काठमाडौं- प्रमुख प्रतिपक्षी दल नेपाली कांग्रेसले सरकार ल्याएको अध्यादेशमा समर्थन नरहेको जनाएको छ। मन्त्रिपरिषद बैठकको सिफारिसमा राष्ट्रपति विद्यादेवी भण्डारीले संवैधानिक परिषद्सम्बन्धी अध्यादेश जारी गरेकी छन्।
मंगलबार बिहानको संवैधानिक परिषदको बैठक कोरम नपुगेर स्थगित भएको थियो। त्यसलगत्तै बसेको मन्त्रिपरिषदको बैठकले संवैधानिक परिषद् काम, कर्तव्य र अधिकार कार्यविधिसम्बन्धी पहिलो संसोधन अध्यादेश जारी गर्न राष्ट्रपतिसमक्ष सिफारिस गरेको थियो।
संवैधानिक परिषदको बैठकका लागि प्रमुख प्रतिपक्ष दल नेपाली कांग्रेसका सभापति शेरबहादुर देउवा पनि बालुवाटार पुगेका थिए। कांग्रेस नेता रमेश लेखकले संवैधानिक परिषदको कार्यविधि संसोधन अध्यादेशमा कांग्रेसको समर्थन नरहने बताए। 'हाम्रो समर्थन छैन अध्यादेशमा,' नेपाल लाइभसँग छोटो कुराकानी गर्दै उनले भने।
कांग्रेसको समर्थन नरहेको अध्यादेशको विरोध गरिने उनले बताए। संवैधानिक नियुक्तिका निर्णयमा यस अघि सभापति देउवासँगै लेखक पनि बालुवाटार जाने गरेका थिए।
गत बैसाखमा सरकारले जारी गरेर फिर्ता गरेको अध्यादेशमा संवैधानिक परिषदको बैठकमा ‘सर्वसम्मति कायम हुन नसकेमा सो विषयमा निर्णय हुन सक्ने छैन,’ भन्ने व्यवस्था हटाइएको थियो। अध्यक्ष (प्रधानमन्त्री)सहित तत्काल बहाल रहेका बहुमत सदस्यहरूको उपस्थितिले बहुमतबाट निर्णय गर्न सकिने गरी संसोधन गरिएको थियो।
पार्टीभित्र र बाहिरबाट अध्यादेशको व्यापक विरोध भएपछि अध्यादेश सरकारले फिर्ता लिएको थियो। हाल जारी गरिएको अध्यादेशमा संशोधन कुन कार्यविधिमा गरिएको खुलेको छैन। राष्ट्रपतिले जारी गरेको अध्यादेश राजपत्रमा प्रकाशित भने भइसकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
