काठमाडौं– संसदीय सुनुवाइ समितिले संवैधानिक आयोगमा रिक्त पदमा नियुक्ति गर्न सरकारलाई निर्देशन दिएको छ। आज बसेको समितिको बैठकले उक्त निर्देशन दिएको हो।
सरकारबाट हुने नियुक्तिहरु समावेशी हुन नसकेको विषयमा छलफल गर्न बिहीबारको बैठकमा प्रधानमन्त्री केपी शर्मा ओलीलाई बोलाइएको थियो। तर उनको प्रतिनिधित्व गर्दै परराष्ट्रमन्त्री प्रदीप ज्ञवाली उपस्थित थिए। बैठकमा आफ्नो धारणा राख्ने क्रममा मन्त्री ज्ञवालीले संवैधानिक परिषद्को बैठकमा कोरम नपुगेकाले नियुक्ति गर्न नपाएको बताएका थिए।
समितिको बैठकपछि निर्देशन दिने क्रममा समितिका सभापति लक्ष्मणलाल कर्णले कोरम पुर्याउने जिम्मा आफूहरुको नभएको र जसको जिम्मा हो उसैले पुर्याउनुपर्ने बताएका थिए।
उनले संविधानमा भएका निकायहरु जबसम्म पूर्ण बनाइँदैन, तबसम्म संविधान पूर्ण नहुने र संविधानको कार्यान्वयन नहुने बताए।
त्यस्तै, समितिले समानुपातिक समावेशी ऐन बनाउन पनि निर्देशन दिएको छ। 'आज हामीले समानुपातिक समावेशीमा कसैको पक्षपात नहोस्, एउटा कानुन नै बनोस् भनेर निर्देशन गरेका छौं', कर्णले भने, 'समानुपातिक समावेशी सम्बन्धी जुन संविधानको प्रस्तावना र संविधानको मौलिक अधिकारको धारा ४२ मा उल्लेख भएको छ। त्यसलाई समेटीकन यो एउटा ऐन बनाउने बेला नै हामीले एउटा निर्देशन जारी गर्यौं।'
बैठकले प्रधानमन्त्रीलाई बोलाए पनि परराष्ट्रमन्त्री उपस्थित भएको भन्दै प्रधानमन्त्रीलाई फेरि उपस्थित हुन आग्रह गरेको छ।
मन्त्री ज्ञवालीले सरकार समानुपातिक समावेशीप्रति प्रतिबद्ध भएको बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।