा आधारहरु भन्दा लिभरपुल र क्लोपप्रतिको उनको सम्मान बढी देखिन्छ। होइन भने लिभरपुलले उपाधिमा प्रतिस्पर्धा दिन सक्ने आधार कमजोर भइरहेको छ। क्रिसमसको समयमा खेल रोकिनुअघिसम्म शीर्ष स्थानमा रहेको लिभरपुलले त्यसपछि १० खेलमा दुई खेल मात्र जितेको छ। जसमा पाँच खेल हारेको छ भने तीन खेल बराबरी खेलेको छ।
अहिलेकै समयलाई हेर्दा बिबिसीका फुटबल लेखक फिल म्याकनल्टी लिभरपुलका लागि अब शीर्ष चारमा पर्ने संघर्ष भइरहने विश्लेषण गर्छन्। उपाधि विजेताको छवि बनाएको लिभरपुलका लागि शीर्ष चारभित्र पर्ने संघर्ष सुखद पक्कै हुने छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
