काठमाडौं- भ्याली कोल्ड स्टोरका सञ्चालक बाबुराजा रावलको अपहरण काण्डका एक अभियुक्त 'सोलेर कुमार' भनिने दुर्गाबहादुर बुढाथोकी १२ वर्षपछि पक्राउ परेका छन्। प्रहरीको केन्द्रीय अनुसन्धान ब्युरो (सिआइबी)ले बुढाथोकीलाई पक्राउ गरेको हो।
सिआइबीले बुढाथोकीलाई भारतको दार्जिलिङबाट पक्राउ गरी काठमाडौं ल्याएको छ। सोही अपहरण काण्डमा संलग्न भएका केही व्यक्ति अहिले पनि जेलमै छन्। तर बुढाथोकी भने अहिलेसम्म फरार हुन सफल भएका थिए।
बुढाथोकी एकपटक पक्राउ परेर पनि हिरासत ब्रेक गरी फरार भएका थिए भने एकपटक प्रहरीको पन्जा फुत्किएका थिए। अहिलेसम्म जोगिएर बसेका बुढाथोकी अन्ततः दार्जिलिङबाट पक्राउ परेका हुन्।
000
३८ वर्षीय बुढाथोकीको स्थायी ठेगाना सर्लाहीको साविक ढुंग्रेखोला गाविस-५, हाल हरिवन नगरपालिका-९ हो। सर्लाहीकै भएकाले बुढाथोकीको अपहरणका अर्का नाइके प्रल्हाद मतहसँग राम्रै चिनजान थियो।
उसबेला बुढाथोकीको पेसा थियो, चोरी। मोटरसाइकल चोरी गर्ने र प्रल्हादको समूहलाई दिने गर्थे बुढाथोकी। बानेश्वरस्थित एभरेस्ट होटलको पार्किङबाट मोटरसाइकल चोरी गरेपछि २०६४ वैशाख २५ गते पहिलो पल्ट बुढाथोकी पक्राउ परेका थिए।
पक्राउपछि महानगरीय प्रहरी वृत्त बानेश्वरको हिरासतमा राखिएका उनी हिरासतको ग्रिल नै फोडेर फरार हुन सफल भएका थिए। उनै मोटरसाइकल चोरीको काम गर्ने बुढाथोकी प्रल्हादमार्फत् अपहरणको धन्दासम्म पुगेको पाइएको सिआइबीका डिआइजी सहकुल थापा बताउँछन्।
सेट्टीबाट खुलेको थियो बाबुराजा अपहरणको रहस्य
माओवादी द्वन्द्व सकिएपछिका केही वर्ष भने नेपालमा अपहरणजस्ता जघन्य अपराधको ग्राफ उकालोलाग्दो थियो। बाबुराजाको अपहरण हुनभन्दा झन्डै एक वर्षअघि अपहरणका मुख्य नाइके अमर टन्डन पक्राउ परिसकेका थिए। उनी पक्राउ परेपनि उनका सहयोगी उदय सेट्टीले अपहरणको धन्दालाई जारी राखेका थिए।
२०६५ पुस १ गते भ्याली कोल्ड स्टोरका सञ्चालक बाबुराजा रावलको अपहरण भयो। मारुती गाडीमा हालेर ४/५ जनाको समूहले मुखमा पट्टी बाँधेर रावलको अपहरण गरेको थियो। पछि अपहरणमा प्रयोग भएको मारुती भ्यान कान्ति बाल अस्पतालको पार्किङबाट प्रहरीले बरामद गरेको थियो।
यो अपहरणबारे प्रहरीले त्यसबेला मात्रै थाहा पायो, जति बेला बाबुराजा अपहरणमुक्त भइसकेका थिए।
यही अपहरण घटनाको अनुसन्धानका सिलसिलामा अपहरणकारीका नाइके भारतीय नागरिक उदय सेट्टीलाई नेपाल प्रहरीले पक्राउ गर्न सफल भएको थियो। ‘अपहरणका मुख्य नाइके सेट्टी भएकाले उनैको टिमले बाबुराजाको अपहरण गरेको हुनुपर्छ भन्ने हाम्रो विश्लेषण थियो,’ एक पूर्व प्रहरी निरीक्षक भन्छन्, ‘तर पछि बाबुराजाको अपहरणमा सेट्टीको संलग्नता नरहेको पाइयो। सेट्टीले बाबुराजाको अपहरण अस्वीकार गरेका थिए।’
प्रहरीको अनुसन्धानका क्रममा सेट्टीले नै बाबुराजाको अपहरणमा प्रल्हादको संलग्नता हुन सक्ने बताएका थिए। त्यसअघिसम्म प्रल्हादबारे प्रहरी अनविज्ञ थियो। एक पूर्व प्रहरी निरीक्षक भन्छन्, ‘सेट्टीले नै प्रल्हादको नाम लिएपछि बाबुराजाको अपहरणको गुत्थी खुलेको थियो।’
प्रल्हाद सुरु सुरुमा सेट्टीकै समूहमा रहेर अपहरणको धन्दा चलाउँथे। अपहरणमा प्रयोग हुने चोरीका गाडी, मोटरसाइकल प्रल्हादले नै १२ वर्षपछि पक्राउ परेका बुढाथोकीमार्फत् बन्दोबस्त गर्थे।
प्रल्हाद पनि यसअघि नै चोरीको मोटरसाइकलसहित पक्राउ परिसकेका व्यक्ति हुन्। सेट्टीले प्रल्हादको नाम लिएपछि प्रहरीलाई महत्वपूर्ण क्लु फेला परेको थियो। त्यसपछि सेट्टीमार्फत् नै प्रहरी प्रल्हादसम्म पुगेको थियो।
त्यसपछि बाबुराजाको अपहरणमा प्रल्हादसँगै विष्णु जिसी, सोलेर कुमार भन्ने दुर्गा बहादुर बुढाथोकी, बंगुरे भन्ने विकास कार्की, सोल्टी भन्ने टासी गुरुङ, विनोद कार्की, अनिल गुरूङको संलग्नता रहेको खुलेको थियो।
पाक्दै गरेको खाना छाडेर उम्केका बुढाथोकी
सेट्टीमार्फत् प्रल्हादको विवरण प्रहरीले केलाउन सुरु गरेको थियो। तर सेट्टीले प्रल्हादको कोठा आफूले नदेखेको बताए। ‘कहाँ छ प्रल्हादको कोठा मलाई थाहा छैन। तर मैले फोन गरेँ भने प्रल्हादले भेट्न सक्छ,’ त्यसबेला प्रहरीसँग सेट्टीले भनेका थिए।
प्रहरीले सेट्टीलाई मोटरसाइकलसहित पक्राउ गरेको थियो। त्यो मोटरसाइकल प्रल्हादबाटै सेट्टीले लिएका थिए। प्रहरीकै योजनाअनुसार सेट्टीले फोनमार्फत् प्रल्हादलाई मोटरसाइकल लिन बोलाए। त्यसबेलै प्रहरीले प्रल्हादलाई पक्राउ गर्न सफल भएको थियो।
सुरुमा प्रल्हादले बाबुराजाको अपहरण आफूले नगरेको दाबी गरे। पक्राउको केही घण्टापछि भने उनले अपहरण गरेको स्वीकार मात्रै गरेनन्, अपहरण गरेर राखिएको घरसम्म देखाउन तयार भए।
लोकेसन थियो- महाराजगञ्ज।
अपहरण गरेर बन्धक बनाइराखेको महाराजगञ्जस्थित घरसम्म प्रहरी पुग्यो। उनीहरु घर पुग्नुभन्दा केही मिनेट पहिले नै उक्त घरबाट एक व्यक्ति फरार भए। ती फरार भएका व्यक्ति बुढाथोकी नै थिए। उनै बुढाथोकीलाई प्रहरीले १२ वर्षपछि भारतबाट पक्राउ गरेको हो।
‘हामी महाराजगञ्जस्थित उक्त घर पुगेर छापा मार्दा भात बसाइराखेको थियो। तरकारी पाक्दै थियो,’ त्यसबेलाको घटना सम्झँदै एक प्रहरी अधिकारीले नेपाल लाइभसँग सुनाए, ‘सेट्टीलाई भेट्न गएका बेला प्रल्हादले बुढाथोकीलाई भनेका रहेछन्- म १ घण्टासम्म पनि आइनँ र फोनमा पनि सम्पर्क भएन भने बुझ्नु म एरेस्ट (पक्राउ पर्नु) पनि भएको हुन सक्छु। त्यतिन्जेल तँ ठाउँ चेन्ज गरिसक्नु।’
नभन्दै प्रल्हादले भनेजस्तै भयो। उनी पक्राउ परे। घण्टा बितिसक्दा पनि कोठामा फर्किएनन् र फोन पनि लागेन। त्यसपछि आफू पनि पक्राउ पर्न सक्ने लख काटेका बुढाथोकीले पाक्दै गरेको भात छाडेर फरार भएका थिए।
दार्जिलिङमै घरजम
फिरौती बापत लिएको रकम प्रल्हादको प्रेमिकासँग भएको हुनुपर्ने प्रहरीको विश्लेषण थियो। प्रल्हादकी प्रेमिकालाई ल्याएर प्रहरीले अनुसन्धान पनि गरेको थियो। तर प्रेमिकाले उक्त रकम नराखेको पाइएको थियो। फिरौतीबापतको २५-३० लाख रुपैयाँ भने बुढाथोकीसँगै थियो। उक्त रकम लिएर फरार भएका उनी भारत छिर्न सफल भएका थिए।
१२ वर्षदेखि भारतमा लुकेर बस्दै आएका बुढाथोकी आफ्नो परिचय बदलेर बसेका थिए। दार्जिलिङमा प्रकाश क्षेत्री नामले परिचित बुढाथोकीले सोही नामबाट राशन कार्डसमेत लिइसकेका पाइएको छ।
प्रकाश क्षेत्री नामकै कपडाको होलसेल पसल सञ्चालन गरेर बसेका उनलाई दार्जिलिङबाट सिआइबीको विशेष टोलीले पक्राउ गरेको हो। यद्यपि उनीमाथिको अपहरणको आरोप भने पुष्टि हुनै बाँकी छ। अदालतले अपहरण काण्डमा उनलाई सजाय सुनाइसकेको छैन।
बुढाथोकीलाई अनुसन्धानको लागि महानगरीय प्रहरी परिसर काठमाडौं पठाइएको सिआइबीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788878240.jpeg)
-1786602170.png)
