वासिंटन- अमेरिकी राष्ट्रपति चुनावको मत परिणाम आइरहेको छ। सबै राज्यको मत परिणाम आधिकारिक रूपमा घोषणा भइनसके पनि डेमोक्रेटिक पार्टीका जो बाइडेन अमेरिकाको ४६औं राष्ट्रपति बन्ने निश्चित भइसकेको छ। डोनाल्ड ट्रम्प दोस्रो कार्यकालका लागि चुनिन सफल भएनन्। यो उनको चुनावी हार मात्रै होइन, उनका लागि आगामी दिन मुस्किल बन्न सक्ने संकेत पनि हो।
विज्ञहरूका अनुसार उनको कार्यकालमा भएका कथित घोटालाहरूको छानबिनबाट उनी राष्ट्रपति पदबाट हट्ने बित्तिकै संघीय कानुन उल्लंघनका आरोपमा कारबाहीको सामना गर्नुपर्ने हुन सक्छ। साथै कठिन कठिनाइ पनि समाना गर्नुपर्ने हुन सक्छ।राष्ट्रपति पदमा भएसम्म उनीविरुद्ध कुनै कदम उठाइने संभावना भने कम छ।
पेस युनिभर्सिटीमा संवैधानिक कानुनका प्राध्यापक ब्यानेट गर्सम्यानले डोनाल्ड ट्रम्पमाथि आपराधिक मुद्दा चलाउने सकिने सम्भावना रहेको बताएका छन्। न्यूयोर्कमा एक दशक कानुनी सेवाको अभ्यास गरेका उनी थप्छन्, 'राष्ट्रपति ट्रम्पमाथि झुठा विवरण, कर छली, सम्पत्ति शुद्धीकरण र चुनावी धाँधलीजस्ता आरोपमा मुद्दा लाग्न सक्छन्। उनको कामलाई लिएर जति पनि जानकारी मिडियामा आइरहेका छन् ती वित्तीय मुद्दासँग सम्बन्धित छन्।'
अमेरिकी मिडिया रिपोर्टहरूका अनुसार उनीलाई ठूलो वित्तीय संकट आइपर्न पनि सक्छ। निजी ऋण र कारोबारमा समस्या सिर्जना हुन सक्छ। न्युयोर्क टाइम्सका अनुसार आगामी चार वर्षमा उनले ३० करोड डलर ऋण चुक्ता गर्नुपर्नेछ। उनको व्यक्तिगत अवस्था नराम्रो भएका बेला यो ऋण तिर्नु सजिलो पक्कै हुने छैन। ट्रम्प राष्ट्रपति नभएका कारण ऋण दिनेहरुले तिर्नका लागि कडाइ गर्न सक्छन्। ट्रम्पका आलोचक भन्छन्– राष्ट्रपति पद उनका लागि कानुनी र वित्तीय समस्या समाधानको कवच हो। यो नरहेपछि उनी समस्यामा पर्न सक्छन्।
आफू दुस्मनहरूको षड्यन्त्रको शिकार भएको ट्रम्पले दाबी गर्दै आएका छन्। आफूले राष्ट्रपति हुनुअघि र हुँदा अपराध गरेको झुठा आरोप लगाइएका छन्। ट्रम्पले सबै आरोप अस्वीकार गरिदिएका छन्। ट्रम्प प्रशासनविरुद्ध लागेको भ्रष्टाचारको आरोपमा न्याय मन्त्रालयले सफाइ दिएको छ। यस वर्षको सुरूमा उनीमाथि लगाइएको महाअभियोगको आरोपबाट पनि उनी सफलतापूर्वक मुक्त भएका छन्।
तर यी सबै जाँच र प्रक्रिया राष्ट्रपतिलाई प्राप्त भएका सुरक्षा र सुविधाको आवरणमा भएका थिए। राष्ट्रपति विरुद्ध पदमा रहुन्जेल मुद्दा चलाउन नसकिने न्याय मन्त्रालयले पटकपटक बताउँदै आएको छ। विशेषज्ञका अनुसार यी जाँचलाई ट्रम्पविरुद्ध कानुनी कारबाहीको आधार बनाउन सकिन्छ।
'उनीविरुद्ध मतदातालाई धोका दिएको आरोप लगाउन सकिने हामीलाई पहिलेदेखि नै थाहा छ। किनभने म्यानहटनका लागि अमेरिकी अटोर्नीले ट्रम्पलाई माइकल कोहेनसँग षड्यन्त्रमा सहयोग गरेको बताएका छन्,' पेसका प्राध्यापक ब्यानेट गर्सम्यान भन्छन्।
विशेषज्ञहरु ट्रम्पका पूर्व वकिल माइकल कोहेनविरुद्ध भएको जाँचको याद दिलाइरहेका छन्। सन् २०१८ मा माइकल कोहेनलाई चुनावमा धाँधलीका लागि दोषी पाइएको थियो। आफूसँग ट्रम्पको अफेयर रहेको दाबी गर्ने पोर्न एक्ट्रेस स्टर्मा ड्यानियल्सले सन् २०१६ को निर्वाचनमा पैसा बाँडिएको आरोप लगाएकी थिइन्।
उनीमाथि कथित मुलर रिपोर्टको नतिजा थाहा पाएर पनि न्यायमा बाधा पुर्याएको आरोप पनि लगाउन सकिन्छ। सन् २०१९ मा स्पेसल काउन्सिल रोबर्ट मुलरले २०१६ को राष्ट्रपति चुनावमा रुसको दबाबका विषयमा जाँच रिपोर्ट दिएका थिए। उक्त रिपोर्टमा ट्रम्पलाई क्लिनचिट दिएको थियो र र रुस र ट्रम्पको चुनाव प्रचार टिमबीच कुनै साँठगाँठको प्रशस्त सबुत प्राप्त भएनन्।
रिपोर्टमा ट्रम्पले जाँचका क्रममा बाधा पुर्याउने प्रयास गरेको चाहिँ उल्लेख छ। ट्रम्पले मुलरलाई उनको पदबाट हटाउने कोसिस पनि गरेका थिए।
मुलरले त्यही बेला न्यायमा बाधा पुर्याउने ट्रम्पलाई महाअभियोग चलाउने कि नचलाउने भन्ने विषयमा फैसला अमेरिकी संसदले गर्नुपर्ने बताएका थिए। जबकि उक्त विषयमा संसदले महाअभियोग लगाए। तर एक महिनापछि अर्कै विषयमा उनीविरुद्ध महाअभियोग लगाइएको थियो।
राजनीतिक प्रतिद्वन्द्वी जो बाइडनमाथि छानबिन गर्न ट्रम्पले युक्रेनका राष्ट्रपति भ्लादमिर जेलन्स्कीलाई दबाब दिएको आरोप लागेको थियो। तर यसलाई ट्रम्पले यसलाई अस्वीकार गरेका थिए। सन् २०१९ डिसेम्बरमा डेमोक्रेटहरूको बहुमत भएको संसद्को तल्लो सदन हाउस अफ रिप्रेजेन्टेटिभमा उनीमाथि महाभियोग लगाइयो। सन् २०२० फेब्रुअरीमा रिपब्लिकनको बहुमत भएको सिनेटले उनलाई सफाइ दियो। डोनाल्ड ट्रम्प महाअभियोग सामना गर्ने तेस्रो अमेरिकी राष्ट्रपति बने।
अमेरिकी कानुन अनुसार राष्ट्रपतिकै हैसियतमा ट्रम्पले संघीय कानुन उल्लंघनका मुद्दामा आफूले आफैलाई माफी दिन सक्छन्। तर अमेरिकी इतिहासमा यस्तो अवस्था कहिल्यै आएको छैन। तर राष्ट्रपतिबाट हटेपछि आपराधिक मुद्दा चल्ने सम्भावना भएकाले तत्कालीन राष्ट्रपतिले अघिल्लो कार्यकालका राष्ट्रपतिलाई माफी दिएको चाहिँ देखिएको छ। सन् १९७४ मा राष्ट्रपति रिचर्ड निक्सनले वाटरगेट काण्डपछि राजीनामा दिएका थिए। उनकै कार्यकालका उपराष्ट्रपति जेरल्ड फर्ड राष्ट्रपति बने। उनलाई पूरा माफी दिएका थिए।
कन्जरभेटिभ पोलिटिकल रिसर्च सेन्टर अमेरिकन इन्टरप्राइजेज इन्सिच्युटका विशेषज्ञ नोर्मन अर्नस्टिन भन्छन्, 'डोनाल्ड ट्रम्पमाथि संघीय कानुन उल्लंघन गरेको आरोप लाग्ने सम्भावना कम छ। किनकि उनी आफूलाई माफी दिन सक्छन्। तर चुनाव हारेको अवस्थामा उनी आफूलई माफी नदिन पनि सक्छन्।'
जानकारहरू अर्को एउटा कल्पना पनि गर्छन्। ट्रम्पले २० जनवरी २०२१ मा आफ्नो कार्यकाल सकिनुअघि राजीनामा दिन सक्छन्। अहिलेका उपराष्ट्रपति माइक पेन्सलाई राष्ट्रपति बनाइदिन सक्छन्। यदि त्यस्तो भयो भने पेन्सले ट्रम्पलाई संघीय कानुन उल्लंघन गरेको अपराधका लागि माफी दिन सक्छन्।
अमेरिकी मिडियाका अनुसार ट्रम्पले संघीय मात्रै होइन, स्थानीय आपराधिक आरोप पनि झेल्न सक्छन्। उनीमाथि राष्ट्रपति बन्नुभन्दा पहिले रियल स्टेटको कारोबारमा अनियमितता गरेको आरोप छ। स्थानीय स्तरका मुद्दामा संघीय मुद्दाको जस्तै माफी पाइँदैन।
-बिबिसी हिन्दीबाट
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।