काठमाडौं- प्रधानमन्त्री केपी शर्मा ओलीले मंगलबार बिहानका लागि बोलाएको संवैधानिक परिषदको जानकारी प्रमुख प्रतिपक्षी दलका सभापति शेरबहादुर देउवालाई सोमबार नै जानकारी थियो।
आइतबार देउवा अनुपस्थित भएपछि गणपूरक नपुग्ने भएसँगै प्रधानमन्त्री ओलीले संवैधानिक परिषद्को बैठक स्थगित गरेका थिए। मंगलबार बिहानको बैठकमा देउवा उपस्थिति भए। तर, सभामुख अग्निप्रसाद सापकोटा उपस्थित भएनन्। पार्टीभित्रको आन्तरिक विवादले पूर्व माओवादी खेमाका सापकोटा उपस्थित भएनन्।
परिषदका सदस्य सापकोटा सहभागी नहुनुमा अध्यक्ष पुष्पकमल दाहाल ‘प्रचण्ड’को असन्तुष्टिको कारण पनि थियो। संवैधानिक निकायमा नियुक्तिका सन्दर्भमा पार्टी भित्र छलफल नभएको प्रति प्रचण्डको असन्तुष्टि थियो।
पार्टीभित्रकै आन्तरिक कारणले सभामुख उपस्थित नभएपछि ओलीको निशानामा पारे। गत बैसाखमा प्रमुख प्रतिपक्ष दलका नेता उपस्थित नभएपनि परिषदले निर्णय गर्न सक्ने गरी अध्यादेश ल्याइएको थियो। व्यापक विरोधपछि उक्त संशोधन सहितको अध्यादेश खारेज गरिएको थियो।
सापकोटा अनुपस्थित भएपछि ओलीले सभामुख सहभागी नभएपनि निर्णय हुने गरी अध्यादेश ल्याउन लागेको देउवालाई सुनाए। संवैधानिक परिषद् (काम, कर्तव्य, अधिकार र कार्यविधि) सम्बन्धी अध्यादेशमा असहमति रहने बताए।
संसदको नियमित अधिवेशन बस्ने समयमा अध्यादेश ल्याउनुको औचित्य नरहेको देउवाले बताए। देउवाको बोली उधृत गर्दै प्रवक्ता विश्वप्रकाश शर्माले भने, ‘तपाईले अध्यादेश ल्याउने कार्य विल्कुल गलत छ।’ बिहान कोरम नपुगेर बैठक बस्न नसक्ने,दिउँसो अध्यादेश जारी गर्ने र साँझ परिषदको बैठक बोलाउने सरकारी निर्णयप्रति प्रश्न रहेको शर्माले बताए।
कांग्रेसको असहमति हुँदाहुँदै प्रधानमन्त्रीले नयाँ अध्यादेश सिफारिस गरी राष्ट्रपतिले जारी गरेपछि साँझको बैठकमा देउवा सहभागी नहुने भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
