पोखरा– पर्यटक नगरी पोखराको सौन्दर्य चोक–चोकमा राखिएका होर्डिङ बोर्डका कारण कुरुप भइरहेको अवस्थामा अब नगरमा विज्ञापनलाई डिजिटल माध्यमबाट प्रस्तुत गरिने भएको छ।
सभागृह चोकमा डिजिटल यात्रुबस प्रतीक्षालयको बुधबार पोखरा महानगरपालिकाका मेयर मानबहादुर जिसीले उद्घाटन गरे। यात्रु बस्न र विज्ञापन गर्न दुवैका लागि प्रयोग गरिने प्रतीक्षालय महानगर र आकृति एड्भर्टाइजिङबीचको साझेदारीमा निर्माण गरिएको हो।
मेयर जिसीले पोखरालाई स्मार्ट सिटी बनाउन डिजिटल यात्रुबस प्रतीक्षालयको निर्माण गरिएको बताए।
‘स्मार्ट सिटी बनाउन पोखरा प्रविधिमैत्री महानगर हुनुपर्छ र त्यसकै पहिलो कदम प्रतीक्षालय हो’, उनले भने।
प्रतीक्षालय निर्माण भइसके पनि कहाँ कति रुट नम्बरको बस जान्छ, कुन समयमा जान्छ भन्ने लगायतको सम्पूर्ण जानकारी दिने यन्त्रको जडान हुन भने बाँकी रहेको मेयर जिसीले बताए।
उनले महानगरभित्रका सबै मुख्य चोकहरुमा डिजिटल प्रतीक्षालयको निर्माण गरिने प्रतिबद्धता व्यक्त गरे।
कार्यक्रममा प्रदेशसभा सदस्य बिन्दुकुमार थापाले डिजिटल प्रविधि पोखराको गहना हुने बताउँदै यातायातलाई सुविधायुक्त र व्यवस्थित बनाउन ट्राफिक लाइट र सिसिटिभी क्यामेराको समेत व्यवस्था गनुपर्ने माग राखे।
यस्तै, अर्की प्रदेशसभा सदस्य मीना गुरुङले निजी क्षेत्र र महानगरले सहकार्य गरेर नयाँ कामको सुरुवात गरेको भन्दै स्वागत गरिन्।
कार्यक्रममा पोखरा महानगरपालिकाका प्रशासकीय अधिकृत तीर्थनारायण पौडेलले बाहिरका पर्यटकले स्मार्ट सिटी हो कि होइन भन्ने कुरा यातायात सुविधाबाटै थाहा हुने भएकाले त्यसैमा ध्यान दिएको बताए।
उनले भने, ‘पोखरालाई आकर्षक बनाउन विभिन्न आयाममध्ये डिजिटल प्रतीक्षालय पनि एक हो। यसपछि अन्य काम क्रमशः गर्दै जानेछौं।
महानगरका सबै समस्या समाधान गर्न आग्रह
कार्यक्रमका वक्ताहरुले प्रतीक्षालयको निर्माणले मात्रै स्मार्ट शहर नबन्ने बताए। महानगर क्षेत्रभित्र रहेका बिजुलीका पोलमा रहेका तार, बढ्दो ट्राफिक समस्या, अव्यवस्थित होर्डिङबोर्ड लगायतका समस्या समाधान गर्न उनीहरुले जोड दिए।
नेपाली कांग्रेसका कास्की सभापति कृष्ण केसीले सबै जनताका मागलाई पूरा गर्न नसके पनि कम्तीमा सम्बोधन गर्न महानगरलाई आग्रह गरे।
‘हाम्रो ठाउँको विकास र प्रगति भइरहेको छ भन्ने कुरा जनतालाई आभास दिलाउनुपर्छ’, उनले भने। महानगरका जनप्रतिनिधिहरुको १ वर्षे कार्यकाल बितिसक्दा पनि उल्लेखनीय काम हुन नसकेको उनको आरोप थियो।
उनले भने, ‘यसले जनतालाई महानगरप्रति वितृष्णा जागेको छ।’
पोखरामा बाटो साँघुरो नभए पनि व्यवस्थित पार्किङको असुविधा र ट्राफिक जामको समस्याका कारण बाहिरका पर्यटकलाई गलत सन्देश जाने उनले औंल्याए।
उद्योग वाणिज्य संघ कास्कीका पूर्वअध्यक्ष मुल्मीले डिजिटल प्रतीक्षालय विज्ञापन देखाउन मात्र सीमित हुन नहुने भन्दै यसले मात्रै शहर व्यवस्थित नहुने बताए।
‘निश्चित ठाउँमा चढ्न र ओर्लन पाइन्छ कि पाइन्न भन्ने कुरा पनि हो’, उनले भने, ‘यात्रु चढ्ने र ओर्लने अरु प्रतीक्षालय नै व्यवस्थित छैन।’ महानगरलाई सजग र खबरदारी नगरे जनता आफैले दुःख पाउने उनको भनाइ थियो।
प्रदेशसभा सदस्य मीना गुरुङले बसपार्क व्यवस्थित गनुपर्ने माग राखिन्। शहरमा पार्किङको समस्या बढिरहेकाले घर बनाउँदा अन्डरग्राउन्ड पार्किङको व्यवस्था गर्न उनले नगरवासीहरुलाई सुझाइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
