काठमाडौं- कोटेश्वरको जाम हटाउन सुरुङ निर्माण गर्ने विषय निष्कर्ष नजिक पुगेको छ। कोटेश्वर चोकमा हुने जाम क म गर्न सरकारले विभिन्न विकल्पबारे छलफल गर्दै आएको छ।
जापान अन्तर्राष्ट्रिय सहयोग नियोग (जाइका)ले कोटेश्वरमा हुने जाम घटाउन तीनवटा विकल्पसहितको प्रारम्भिक प्रतिवेदन सरकारलाई दिएको थियो। विभिन्न मोडालिटीको छलफलपछि सुरुङ निर्माण नै उपयुक्त विकल्पको रुपमा देखिएको सडक विभाग अन्तर्गतको विकास सहायता कार्यान्वयन महाशाखा प्रमुख अर्जुनजंग थापाले बताए।
‘कोटेश्वरमा सडक विस्तार गर्न समेत सम्भव नभएको र फ्लाइ ओभर निर्माण सुरक्षाका दृष्टीले जोखिमपूर्ण रहेको देखिएको छ,’ थापाले भने, ‘अन्तर्राष्ट्रिय विमानस्थल भएकाले क्षेत्रमा जुनसुकै संरचना निर्माण गर्न पनि नागरिक उड्डयन प्राधिकरणसँग समन्वय गर्नुपर्ने हुन्छ।’
पछिल्लो छलफलमा सुरुङ निर्माणका लागि प्राधिकरण करिब सहमत भएको उनले बताए। सरकारले काठमाडौंका मुख्य चोकमा ट्राफिक सुधारका लागि अध्ययन गरी संरचना निर्माणका लागि जाइकालाई आग्रह गरेको थियो। त्यही आग्रह अनुसार नेपाल आएको जाइकाको टोलीले कोटेश्वरमा सुरुङमार्ग, फ्लाइओभर निर्माणसहित तीनवटा विकल्प दिएको थियो।
जाइकाले कोटेश्वरका लागि तीन विकल्पसहितको प्रारम्भिक प्रतिवेदन दिएको र तीमध्ये सुरुङ निर्माण उपयुक्त भएको निष्कर्ष नजिक पुगिएको महाशाखा प्रमुख थापाले बताए।
‘विभिन्न छ चरणमा जाइकासँग छलफल भएको छ। यही जनवरी अन्तिममा समेत छलफल तय भएको छ,’ उनले भने, ‘सुरुङ निर्माणका लागि प्राधिकरण तयार देखिएकाले अबको एक/डेढ महिनामा कुन विकल्प उपयुक्त हुन्छ भन्ने टुंगो लाग्ला।’
यस्तो थियो प्रारम्भिक अध्ययनको सुझाव
टोलीले प्रारम्भिक अध्ययन गरेर दिएको प्रतिवेदनमा पहिलो विकल्पका रुपमा भक्तपुरतिर जाने सडकको मुनी चक्रपथमा सुरुङमार्ग निर्माण गर्ने उल्लेख छ। बानेश्वर र तीनकुनेबाट सूर्यविनायक (भक्तपुर) जाने सडकलाई अहिलेकै अवस्थामा राखेर केही फराकिलो बनाउनु पर्ने भनिएको छ।
त्यसको मुनिबाट सोही रुट हुँदै बालकुमारीतिर निस्कने रिङरोडमा सुरुङमार्ग हुनेछ। ११ सय ४० मिटर लामो सुरुङमार्ग निर्माण गर्नुपर्ने प्रारम्भिक अध्ययनमा भनिएको छ।
आउन र जानका लागि दुईवटा सुरुङमार्ग निर्माण गरिनेछ। यो निर्माणका लागि करिब २४ अर्ब रूपैयाँ लाग्ने अनुमान गरिएको थियो। दोस्रो विकल्पका रुपमा तीनकुने हुँदै बालकुमारीतिर निस्कने सडकमा फ्लाइओभर बनाइने छ। रिङरोडमा करिब १३ सय २० मिटर लामो फ्लाइओभर निर्माण गर्नुपर्ने छ।
भक्तपुरतिर जाने सडकलाई अहिलेकै अवस्थामा राखेर फराकिलो बनाउनु पर्ने सुझाव दिइएको छ। यो विकल्पको निर्णण लागन अनुमान साढे ९ अर्ब रूपैयाँ गरिएको थियो।
तेस्रो विकल्पमा भक्तपुरतिर जाने सडकमा सुरुङमार्ग निर्माण गरिने उल्लेख छ। भक्तपुरतिर जाने सडकमा आउन र जानका लागि दुईवटा सुरुङमार्ग निर्माण गरिनेछ भने रिङरोडलाई अहिलेकै अवस्थामा संचालन गरिनेछ। सुरुङमार्ग १८ सय ६० मिटर लामो हुने जनाइएको छ।
तीन विकल्पमध्ये तेस्रो विकल्प सबैभन्दा महंगो हुने प्रारम्भिक प्रतिवेदनमा उललेख थियो। तेस्रो विकल्पको निर्माण लागत साढे २४ अर्ब रूपैयाँ अनुमान गरिएको छ।
त्रिभुवन अन्तराष्ट्रिय विमानस्थलको संवेदनशीलतालाई समेत ध्यानमा राख्दा तेस्रो विकल्प उचित हुने निष्कर्ष निकालिएको हो। बानेश्वर, कोटेश्वर, माइतीघर लगायतका स्थानको चोकहरुमा ट्राफिक सुधार गर्न के गर्न सकिन्छ भनेर विकल्पसहितको अध्ययन गरिएको थियो।
जसमा कोटेश्वर चोकललाई सरकारले पहिलो प्राथमिकतामा राखेको छ। केही समय अघिसम्म सबैभन्दा बढी जाम हुने चोकको सूचीमा कलंकी चोक अग्रस्थानमा थियो। अण्डरपास बनेसँगै कलंकी चोकमा अहिले जाममा बस्नुपर्ने बाध्यता घटेको छ।
विगतको कलंकी अहिले कोटेश्वर बनेको छ। कोटेश्वकरको सडक चौडा हुँदा पनि जाम घट्नुको साटो बढिरहेको छ। वीपी राजमार्ग सञ्चालनमा आएसँगै काठमाडौंबाट बाहिरिने सवारी साधनको संख्या उल्लेख्य वृद्धि भएकाले जाम बढाएको हो।
आर्थिक वर्ष २०७५/७६ को बजेटमा कोटेश्वरमा अन्डरपास निर्माण गर्ने उल्लेख थियो। २०७६/७७ को बजेटमा समेत त्रिभुवन अन्तर्राष्ट्रिय विमानस्थलको स्तरोन्नति गरेर अन्डरपास बनाइने भनिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
