काठमाडौं–महानगरीय ट्राफिक प्रहरी महाशाखाले उपत्यकाका विभिन्न स्थानबाट मोटरसाइकल चोरी गर्ने १४ जनालाई यस आर्थिक वर्षमा पक्राउ गरी कारबाहीको दायरामा ल्याएको छ।
महाशाखाको पीडित सहायता इकाइको विशेष टोलीले उपत्यकाका विभिन्न स्थानहरुबाट हराएका र चोरी भएका सवारी साधनहरुलाई खोजतलास गर्ने विशेष अभियान संचालन गरिरहेको छ। महाशाखाले त्यस्ता ८५ वटा मोटरसाइकल खोजतलास गरि सम्बन्धित धनीलाई जिम्मा दिएको छ।
महाशाखाका प्रमुख प्रहरी वरिष्ठ उपरीक्षक जनक भट्टराईले भने, ‘लामो समयदेखि मोटरसाइकल चोरी गर्ने पेसेवर गिरोहलाई निगरानीमा राखी सादा पोशाकमा विशेष अपरेसन टोली खटाएका छौं, धेरैजसो उपत्यकाबाट हराएका मोटरसाइकलहरु उपत्यकाबाहिरका ग्रामीण बस्तिहरुमा पुग्ने गरेको पाइएको छ, त्यस्ता बस्तीहरुमा समेत सुराकी परिचालन गरी सूचना संकलन गर्ने काम भइरहेकाे छ।’
मंगलबारमात्रै महाशाखाले ललितपुरको ढोलाहिटीबाट काभ्रे तिमाल घर भइ ललितपुर बस्ने बर्ष २५ का सुजन तामाङलाई चोरीको मोटरसाइकलसहित पक्राउ गरेको छ। वास्तविक नम्बर प्र ३–०२–००१प९०४१ को मोटरसाइकलमा प्र ३–०२–००३प६५०६ नम्बर राखी चलाएको २२० सिसिको रातो-कालो पल्सरसहित उनलाई पक्राउ गरिएको हो।
तामाङलाई आवश्यक कारबाहीका लागि महानगरीय प्रहरी बृत्त मालिगाउँ पठाइएको छ। उक्त मोटरसाइकल काठमाडौंस्थित सेतोपुलबाट १० दिनअघि मात्र हराएको थियो ।
विशेषगरी काठमाडौंका सार्वजनिक स्थल र एकान्तमा ठाउँमा पार्किङ गरेर राखिएका मोटरसाइकलहरु चोरी हुने गरेको ट्राफिक प्रहरीले जनाएको छ। सवारी धनीहरुले अतिरिक्त लक एव सुरक्षाका उपायहरु नअपनाउँदा चोरी हुने संख्यासमेत बढ्दै गएको प्रहरीको विश्लेषण छ।
मोटरसाइकल चोरी भएर उपत्यकामा नै किनबेच भएका र मोटरसाइकल चोरले नै नम्बर प्लेट परिवर्तन तथा सरसामान पार्टपूर्जा फेरेर नचिनिने गरि चलाउने गरेको प्रहरीको निष्कर्ष छ । त्यस्ता मोटरसाइकलहरुलाई विशेष संकेतका आधारमा पहिचान गरी पक्राउ गरिने गरेको महाशाखाले बताएको छ ।
प्रहरी निरीक्षक जितेश दाहालले भने ‘हामीले पक्राउ गर्दा कतिपय अवस्थामा सम्बन्धित चालकलाई उसले चलाएको मोटरसाइकल चोरीको हो भन्ने समेत थाहा हुँदैन, धेरै घटनामा सस्तोमा किनेको र पछि नामसारी गर्ने भनी अग्रिम केही पैसा दिने गरेको भेटिन्छ।’
अधिकांश चोरी भएका मोटरसाइकलहरुको वास्तबिक नम्बर परिवर्तन गरेको पाइन्छ भने कतिपय पक्राउ परेका मोटरसाइकलको नक्कली ब्लुबुकसमेत हुनेगरेको भएको दाहालले बताए।
केही दिनअघि मात्रै नुवाकोटका दिनेश तामाङ र राजाराम तामाङलाई चोरीको मोटरसाइकलसहित टोखाबाट पक्राउ गरी आवश्यक कारबाहीका लागि महानगरीय प्रहरी वृत्त कालिमाटी पठाइएको थियो। गत असोज १६ गते नयाँबजारबाट हराएको बा९५प ४८४ नम्बरको २२० सिसीको कालो-रातो पल्सरसहित काभ्रेका सन्त लामा र समिर लामालाई कालिमाटीबाट पक्राउ गरी बृत्त सोह्रखुट्टेमा आबश्यक कारबाहीका लागि पठाइएको महाशाखाले जानकारी दिएको छ।
सवारी साधन चोरीबाट बँच्नका लागि सवारी साधनमा अतिरिक्त लकको प्रयोग गर्न, अलरामलगायतका उपकरण जडान गर्न, घर कम्पाउण्डमा पार्किङ गरेको भनि ढुक्क नपर्न र एकै छिन हो भनि अतिरिक्त लक लगाउन अल्छी नगर्नसमेत महाशाखाले अनुरोध गरेको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
