काठमाडौं- प्रधानमन्त्री केपी शर्मा ओलीका प्रेस सल्लाहकार सूर्य थापाले वामदेव गौतमको ६ वर्ष पुरानो फोटोको सम्झना गरेका छन्।
आइतबार बिहान ८ बजेर ३८ मिनेटमा पार्टी उपाध्यक्षसमेत रहेका गौतमको फोटो राख्दै थापाले लेखेका छन्- को कस्तो? तस्बिर काफी छ!
थापाले राखेको फोटो सामान्य खालको भने छैन। फोटोमा उनले सडकको ‘डिभाइडर’ नाघ्दै गरेका छन्।
सो फोटो सर्वप्रथम २०७१ साल जेठ १२ गतेको नयाँ पत्रिका दैनिकमा प्रकाशित भएको थियो। फोटो सोही पत्रिकाका फोटो पत्रकार ज्ञानेन्द्र कार्कीले खिचेका हुन्।
त्यतिबेला गौतम गृहमन्त्री थिए।
नयाँ पत्रिका दैनिकले प्रथम पृष्ठमै शीर्षक लेखेको थियो- गृहमन्त्रीको जेब्राक्रस। त्यहाँ गौतमका दुई फोटा र बालबालिकाले बाटो काट्न सिकाएको अर्को एउटा फोटो पनि राखिएको थियो।
‘कानुनका संरक्षक!’ क्याप्सन दिएर नयाँ पत्रिकाले दुई बुँदामा लेखेको थियोः
- आइतबार बिहान साढे ११ बजे वीर अस्पतालतर्फबाट हुइँकिँदै आएका उपप्रधानमन्त्री तथा गृहमन्त्री वामदेव गौतम र सुरक्षाकर्मीका गाडी रत्नपार्कको बीचसडकमै झ्याप्पै रोकिए। ट्राफिक जाम गराएर गृहमन्त्री ओर्लिए। र, आकाशे पुलतर्फ हेर्दै नहेरी डोरी नाघेर शान्तिबाटिकातिर लागे। सर्वसाधारण हेरेको हेर्यै भए।
- डोरी नाघेर बाटो काट्नेलाई ट्राफिक प्रहरीले सडकमै अस्थायी हिरासत बनाएर एक घण्टासम्म थुन्छ, उठबस गराउँछ र जरिवानासमेत गराएर छाडिदिन्छ। तर, कानुनका संरक्षक गृहमन्त्री वामदेव गौतमले दौरा-सुरुवाल लगाएरै डोरी नाघे, नियम-कानुन कालोबुटले कुल्चिएर हिँडे।
त्यतिबेला फोटो प्रकाशित भएपछि गौतम विवादित भए। घटनाको ८ दिनपछि अर्थात् जेठ १९ गते उनले विज्ञप्ति निकालेर प्रष्टीकरण दिए। उनले विज्ञप्तिमा उक्त दिन रत्नपार्कको शान्ति बाटिकामा आफ्नो पार्टी नेकपा एमालेले काठमाडौं क्षेत्र नं. २ मा उम्मेदवारी दिन जान निकालेको जुलुसले बाटो अवरुद्ध भएको र आफू त्यसैमा मिसिन बाटो काटेको उल्लेख गरे।
सामान्य कुरालाई अतिरिञ्जित गर्ने र सामाजिक सञ्जालहरूमा आफूलाई अपमान र गालीगलौज गर्ने प्रवृत्ति स्वीकार्य नभएको पनि उल्लेख गरे। 'मैले कुनै पनि रूपमा सवारी नियम उल्लंघन गर्ने उद्देश्य राखेको थिइनँ। मेरो सो कामबाट सवारी आवागमनमा कुनै किसिमले असुविधा पुगेको थिएन। तथापि मेरो उक्त कार्य तत्कालीन सन्दर्भलाई अलग गरेर हेर्ने हो भने शोभनीय भएन कि भन्ने कुरा मैले पनि महसुस गरेको छु', गौतमको विज्ञप्तिमा भनिएको थियो।
उनको फोटोलाई घटनाको ६ वर्षपछि प्रधानमन्त्रीका प्रेस सल्लाहकार थापाले सम्झिएका छन्। शनिबार दिउँसो बसेको सचिवालय बैठकमा गौतमले थापाको कार्यशैलीको आलोचना गर्दै उनलाई पदमुक्त गर्न प्रधानमन्त्री ओलीलाई सुझाएका थिए। गाैतमले प्रधानमन्त्रीका सल्लाहकारले प्रधानमन्त्रीलाई नै सिध्याइदिने चेतावनी दिएका थिए। सो विषयमा जानकारी पाएपछि थापाले फेसबुकमा पुरानो फोटो राख्दै सांकेतिक प्रतिवाद गरेको आँकलन गरिएको छ।
थापाको उक्त स्टाटसको चौतर्फी आलोचना भएपछि उनले त्यसलाई आफ्नो फेसबुक टाइमलाइनमा नदेखिने बनाएका छन्।
काे कस्ताे ? तस्बिर काफी छ !
Posted by Surya Thapa on Saturday, December 5, 2020
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
