रसुवा– नेपाल र चीनबीच सञ्चालनमा रहेको एक मात्र व्यापारिक नाका रसुवागढी जोड्ने सडक भासिएको छ। गोसाइकुण्ड गाउँपालिका ५ स्थित स्याफ्रुबेंसीमा आइतबार दिउँसो सडक भासिएको हो।
मल्टी इनर्जी डेभलपमेन्ट प्रालिले निर्माण गरिरहेको २० मेगावाटको लाङटाङ खोला जलविद्युत् आयोजना निर्माणस्थलमा सडक खन्ने क्रममा सडक भासिएको छ।
जलविद्युत् आयोजना निर्माण गर्दा डिभिजन सडक कार्यालय नुवाकोटसँग समन्वय नभएको डिभिजन प्रमुख निरज शाक्यले बताए। उनले भने, ‘पहिरोले सडक भासिएर तलतिर पु¥याएको छ। सडक अवरुद्ध भएपछि डेढ सयभन्दा बढी गाडी र कन्टेनर बीच बाटोमै रोकिएका छन्।’
सडक सञ्चालनका लागि सडक मर्मत तथा निर्माणको काम अघि बढाइएको उनले बताए। रसुवागढी नाका जोड्ने धुन्चे–स्याफ्रुबेंसी–टिमुरे सडकखण्ड अन्तर्गत स्याफ्रुबेंसीमा सुख्खा पहिरो गएको चिलिमे जलविद्युत् आयोजनाका गोकर्णबहादुर न्यौपानेले बताए। उनले भने, ‘आइतबार दिउँसो पहिरो गएको हो, अहिले सडक खुलाउने प्रयास भइरहेको छ।’ उनका अनुसार अहिले साना गाडीहरु आवतजावत गर्नेगरी सडक खुलाइए पनि ठूला गाडी र कन्टेनरहरु भने आवतजावत गर्नसक्ने अवस्था छैन।
पहिरोले अवरुद्ध भएको सडक खुलाउने प्रयास भइरहेको प्रहरी नायव उपरीक्षक शरतकुमार थापा क्षेत्रीले जानकारी दिएका छन्। उनले भने, ‘सडक खुलाउन स्काभेटर ल्याएर काम सुरु भएको छ।’
२०७१ सालदेखि औपचारिक रुपमा सञ्चालनमा आएको रसुवागढी नाकामा दैनिक २ सय ५० भन्दा बढी सवारी साधन आवतजावत गर्छन्। चीनले अन्तर्राष्ट्रिय नाकाका रुपमा घोषणा गरेसँगै सीमामा व्यापारी, व्यावसायी र सवारीको चाप बढ्दै गएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770979298.jpg)
-1764146706.png)
-1770562345.jpg)
