काठमाडौं- महोत्तरीको बर्दिबास नगरपालिका–१४ की ६ वर्षीया बालिकाको हत्यामा संलग्न भएको आरोप लागेका युवक पक्राउ परेसँगै घटनाका नयाँनयाँ पाटा खुल्न थालेका छन्।
बर्दिबास सुगम बस्तीकी सादिम आलमकी ६ वर्षीया छोरी गुलाप्सा खातुनको हत्यामा संलग्न भएको आरोप लागेका महोत्तरीको गौशाला नगरपालिका-५ जिरो माइलका २६ वर्षीय युवक अरुणकुमार साह अहिले प्रहरी नियन्त्रणमा छन्। प्रहरीले उनीसँग हत्याका विभिन्न पाटाहरूबारे अनुसन्धान गरिरहेको छ। यसक्रममा केही नयाँ तथ्यहरु खुल्दै गएको महोत्तरीका एसपी टिकाबहादुर केसीले नेपाल लाइभसँग बताए।
आफ्नै घरमा खेलिरहेका बेलामा आइतबार साँझ बालिका हराएको भन्दै इलाका प्रहरी कार्यालय बर्दिबासमा सूचना आएको थियो। उक्त सूचना आएपछि खोजतलासमा जुटेको प्रहरीले बालिकाको अवस्था पत्ता लगाउन सकेको थिएन। बालिकाको खोजीमा निस्किएको प्रहरीले सोमबार राती भने बालिकाको घर नजिक सामुदायिक परिवार कल्याण संघ महोत्तरीको कार्यालय नजिकको एक झाडीमा बालिकाको शव फेला परेको थियो। बोराभित्र प्याक गरेको अवस्थामा भेटिएको उक्त शवमा खासै घाउचोट देखिएको थिएन। बालिकाको घाँटी थिचेर हत्या भएको हुनसक्ने प्रहरीको प्रारम्भिक अनुसन्धान थियो।
बालिकाको शव भेटिएको समयसँग लामो अन्तर नगरी २६ वर्षीय अरुणकुरमार साहलाई उनकै बाबुले इलाका प्रहरी कार्यालय गौशाला, महोत्तरीमा बालिकाको हत्या गरेको भन्दै ल्याए। यसपछि प्रहरीले उनलाई नियन्त्रणमा लिएर अनुसन्धान सुरु गरेको छ। त्यसपछि भने हत्या कसरी भयो भन्ने पाटो खुल्न थालेको इलाका प्रहरी कार्यालय बर्दिबासका डिएसपी राजन चापागाईंले बताए।
पक्राउ परेका युवक साहको बयानअनुसार आइतबार घरमै खेलिरहेकी भनिएकी ती बालिका चक्लेट किन्न भन्दै साहले सञ्चालन गरेको पसलमा पुगेकी थिइन्। ती बालिका चक्लेट किन्न आएका बेला पसले साह भने रक्सीको नसामा लट्ठ थिए। साहले प्रहरीसँगको बयानमा भनेका छन्, ‘चक्लेट किन्न आएकी ती बालिकालाई पसलको पछाडिको कोठामा लगेँ। र तौलियाले घाँटी थिचेको थिएँ। सोही क्रममा उनको मृत्यु भयो।’
बालिकाको मृत्यु भएपछि साहले एक दिनभर र एक रात बालिकाको शव आफू सुत्ने कोठामै राखेको पाइएको छ। शव व्यवस्थापन गर्ने उचित मौकाको पर्खाईमा रहेका साहले आइतबार रातभर र सोमबार दिनभर बालिकाको शव आफू सुत्ने कोठामा राखेको प्रहरी बयानमा बताएका छन्। प्रहरीले आइतबार राती र सोमबार दिनभर खोज्दा पनि बालिकाको अवस्था पत्ता लगाउन सकेको थिए। सोमबार साँझ भने प्लास्टिकको बोरामा बालिकाको शव प्याक गरेर आफ्नो घरभन्दा अन्दाजी ४० मिटर जति टाढा झाडीमा फालेका थिए। बालिका खोजतलासमा रहेको प्रहरीले उक्त झाडीबाटै बालिकाको शव फेला पारेको थियो।
हत्यारालाई बाबुले नै बुझाएका थिए प्रहरीमा
बालिकाको हत्या गरेर झाडीमा शव फ्याँकेपछि युवक साह गौशाला नगरपालिका-५ स्थित आफ्नो घर गएका थिए। आफूले गरेको अपराध युवक साहले लामो समयसम्म लुकाउन सकेनन्। साहले पश्चाताप मान्दै बालिका हत्याको कहानी परिवारलाई सुनाएका थिए।
‘सुरुमा उनले बताएका कुरामा परिवारका सदस्यले विश्वास गरेका थिएनन्। उनी पश्चाताप मान्दै मलिन रुपमा घटनाको बेलिविस्तार लगाएपछि उनको परिवारका सदस्यले विश्वास गरेको देखियो,’ घटनाको अनुसन्धान गरिरहेका इलाका प्रहरी कार्यालय बर्दिबासका डिएसपी राजन चापागाईंले नेपाल लाइभसँग भने।
त्यसपछि युवक साहका बाबुले नै उनलाई सोमबार राती इलाका प्रहरी कार्यालय गौशाला पुर्याएका थिए। ‘मेरो छोराले एक बालिकाको हत्या गरेको बताउँछ। के भएको हो अनुसन्धान गरीपाऊँ’ भन्दै आफ्नै छोरोलाई लिएर प्रहरी कार्यालय आएपछि युवक साहलाई नियन्त्रणमा लिएर प्रहरीले अनुसन्धान सुरु गरेको थियो।
प्रहरीसँगको बयानमा आफूले बालिकाको हत्या गरेको युवकले स्वीकार गरेको प्रदेश २ प्रहरी कार्यालय जनकपुरका प्रवक्ता एसपी कृष्ण प्रसाईंले नेपाल लाइभलाई जानकारी दिए। ‘पक्राउ परेका युवकले घटना स्वीकार गरिसकेका छन्। घटना किन भयो भन्ने पाटो बारे अनुसन्धान भइरहेको छ,’ एसपी प्रसाईंले भने।
आरोपित युवकको घरमा आगजनी, राजमार्गसमेत अवरुद्ध
६ वर्षीया बालिकाको हत्या भएपछि स्थानीय र आफन्त आक्रोशित भएका छन्। आक्रोशित स्थानीयले हत्याका अभियुक्त साहको पसल भएको घरमा आगजनीसमेत गरेका छन्। आगजनीबाट ठूलो क्षति भने हुन नपाएको एसपी प्रसाईंले बताए। ‘आक्रोशित भिडले साहको पसलमा आगजनी गरेको थियो। सुरक्षाकर्मीले बेलैमा आगो नियन्त्रणमा लिएका क्षति हुन पाएन,’ एसपी प्रसाईंले भने।
हत्याको विरोधमा प्रर्दशनमा उत्रिएकाहरूलाई नियन्त्रणमा लिने क्रममा प्रहरीले अश्रुग्यासका साथै गोलीसमेत चलाएको छ। प्रहरीको गोली लागेर २ प्रदर्शनकारी घाइते भएका छन्। उनीहरूको बर्दिबासस्थित शुभ स्वस्तिक अस्पतालमा उपचार भइरहेको छ। गोली चलाउनु अघिसम्म प्रहरीले स्थिति नियन्त्रणमा लिन २२ सेल अश्रुग्यास चलाएको थियो।
स्थानीयको प्रर्दशनबाट पूर्व-पश्चिम राजमार्गसमेत अवरुद्ध भएको छ। बर्दिबास नगरपालिका–१४ स्थित चोकमा सडकमा अवरोध गरेका छन्।
घटनास्थलमा जिल्ला प्रहरी कार्यालय महोत्तरी, इलाका प्रहरी कार्यालय बर्दिबास तथा सशस्त्र प्रहरी बलबाट समेत टोली खटिएको छ। स्थानीयले भने साहले ती बालिकाको बलात्कार गरेपछि हत्या गरेको आरोप लगाएका छन्। यद्यपि बलात्कार हो/होइन भन्ने अहिलेसम्म पुष्टि नभएको प्रहरीले जनाएको छ। पक्राउ परेका युवकलाई हदैसम्मको कारबाही हुनुपर्ने स्थानीयको माग छ।
हत्या आरोपमै मुद्दा खेपी धरौटीमा रिहा भएका थिए अभियुक्त अरुण
६ वर्षीया बालिका गुलाप्साको हत्या आरोपमा पक्राउ परेका अरुणकुमार साह यसअघि पनि हत्याकाण्डमै पक्राउ परेर धरौटीमा रिहा भएका व्यक्ति भएको प्रहरीले बताएको छ।
बैसाख २८ गते महोत्तरीको गौशाला–४ बिर्ताका ४६ वर्षीय दिलीप ठाकुरको हत्यामा संलग्न भएको आरोपमा गौशाला-५ का साहलाई प्रहरीले पक्राउ गरेको थियो। साह र ठाकुर दुवैजनाले सँगै बसी रक्सी पिएका थिए। रक्सीको नसा लागेपछि उनीहरुबीच भनाभन भएको थियो। सोही क्रममा साहले बाँसको लट्ठीले ठाकुरको टाउकोमा हान्दा ठाकुरको ज्यान गएको थियो। घटनापछि फरार साहलाई त्यसबेला पनि इलाका प्रहरी कार्यालय गौशालाका प्रहरी निरीक्षक प्रकाश रेग्मीसहितको टोलीले पक्राउ गरेको थियो।
कर्तव्य ज्यानको कसुरको मुद्दा चलाइएका साहलाई जिल्ला अदालत महोत्तरीले १ लाख धरौटीमा रिहा गर्ने आदेश दिएको थियो। तत्काल धरौटी तिर्न नसकेपछि केही समय जेल चलान भएका साह पछि १ लाख धरौटी तिरेर रिहा भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
