फाइल तस्बिर
काठमाडौं– नेपाल कम्युनिस्ट पार्टी (नेकपा)को सचिवालयको औपचारिक बैठक आगामी २७ गते राख्न कार्यकारी अध्यक्ष पुष्पकमल दाहाल प्रचण्डले अनुरोध गरेका छन्। बालुवाटार पुगेर अध्यक्ष तथा प्रधानमन्त्री केपी शर्मा ओलीसँग उक्त मितिमा बैठक राख्न प्रस्ताव गरेको प्रवक्ता नारायणकाजी श्रेष्ठले बताएका छन्।
तर, प्रधानमन्त्री तथा अध्यक्ष ओलीले सचिवालय बैठक बोलाउने विषयमा सहमति नगरेको प्रवक्ता श्रेष्ठको भनाइ छ। उनले भने, ‘हाम्रो तर्फबाट कार्यकारी अध्यक्ष प्रचण्डले अनुरोध गर्नुभएको छ। तर, अध्यक्ष ओलीले सहमति जनाउनुभएको छैन।’
धुम्बाराहीमा मंगलबार बसेको बहुमत सचिवालय सदस्यको अनौपचारिक बैठकमा उक्त दिनसम्म कुर्ने निर्णय भएको छ। उनले भने, ‘पर्सिसम्म कुर्ने हामीले सल्लाह गरेका छौं। पर्सि बैठक बस्छ भनेर सोचेका छौं।’
प्रचण्डले आफू र ओलीबीच भएको छलफलको ब्रिफिङ बैठकमा गरेका थिए। श्रेष्ठले भने, ‘कार्यकारी अध्यक्षले ओलीसँग भेट गरेर गम्भीरतापूर्वक छलफल गर्नुभयो। छिटोभन्दा छिटो बैठक बस्नुको विकल्प छैन भन्नुभएको छ।’
प्रधानमन्त्री ओली बुधबार किमाथाङ्का जाने भएकाले २७ गते बिहीबार सचिवालय बैठक बोलाउन प्रचण्डले प्रस्ताव गरेका हुन्।
सचिवालयका ५ सदस्यहरू पुष्पकमल दाहाल प्रचण्ड, झलनाथ खनाल, माधव नेपाल, बामदेव गौतम तथा नारायणकाजी श्रेष्ठबीच करि डेड घण्टा चलेको थियो। बैठकमा अध्यक्ष केपी ओली, ईश्वर पोखरेल, रामबहादुर थापा बादल तथा विष्णु पौडेल भने उपस्थित थिएनन्।
गत शनिबार पनि ५ सदस्यको अनौपचारिक बैठक बसेको थियो। उपस्थित सदस्यहरुले आइतबार ओलीलाई भेटेर सचिवालय बैठकको लागि आग्रह गर्ने निर्णय गरेका थिए। सोही अनुसार आइतबार ओलीलाई दुई पृष्ठको पत्र बुझाइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
