काठमाडौं–नेपाल र इजरायलबीच आज बिहीबार इप्लिमेन्टेशन प्रोटोकलमा हस्ताक्षर हुँदैछ। प्रोटोकलमा बिहान ११ बजे हस्ताक्षर हुने विभागका महानिर्देशक कुमार दाहालले जानकारी दिए।
नेपाल र इजरायलबीच गत असोजमा इजरायलको विशिष्ट श्रम बजारमा नेपाली कामदार लैजानेसम्बन्धी सम्झौता भएको थियो। त्यसैको कार्यान्वयनका लागि इम्प्लिमेन्टेशन प्रोटोकलमा हस्ताक्षर हुने भएको हो।
नेपालका तर्फबाट विभागका महानिर्देशक कुमार दाहाल र इजरायलका तर्फबाट नेपालका लागि इजरायली राजदूत हनान गोदरले हस्ताक्षर गर्ने कार्यक्रम रहेको श्रम, रोजगार तथा सामाजिक सुरक्षा मन्त्रालयले जनाएको छ।
प्रोटोकलमा हस्ताक्षर भएसँगै इजरायलको विशिष्ट श्रम बजार नेपाली युवाका लागि खुला हुनेछ। पहिलो चरणमा नर्सिङ केयरमा ५ सय नेपालीहरु इजरायलले लैजाने प्रस्ताव छ। केयरगिभरसँगै विस्तारै कृषि, होटल तथा रेष्टुरेन्ट, निर्माणलगायत क्षेत्रमा नेपालीलाई रोजगारीको अवसर खुल्ने सरकारको विश्वास छ।
नेपाली युवाले इजरायली श्रम कानूनअनुसार सेवा सुविधा पाउनेछन् । इजरायली रोजगारमा निजी क्षेत्रलाई सहभागी गराइएको छैन। दुई देशबीचको सरकारी संयन्त्र (जिटुजी) बाट नेपाली इजरायल जानेछन् । यसअघि विभिन्न चरणमा छलफल भई सहमतिसमेत भइसकेकाले पहिलो क्षेत्रका रुपमा इजरायलको नर्सिङ क्षेत्र (अस्पताल, नर्सिङ होम, दिवा स्याहार केन्द्र) लगायतमा नेपालीले रोजगारीको अवसर प्राप्त गर्नेछन्। वैदेशिक रोजगारीका लागि इजरायललाई आकर्षक गन्तव्यका रुपमा लिइन्छ। आम्दानी, सामाजिक सुरक्षा तथा रोजगारीजन्य श्रमिक स्वास्थ्य सुरक्षाका दृष्टिले इजरायल विश्वकै उत्कृष्ट मुलुकमा पर्दछ।
केही वर्षदेखि नेपाली कामदार लैजान बन्द गरेको इजरायलले पछिल्ला समय नेपाली श्रमिक लैजाने चाहना गरेको थियो। इजरायलले कृषि तथा केयरगिभरको क्षेत्रमा विदेशी कामदार लिँदै आएको छ। इजरायलमा केयरगिभरको संख्या बढी छ र नेपालीहरू पनि धेरै जसो केयरगिभरका रूपमा नै त्यहाँ जाने गरेका छन्। इजरायलमा झण्डै ३३ हजार नेपाली रहेको अनुमान छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
