युएईको १२४९ मिटर अग्लो पहाड। यो युएई र ओमानको सिमानामा पर्छ।
बिहानै सिरेटोमा काममा गएर दिनभर थाकेको शरीर आरामको खोजीमा छ। २०२० का दुःखद अनुभव बिर्सिएर अंग्रेजी नयाँ वर्ष मनाउने तयारीमा छौं हामी। हुन पनि २०२० अति कष्टकर वर्षका रुपमा रह्यो। एकातिर कोरोना अनुभव रह्यो भने सोहीकारण परदेशमा केही साथीभाइहरुको ज्यान गयो भने धेरैले काम पनि गुमाउनु पर्यो।
कोरोनाले धेरै साथी बिचल्लीमा परे पनि यहाँ (युएर्ई) को सरकारले सबैलाई समान मान्यो। सबै मजदूरलाई आफ्नै नागरिकसरह रेखदेख गर्यो। त्यसका लागि यहाँको सरकारलाई धन्यवाद दिनु पर्छ।
यहाँ पनि जनवरी १ मा सरकारी बिदा हुने गर्छ। हुन त यसपालि जनवरी १ शुक्रबार परेको हुँदा यहाँ यसै पनि बिदाको दिन हो। महामारीको डर र त्रासका कारण २०२० घुमफिर गर्न लायक पनि रहेन। अब भनें परिस्थितिमा केही परिवर्तन आएको छ। खोप लगाउन सुरु भएकाले मानिसहरूमा मानसिक त्रास पनि कम हुँदै गएको छ।
हामी आशा गर्दै छौं। २०२० को अन्त्यसँगै यो महामारीको अन्त्य हुनेछ । २०२१ हाम्रा लागि खुसीको वर्ष हुनेछ। परदेशमा खुसी भए पनि नेपालतिरको अवस्था भने झन दुःखद हुने हो कि भन्ने अवस्था देखिन्छ। नेपालमा अहिलेको अवस्था हेर्ने हो भने २०२१ पनि राजनीतिक महामारी, रोग, भोक र अनिकालसँग जनता लड्नु पर्ने अवस्था हुनेछ।
हामी परदेशी भने सुरक्षित हुने आधार देखिएको छ। सबै कम्पनीहरु सामान्य अवस्थामा आउँदैछन्। सरकार पनि मजदूरको हक अधिकार सुनिश्चित गर्ने सक्दो कोसिस गर्दै छ।
नयाँ वर्षको लागि यूएई पनि सिँगारिने गर्दछ। ठूलारठूला बोर्ड अनि झिलिमिलि रोड देख्न पाइन्छ। हेप्पी न्यू इयर लेखिएका पम्प्लेट पनि देख्न सकिन्छ।
हामीले भने यो वर्ष अलि अलग गर्ने सोच बनाएका छौ।
ड्युटी गर्दा वाक्क भएका हामी यसपालि जावेल हाफिट जाने भएका छौं। यो युएईको दोस्रो ठूलो टापु हो, जहाँ कार र बाइक लिएर जान सकिन्छ। यसको उचाइ करिब १२४९ मिटर छ। यो युएईको राजधानी अबुधाबीबाट करिब १७५ किलोमिटरको दूरीमा छ। कारमा करिब दुई घण्टाको यात्रामा पुग्न सकिन्छ। अल ऐनको नजिक रहेको यो टापु अति सुन्दर बनाएको छ,यूएई सरकारले।
यसको मनमोहक रूपको वर्णन गरी साध्य त छैन। संक्षेपमा भन्नु पर्दा यस्तो छ। अल ऐनबाट निस्किएपछि चिडियाघर हुँदै जावेल हाफिटका लागि यात्रा तय गर्न सकिन्छ।
यसको तलपट्टि अति रमणीय पार्क पनि छ।जसलाई ग्रिन मुहुज्रा भनिन्छ। यहाँबाट टापुको यात्रा सुरु हुन्छ। पूरा पहाड खोपेर बनाएको घुम्ती बाटो छ। राम्रोसँग सुरक्षा व्यवस्था मिलाईएको छ। बीचमा राम्रो होटलको पनि व्यवस्था छ। यस टापुको माथि रातिको समयमा पुग्दा अलौकिक दृश्य देखिन्छ । एकापट्टी ओमानको बिजुलीको झिलीमिली, अर्कोतिर युएईको। अति सुन्दर, अनि हेर्न लायक पनि।
हामीहरू पनि रातको १२ बजे टापुको माथि बसेर ‘हेप्पि न्यू इयर’ भन्ने तयारीमा छौं। जसका लागि चाहिने सामान ल्याइसकिएको छ। एक–दुइटा अंग्रेजी बोतल। जसले खाँदैन उसलाई रेडबुल पनि। हुन त युएईमा खुल्ला रुपमा ह्वीस्की पिउन पाइँदैन। फेरि पनि न्यू इयर भनी साथीभाइ लिएर आएका छन्। साथमा बिर्यानी पनि तयार गर्ने सल्लाह भएको छ। होटलमा खाना अति महंगो हुने हुँदा आफ्नो खाना लिएर जाने हाम्रो योजना हो। गाड़ी त हामीसँग छ नै, त्यसको चिन्ता भएन। यो दिन त्यो क्षेत्रमा अति भीडभाड हुने हुँदा समयमा निस्कनु पर्ने हुन्छ।
यसरी हामी परदेशमा भएपनि सबै दुःख कष्ट भुली समय निकाली २०२० लाई टापुमाथि गई बाई रबाई अनि २०२१ लाई स्वागत गर्न आफ्नो तयारी पूरा गरेका छौं। त्यो दिन कामबाट आएपछि ढिलो नगरी , नयाँ वर्ष मनाउन हुँँइकिनेछौं।
तानसेन, पाल्पा हाल,यूएई।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
