काठमाडौं- स्पेनिस क्लब रियल मड्रिडका प्रशिक्षक जिनेदिने जिदानको भविष्यमाथि प्रश्न उठ्न थालेको छ। च्याम्पियन्स लिग समूह चरणमा शख्तर डोनेस्कसँग २-० को हारपछि क्लबमा जिदानमाथिको प्रश्न बढेको हो। क्लबमा उनीमाथि गहन पुनर्विचार हुने देखिन्छ।
ला लिगामा १० खेलमा १७ अंकसहित चौथो स्थानमा रहेको रियल मड्रिडका लागि अहिले च्याम्पियन्स लिग समूह चरणका खेलहरु मुस्किल बनिरहेको छ। च्याम्पियन्स लिग समूह ‘बी’ मा रहेको रियल मड्रिड अहिले ५ खेलमा ७ अंकसहित तेस्रो स्थानमा छ। रियल मड्रिडलाई अघि बढ्न अन्तिम खेलमा मोन्चेनग्लादबाखविरुद्ध उत्कृष्ट खेल देखाउनुपर्ने हुन्छ।
रियल मड्रिडले अब सेभिया, मोन्चेनग्लादबाख र एथ्लेटिको मड्रिडसँग ल्याउने नतिजामा नै जिदानको भविष्य जोडिएको विश्लेषण भइरहेका छन्। यीनै खेलले रियल मड्रिडको यो सिजन कस्तो रहन्छ भन्ने पनि देखाउनेछ।
सन् २०१७-१८ को सिजन लगातार तीन च्याम्पियन्स लिगको उपाधि उचालेपछि प्रशिक्षक जिदानले रियल मड्रिडबाट राजीनामा दिएका थिए। आफूले खेलाडीका रुपमा र प्रशिक्षकका रुपमा कमाएको सफलता गुमाउन नचाहेर त्यसबेला राजीनामा दिएका जिदान गएको सिजनको अन्त्यमा वर्षकै तेस्रो प्रशिक्षकका रुपमा मड्रिड फर्किएका थिए। जतिबेला लिगमा ११ खेल मात्र बाँकी थियो।
नयाँ सिजनमा कसरी अगाडि बढ्ने, को खेलाडी ल्याउने र को खेलाडीलाई बिदाइ गर्ने जस्ता सम्पूर्ण अधिकार लिएर फर्किएका जिदानले महत्वपूर्ण केही खेलाडीलाई क्लबमा ल्याउने काम पनि गरे। तर पनि मैदानमा त्यसको प्रभाव भने पहिले जस्तो देखिन सकेको छैन। गएको सिजन कोभिडका कारण रोकिएर सुरु भएको खेलमा राम्रो गर्दै ला लिगा जितेको मड्रिड अहिलेको सिजन ढलपल भइरहेको देखिन्छ। गएको सिजन लिग जित्दा राम्रो अग्रता बनाइसकेको बार्सिलोनाको पछिल्लो समयको खराब खेल पनि कारक देखिन्थ्यो।
च्याम्पियन्स लिगमा मंगलबार राति शख्तर डोनेस्कसँगको हार मड्रिडको दोस्रो हार हो। समूह चरणमा शख्तरसँगको पहिलो खेलमा रियल मड्रिड ३-२ ले पराजित भएको थियो। मोन्चेनग्लादबाखसँग २-२ को बराबरी खेलेको मड्रिडले इन्टर मिलानलाई भने दुवै खेलमा हरायो।
पछिल्लो समय ला लिगामा भ्यालेन्सियासँगको ४-१ को हार, भिलारियलसँगको १-१ को बराबरी र अलाभेससँगको २-१ को हारले त्यसअघि बार्सिलोनालाई ३-१ ले हराएको समेत छायामा पारेको छ। यसैले अबको १० दिनभित्र सेभिया, मोन्चेनग्लादबाख र एथ्लेटिको मड्रिडसँग गरेर तीन खेलले रियल मड्रिडको अवस्था यकिन हुनेछ।
रियल मड्रिडको पछिल्लो अवस्थाले जिदानमाथि राजीनामाको प्रश्न पनि उठिरहेको छ। तर उनी अहिले आफू राजीनामा दिने पक्षमा नरहेको बताउँछन्। ‘म अहिले राजीनामा दिने पक्षमा छैन। हामीले पहिलो हाफमा निकै राम्रो खेलेका थियौँ, तर गोलमा बढ्न सकेनौँ। केही अवसर खेर जाँदा मुस्किल बढ्दै गयो’, शख्तरसँगको हारपछि उनले भनेका छन् ‘म बलियो मनस्थितिमा नै छु, बलबुताले भ्याएसम्म मेहनत गर्नेछु। हामीले शीर निहुराउनुपर्ने अवस्था होइन। नतिजाका आधारमा मात्र खेल नराम्रो देखिएको हो, होइन भने हामीले राम्रो खेलेका छौँ।’
यो सिजन सुरु भएयता रियल मड्रिडले १५ खेलमा ५ खेल गुमाएको छ। जहाँ खेलाडीहरु सोचेअनुसार बढ्न सकिरहेका छैनन् भने प्रशिक्षक जिदानले उपयुक्त सूत्र पत्ता लगाउन सकिरहेका छैनन्। अलाभेससँगको हारपछि त्यसमा आफ्नो कुनै विश्लेषण नरहेको बताएका जिदानले शख्तरसँगको हारमा आफूहरु कमजोर देखिएको स्वीकार गरेनन्।
रियल मड्रिड च्याम्पियन्स लिगमा पहिलोपटक समूह चरणबाट बाहिरिने खतरामा देखिँदा जिदानले टिममाथिको विश्वास देखाइरहेकै छन्। मड्रिड टिम आवश्यक समयमा पछि नपर्ने उनको विश्लेषण देखिन्छ। अहिले सर्जियो रामोस र इडन हजार्डको चोटले समस्या देखिए पनि मड्रिड टिम कुनै दुई खेलाडीका कारण हारसम्म जानुपर्ने टिम होइन।
रामोस नहुँदा अर्का सेन्टर ब्याक राफेल भारान हराइरहेका जस्ता देखिन्छन्। राइट ब्याकमा लुकास भासक्वेज सोचेजस्ता देखिएका छैनन्। च्याम्पियन्स लिगमा ५ खेल सकिँदा ९ गोल खानु रियल मड्रिडका लागि पोस्टमा पनि अहिलेसम्मकै खराब अवस्था हो।
अहिले केही युवा खेलाडीमा विश्वास देखाएका जिदान अब कसरी अगाडि बढ्लान् भन्ने अनुमान कठीन छ। मिडफिल्डर टोनी क्रुसले भनेजस्तो रियल मड्रिडमा अहिले देखिएको ‘गढबढ’ अबका खेलमा देखाउने छुट जिदानको टिमलाई छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778245878.png)
-1764146706.png)
