काठमाडौं- सत्तारुढ नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ले पेश गरेको प्रस्तावबाट सिर्जित पछिल्लो विवादको निकास अझै निस्किएको छैन। केही दिनयता विवाद र द्वन्द्वको केन्द्रमा पनि सोही प्रस्ताव रहेको छ।
गत कात्तिक २८ गतेको सचिवालय बैठकमा प्रचण्डले अर्का अध्यक्ष एवं प्रधानमन्त्री केपी ओलीको कार्यशैलीको आलोचना गर्दै १९ पृष्ठको प्रस्ताव पेश गरेका थिए। त्यसपछि पार्टीका दुई धारबीच विवाद उत्कर्षमा पुगेको छ। सचिवालयको अर्को बैठक मंसिर १३ गतेका लागि तोकिएको छ। सो बैठकमा केपी शर्मा ओलीले पनि प्रचण्डको प्रस्तावको प्रतिवाद गर्दै अर्को प्रतिवेदन ल्याउने छन्। नेकपाका नेता कार्यकर्ता ओलीले ल्याउने सो प्रस्तावको प्रतीक्षामा छन्।
प्रचण्डको प्रस्तावले नै पार्टीमा विभाजन रेखा कोरिएको कतिपय नेकपा नेताहरुको बुझाइ छ। कम्युनिस्ट पार्टीमा फरक–फरक प्रतिवेदन आउन थालेपछि विभाजन हुने गरेको इतिहासलाई सन्दर्भ बनाउँदै उनीहरु नेकपा पनि विभाजन हुने हो कि भन्ने आशंका व्यक्त गर्छन्।
ओली निकट नेताहरु भने प्रचण्डले पेश गरेको प्रस्ताव फिर्ता लिए दुवै अध्यक्षको संयुक्त प्रतिवेदन आउने अभिव्यक्ति दिइरहेका छन्। यदि प्रचण्डले आफ्नो प्रतिवेदन फिर्ता नलिए सबै आरोपको एक/एक गरी जवाफ दिइने ओली निकट केन्द्रीय सदस्य गोकुल बाँस्कोटाले बताए। पार्टी विधि, विधान र पद्धतिमा चल्ने भन्नेहरुले नै उल्लंघन गरेको उनले आरोप लगाए।
ओली निकट नेता प्रचण्डको नियमित सम्पर्कमा
पार्टी विवाद उत्कर्षमा पुगेपछि अध्यक्ष ओली र प्रचण्डबीच संवाद रोकिएको छ। दुई अध्यक्षबीच संवाद रोकिए पनि ओली निकट नेताहरुले प्रचण्डलाई नियमित जसो भेटिरहेका छन्। ओली निकट विष्णु पौडेल र सुवासचन्द्र नेम्वाङले गत शुक्रबार मात्रै प्रचण्डलाई पार्टी केन्द्रीय कार्यालय धुम्बाराहीमा भेटेका थिए। प्रचण्ड निवास खुमलटार उनीहरुले भेट्न खोजे पनि प्रचण्डले अनेक राजनीतिक अर्थ लगाउने गरेको भन्दै धुम्बाराहीमै भेटेका थिए।
गत मंगलबार विहान ओली निकट प्रदीपकुमार ज्ञवालीले खुमलटारमै गई प्रचण्डलाई भेटेका थिए। पार्टी विभाजनबाट रोक्न प्रचण्डलाई उनले आग्रह गरेको बुझिएको छ।
उता प्रचण्ड निकट नेताहरुले पनि पार्टी विवादमा भूमिका खेल्न आग्रह गरेका छन्। गत आइतबार स्थायी कमिटी सदस्य टोपबहादुर रायमाझी र हरिबोल गजुरेल प्रचण्ड निवास खुमलटार गई भेटेका थिए। उनीहरुले आफूहरु प्रचण्डसँगै भएको विश्वास समेत दिलाएका थिए। भेटमा आफूहरुले पार्टी विभाजनबाट रोक्न प्रचण्डलाई आग्रह गरेको नेता रायमाझीले बताएका थिए।
सबै कमिटीमा छलफल गर्न छापियो प्रचण्डको प्रस्ताव
पार्टीका सबै कमिटीमा छलफल गर्ने गरी अध्यक्ष प्रचण्डको प्रस्ताव छापिएको छ। गत २८ गतेको सचिवालय बैठकमा प्रचण्डको प्रस्ताव सार्वजनिक भएपछि प्रिन्ट कपीमा छापेर सबै पार्टी कमिटीसम्म पुर्याएर छलफल गरिने भएको छ।
प्रचण्डको एकल प्रस्ताव पार्टीका तल्ला कमिटीमा पुर्याउने भएपछि पार्टी विभाजनको रेखा कोरिएको ओली निकट केन्द्रीय सदस्य कर्ण थापाले बताए। ‘पार्टीमा विवाद हुन्छ। असहमति हुन्छ। डकुमेन्ट आउँछन्। त्यो स्वभाविकै हो’, थापाले भने, ‘तर, पार्टीभित्रको कुरा प्रिन्ट कपीमा सबै कमिटीमा बाँड्ने विधान विपरीत छ। विधि पद्धति विपरित छ।’
एकल प्रस्ताव ल्याए प्रचण्ड र माधव नेपाल पक्षले पार्टी विभाजनको बिउ रोपेको थापाको आरोप छ।
तर, प्रचण्ड निकट एक स्थायी कमिटी सदस्यले पनि एक पक्षीय प्रस्ताव वितरण गर्नु ठीक नभएको तर्क गरे। ‘प्रचण्ड कमरेडले पेश गर्नु भएको प्रतिवेदन पार्टी कमिटीमा पेश गर्ने विषय ठिकै हो। कम्तीमा पार्टीका तल्ला कमिटीमा पनि छलफल हुन्छ’, ती स्थायी कमिटी सदस्यले भने, ‘तर, प्रतिवेदन बाँड्ने ढंग पुगेन। यदि प्रतिवेदन सबै कमिटीमा पठाउने भए ओली कमरेडको पनि आउन दिएरसँगै दुवै अध्यक्षको छापेर वितरण गरेको भए हुन्थ्यो। दुवै अध्यक्षको प्रतिवेदन सबै कमिटीका नेता कार्यकर्ताले अध्ययन गरेपछि कुन ठिक कुन बेठिक आफैं ठम्याउने उनको भनाइ छ।’
उनले भने‚ ‘अहिलेका नेता/कार्यकर्तालाई सजिलै झुक्याएर छलछाम गर्न सकिने स्थित छैन। पार्टीभित्र भएका विवाद स्पष्ट रूपमा भन्नुपर्छ। मूल्यांकन गर्ने जिम्मा उनीहरूलाई दिनुपर्छ। पार्टी विवादको हल त्यहीँबाटै निस्कन्छ।’
प्रतिवेदनकै विषयलाई लिएर पार्टी विभाजन हुने स्थिति भने नरहेको ती नेताले बताए।
प्रचण्डले फिर्ता लिए ओली संयुक्त प्रतिवेदन ल्याउन तयार
अध्यक्ष प्रचण्डले गत कात्तिक २८ गते पेश गरेको प्रस्ताव फिर्ता लिए अर्का अध्यक्ष ओलीले संयुक्त प्रतिवेदन ल्याउन तयार रहेको बताइएको छ। प्रचण्डले ओलीको कार्यशैलीको प्रशस्त आरोप लगाउँदै १९ पन्ने प्रस्ताव ल्याएपछि गत ३ गतेको सचिवालय बैठकमा जवाफ दिन ओलीले १० दिनको समय मागेका थिए। ओलीले जवाफ दिन मागेको १० दिनको समय सकिन तीन दिन मात्रै बाँकी छ। तर, प्रचण्डले सचिवालय बैठकमा पेश गरेको प्रस्ताव फिर्ता लिए ओली संयुक्त दस्तावेज ल्याउन तयार रहेको बाँस्कोटाले बताए।
‘प्रचण्ड कमरेडले कपोकल्पित आरोप लगाउनुभएको छ। त्यसको कुनै तथ्य प्रमाण छैन। मिथ्या हो’, बाँस्कोटाले भने, ‘त्यो प्रस्ताव प्रचण्ड कमरेडले फिर्ता लिनुभयो भने संयुक्त प्रतिवेदन पनि आउन सक्छ। नभए आरोपको सबै जवाफ दिने गरी केपी कमरेडको एकल प्रतिवेदन आउन सक्छ।’
यदि प्रचण्डले आफ्नो प्रस्ताव फिर्ता नलिए ओलीले सबै आरोपको एक/एक जवाफ दिने गरी सचिवालय बैठकमा पेश गर्ने गरी प्रतिवेदन आउने बास्कोटाले बताए। पार्टी सचिवालय बैठकमा ओली कमरेडको प्रतिवेदनमाथि छलफल भएपछि त्यसैले पार्टीको विवाद निर्धारण गर्ने नेताहरुले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
