दमक- सरकारी स्वीकृतबिनाका भारतीय पाठ्यपुस्तक पठनपाठन गराएको भन्दै झापा दमकको एक विद्यालयसँग स्पष्टीकरण मागिएको छ।
दमक–६ स्थित सूर्योदय अंग्रेजी बोर्डिङ स्कुलले आफूखुसी भारतीय पाठ्यपुस्तक पठनपाठन गराएको भन्दै नगरपालिकाको शिक्षा समितिले सो विद्यालयलाई कारबाहीको प्रक्रिया अगाडि बढाएको हो। नेपाली राष्ट्रियतामाथि आँच पुग्नेगरी भारतीय पाठ्यपुस्तक पठनपाठन गराउँदै आएको गुनासो आएपछि समितिले आज विद्यालयको अनुगमन गरेको थियो। अनुगमनपछि समितिले विद्यालयलाई २४ घन्टे स्पष्टीकरण सोधेको शिक्षा अधिकृत शालिग्राम काफ्लेले जानकारी दिए।
विद्यालयले १ देखि कक्षा १० सम्म अधिकांश भारतीय पब्लिकेशनका पुस्तक पढाउँदै आएको छ। विद्यालयले आफूले पढाउने पुस्तकको विषयमा शिक्षा कार्यालयमा जानकारी गराउनुपर्ने भए पनि हालसम्म त्यसो नगरेको काफ्लेले बताए।
तोकिएको समयभित्रमा स्पष्टीकरण चित्तबुझ्दो नदिए विद्यालय बन्द गर्नेसम्मको कारबाही हुनसक्ने जानकारी दिँदै शिक्षा अधिकृत काफ्ले उक्त विद्यालयले आधारभूत तहमा भारतको दिल्लीस्थित इडुहेरल्स पब्लिकेशनका ‘इङ्लिस कन्भरसेसन’का पुस्तकमा राष्ट्रियतामाथि नै आँच आउने किसिमका शैक्षिक सामग्री फेला परेको उल्लेख गरे।
त्यस पुस्तकमा भारतको झण्डा, आफ्नो जन्मभूमि भारत हो, हाम्रो राष्ट्रिय झण्डा जस्ता पाठ्यसामग्री समावेश गरिएको पाइएको जानकारी दिंदै उनले भने, 'स्वीकृतबिनाका पाठ्यपुस्तक पढाएको स्कुल प्रशासनले स्वीकार गरेको र त्यस्ता पुस्तक आजदेखि हटाउने प्रतिबद्धता जनाएको छ।'
अनुगमनमा नगरपालिकाकी उपप्रमुख गीता अधिकारीसहितका शिक्षा समितिको एक टोली खटिएको थियो।
दमक नगरभित्र २१ वटा सामुदायिक र ५९ वटा संस्थागत विद्यालय छन्। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
