फाइल तस्बिर
केपी शर्मा ओलीलाई नेपाल कम्युनिस्ट पार्टीको बहुमतले अध्यक्षबाट हटाइसकेको छ। प्रतिनिधिसभा विघटन गर्ने ओली नेतृत्वको सरकारको कदम असंवैधानिक हो भन्ने फैसला सर्वोच्चबाट आउला भन्ने हाम्रो आशा छ। उहाँले आफूलाई काम गर्न दिइएन भन्दै हुनुहुन्छ। उहाँलाई मनपरी काम गर्दा पनि पुगेन। सारा शक्ति आफ्नो हातमा लिँदा पनि पुगेन। सत्ताको दुरुपयोग गर्दा पनि पुगेन।
ओलीले लोकतान्त्रिक परिपाटीलाई नै लत्याएर अघि बढ्न खोज्नुभयो। उहाँले जथाभावी नियुक्ति गर्नेदेखि लिएर गलत काम गर्दै हिड्नु भयो। पदका निम्ति अयोग्यहरुलाई छानेर अघि बढ्नुभयो। 'हामी केपी ओलीका दास होइनौं। हामीले पार्टीमा विधिपद्धतिका बारेमा छलफल गरौं भन्यौँ। नीतिगत राष्ट्रिय सरोकारका विषयमा जनसरोकारका विषयमा छलफल गरौं' भन्यौँ। हामीले उहाँको हरेक कदममा साथ नदिनु नै हाम्रो अपराध हो र? उहाँको शैली नै तानाशाह र निरकुंश अपनाएकाले हामी निस्सासिएर आवाज उठाएका हौं। समस्या उहाँको चिन्तन कार्यशैलीमा नै देखिएको हो।
उहाँको कार्यशैलीबाट पार्टीका नेता कार्यकर्ता मात्रै होइन, प्रतिपक्षी पनि पीडित भए। उहाँले प्रधानमन्त्री पदको गरिमा राख्न सक्नु भएन। उहाँ सानो गुटमा रमाउनु भयो। आफ्नो भजन गाउनेहरुलाई मात्रै समातेर अघि बढ्नु भयो। हामीले उहाँलाई केही न्याँकेका होइनौं।
उहाँले सुतेकै अवस्थामा रातारात पार्टीको विधान बमोजिम केन्द्रीय सदस्य थप्नुभयो। विधान र पद्धतिभन्दा बाहिर जानुभयो। विधान संशोधन गर्न दुई तिहाई चाहिन्छ त्यो नभई गरेको निर्णय कानुनसम्मत हुँदैन। उहाँसँग बहुमत नै छैन, हामीसँग प्रष्ट बहुमत छ। तर उहाँले भ्रममा पार्ने काम गर्नुभएको छ। उहाँ विधान मान्नुहुन्न। बहुमत मान्नुहुन्न। उहाँ त आफ्नो निर्णय नै सर्वेसर्वा हो भन्नुहुन्छ। तर व्यवस्थामा सबैले बस्न सक्नुपर्छ।
संविधानमाथि 'कु' गरेको बेला चुनावको औचित्य हुँदैन। उहाँले भनेको चुनाव कुनै पनि हालतमा हुँदैन। भ्रममा नपरे हुन्छ कोही पनि। केपी ओली नै अहिलेसम्मको अवस्थाको मुख्य जिम्मेवारी हो। हामीले पनि जिम्मेवारी लिनुपर्छ।
मैले गल्ती गरेँ, गणतन्त्र विरोधीलाई सत्ता र पार्टीमा पुर्याएर। सुध्रिन्छ्न् कि भनेर गरियो। अहिले आफैलाई घाँडो भएको छ। उहाँलाई ५ वर्षकै प्रधानमन्त्री भनेर हामीले जिम्मेवारी दिएकै थियौँ। तर त्यसको अवमूल्यन गरियो। उहाँ बदलाको भावना लिएर हिँड्ने मानिस हो।
उहाँले पार्टीको नेतृत्व लिएपछि ध्वस्त बनाउनु भयो। मदन भण्डारी फाउन्डेसनको नाममा उहाँले पार्टीमा गुट चलाउनु भयो। उहाँले कम्युनिस्ट विरोधी भएर हिन्नुभयो।
संविधानको कुनै धारामा प्रतिनिधिसभा विघटन गर्ने व्यवस्था गरिएको छैन। दुई वर्षसम्म अविश्वासको प्रस्ताव ल्याउन नमिल्ने प्रावधान पनि थियो। संविधानमा हुँदै नभएको धारा राखेर अन्तर्राष्ट्रिय अभ्यासलगायतका कुराहरु राखेर उहाँले प्रतिनिधि सभा विघटन गरेँ भन्नुहुन्छ। त्यसैले लोकतन्त्र र स्थायित्वमाथि प्रहार गर्ने काम जुन भएको छ, यो असंवैधानिक कदम हो। यसका विरुद्ध डटेर सामना गर्नुपर्ने बेला आएको छ।
कम्युनिस्ट आन्दोलनलाई तहसनहस गर्ने काम गरिएको छ। आन्दोलनको ज्वारभाटा ल्याउनुपर्ने बेला अहिले आएको छ। तपाईंहरु के बुझ्नुस् भने नेकपा आधिकारिकता हाम्रै हो। ओली नेकपाका अध्यक्ष होइन, उहाँ आफ्नै गुटको मात्र अध्यक्ष हो।
उहाँले अहिले पनि अनेकौं गलत काम गर्दै हिँड्नुभएको छ। अहिलेसम्म पार्टी सदस्य त हुनुहुन्छ, अब उहाँको गतिविधि हेर्दा थप कारबाही गर्नुपर्ने देखिएको छ। आज बस्ने स्थायी कमिटी बैठकले गम्भीर समीक्षा गरेर केही निर्णय गर्नेछ।
अब ओलीले विश्राम लिनुपर्छ। ओलीको बोझ यो देशले बोक्न सक्दैन। म र प्रचण्ड कमरेड भएको पार्टी नै आधिकारिक हो। हामीले अहिलेदेखि नै सहमति अनुसार आलोपालो बैठकको अध्यक्षता गर्न थालिसकेका छौं। हाम्रो विचार, सोच र चिन्तन मिलेको छ। त्यसैले हामी अहिले पार्टी निर्माण गर्ने अभियानमा अघि बढेका छौं। जबज छोडेका ओलीले अहिले कार्यकर्तालाई दिग्भ्रमित पार्ने काम गर्दै हुनुहुन्छ।
अहिले हामीले समाजवादउन्मुख जनताको जनवादलाई अघि बढाइरहेका छौं। ओलीले बाटोमा कोही फेला पर्यो कि समातेर केन्द्रीय सदस्य बनाउने काम गरेका छन्।
('प्रतिनिधि सभा विघटन : प्रतिगामी कदम' विषयक अन्तर्क्रिया कार्यक्रममा नेता नेपालले राखेको मन्तव्यको सम्पादित अंश)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752222253.png)
-1752043710.jpg)
-1749826086.png)
