काठमाडौं- अमेरिकी विद्युतीय कार उत्पादक कम्पनी टेस्लाको कार अवैध रुपमा नेपालमा आयात गरेको राकेश अडुकियाको कम्पनीले थप कार आयात गर्दा ‘अन्डर इनभ्वाइस’ गरेको पाइएको छ।
अडुकियाको कम्पनी श्रीमा डिस्ट्रिब्युटर्सले यसअघि अवैध रुपमा आयात गरेका कारलाई सर्वोच्चले वैधता दिएको थियो। उनै अडुकियाको अर्को कम्पनी अरेटी इन्टरनेसनलले ६ नोभेम्बर २०२० मा किनेर नेपाल ल्याएको कारको खरिद मूल्य कम देखाएको र मोटर क्षमता नै ढाँटेर सबै कर कम तिरेको पाइएको हो।
सरकारले चालू आर्थिक वर्षको आर्थिक ऐनमा आधिकारिक बिक्रेता बिना नै नेपालमा गाडी आयात गर्न दिने नीति लिएको छ। तर त्यसका लागि मूल्यको ३० प्रतिशत अतिरिक्त शुल्क तिरेर भन्सार जाँचपास गराउनुपर्ने व्यवस्था गरिएकाे छ। श्रीमाले यसअघि ल्याएका टेस्लाका दुई वटा कारको दर्ता खारेज गर्ने यातायात व्यवस्था कार्यालयको निर्णय कार्यान्वयन नगर्न सर्वोच्चले आदेश दिएपछि गाडीको दर्ता ब्युँतिएको छ।
श्रीमा विवादित भएपछि अडुकियाले अर्को कम्पनी अरेटी इन्टरनेसनलमार्फत् नोभेम्बर ६ मा हङकङको साउथ चाइना एक्जिम कम्पनीबाट ३ वटा टेस्ला मोडल-थ्री गाडी नेपाल भित्र्याएका थिए। चीनमा ४९ हजार डलरमा बिक्री भइरहेको टेस्ला मोडल थ्री अरेटीले नेपाल ल्याउँदा ३५ हजार डलरमा खरिद गरेको देखाएको छ। उक्त बिलअनुसार यो गाडी अन्डर इन्भ्वाइसमा आएको प्रष्ट भएको छ।
त्यतिमात्र होइन, अरेटी इन्टरनेसनलले यसमा प्रयोग भएको मोटर क्षमता पनि ढाँटेको पाइएको छ। गाडीको मोटर क्षमता ढाँटेपछि कम्पनीले १५ प्रतिशत मात्रै अन्तःशुल्क तिरेर तीन वटा कार भन्सार जाँचपास गराएको छ। कम्पनीले गाडीको भन्सार मूल्य ४१ लाख ६० हजार ४५० रुपैयाँ देखाएको छ भने भन्सार शुल्क वापत १६ लाख ६४ हजार रुपैयाँ तिरिएको छ।
'अल ह्विल ड्राइभ सिस्टम' जडान भएको टेस्ला मोडल थ्रीमा कम्पनीले १४७ किलोवाट क्षमताको मोटर जडान भएको भन्दै १५ प्रतिशत मात्रै अन्तःशुल्क तिरेको छ। जबकि टेस्लाको मोडल थ्रीको पछाडि चक्कामा पावर दिन २११ किलोवाटको अर्को मोटरसमेत जडान गरिएको छ। अगाडि र पछाडि गरेर यसमा ३५८ किलोवाट क्षमताको मोटर प्रयोग भएको छ।
उक्त क्षमताको मोटर प्रयोग गरिएको विद्युतीय कारले ६० प्रतिशत अन्तःशुल्क तिर्नु पर्छ। कम्पनीले अहिले ८ लाख ७३ हजार ६९५ रुपैयाँ अन्तःशुल्क तिरेको छ। जबकि उसले ६० प्रतिशत अन्तःशुल्कवापत ३४ लाख ९४ हजार ७७८ रुपैयाँ तिर्नु पर्ने हो। यसरी हेर्दा कम्पनीले राज्यलाई अन्तःशुल्क बापत २६ लाख २१ हजार ८३ रुपैयाँ छलेको प्रष्ट छ। अन्तःशुल्कसँगै भ्याट र सडक मर्मत दस्तुरसमेत कम तिरेको छ।
सरकारले २०७७/७८ का लागि ल्याएको आर्थिक ऐनमा विद्युतीय कारको भन्सार तथा अन्तःशुल्क वृद्धि गरेपछि टेस्लाको अवैध आयात गरेको श्रीमा सर्वोच्च अदालत पुगेको थियो। सर्वोच्चले गाडी सुरक्षित राख्न दिएको आदेशको दुरुपयोग गर्दै श्रीमाले 'रोड वर्दिनेस टेस्ट' नै नगरी दुईवटा कार दर्ता गरेको थियो। कानुनविपरीत कार दर्ता भएको समाचार नेपाल लाइभले प्रकाशित गरेपछि ती कारको दर्ता खारेज भएको थियो।
तर श्रीमाले दर्ता खारेजीको निर्णय बदर गराउन माग गर्दै पुनः सर्वोच्च पुगेको थियो। यो मुद्दामा समेत सर्वोच्चले श्रीमाकै पक्षमा फैसला गरेको थियो। यसरी अवैध आयातलाई सर्वोच्चले वैधता दिँदा राकेश अडुकिया समूह कर छलीमै लागेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
