काठमाडौं- कांग्रेस शीर्ष नेताको सोमबारको बैठकमा पार्टी संस्थापन पक्ष पूर्व निर्णयबाट पछि नहट्ने संकेत देखाएको छ। वरिष्ठ नेता रामचन्द्र पौडेल पक्षले असोज १२ मा बुझाएको विरोधपत्रमा छलफल केन्द्रित भएपनि संस्थापन पक्ष भने पूर्वनिर्णयबाट 'टसमस' नहुने संकेत देखिएको पौडेल पक्षको भनाइ छ।
सोमबारको बैठकमा संस्थापन पक्षको अभिव्यक्ति हेर्दा विवाद समाधानतिर पार्टी सभापति शेरबहादर देउवा पक्ष नदेखिएको पौडेल पक्षको भनाइ छ।संस्थापनले गरेका निर्णय फिर्ता गर्न मागसहित असोज १२ मा पौडेल पक्षका २७ केन्द्रीय सदस्यले विरोध पत्र दर्ता गराएका थिए।
पौडेल पक्षको १६ बुँदे विरोधपत्रमा बैठक केन्द्रित रहेको संस्थापन पक्षका नेता एनपी साउदले जानकारी दिए। पौडेल पक्षले उठाएका विषयमा उपसभापति विमलेन्द्र निधि र महामन्त्री पूर्ण बहादुर खड्काले जवाफ दिएका थिए।
निधि र खड्काको जवाफबाट संस्थापन पक्ष समाधानभन्दा विवाद तन्काउन केन्द्रित रहेको पौडेल पक्षको आरोप छ। ‘हामीले १६ बुँदे अवधारणाकै वरिपरि रहेर छिनोफानो गरौं भनि आफ्ना कुरा राख्यौं,’ पौडेल पक्षीय नेता अर्जुननरसिंह केसीले भने, ‘संस्थापन आज प्रस्तुत हुदाँ १६ बुँदेमा उठाइएका कुराभन्दा पनि हामीले जे गरेका छौं,उपयुक्त थियो। विधान अनुसार नै निर्णय गरिएको रुपमा प्रस्तुत भयो।’
विभाग गठन/विस्तार, क्रियाशील सदस्यता वितरण, अन्य दलबाट आएकालाई क्रियाशील सदस्यता वितरणको मापदण्ड, भ्रातृ संस्थाको पदावधिलगायतमा पौडेल पक्षले असन्तुष्टि जनाउँदै आएको छ।
पौडेल पक्षले उठाएका सबै विषयमा निधि र खड्काले प्रष्ट पार्ने प्रयास गरे पनि पौडेल पक्ष थप सशंकित भएको छ। पूर्व निर्णय विधानकै परिधिमा रहेर गरिएको दाबी संस्थापनका निधि र खड्काको थियो। निधिले बैठकमा राखेको अभिव्यक्ति उद्धृत गर्दै नेता साउदले भने, ‘पार्टीको निर्णय र विधानअनुसार नै निर्णय हुँदै आएको हो। विधानलाई मिचेर निर्णय भएको छैन।’
पौडेल पक्षबाट केन्द्रीय सदस्य महेश आचार्यले आफ्नो पक्षको अवधारणाका सन्दर्भमा बढी समय लिएर विषयवस्तु राखेका थिए। नेता कृष्णप्रसाद सिटौलाले पौडेल पक्षले उठाएका उचित मागलाई सम्बोधन हुनुपर्ने धारणा राखेका थिए।
पौडेल पक्षले उठाएका विषयमा सोमबार नै टुंगोमा पुग्न समय अभावका कारण बैठक मंगलबार दिउँसो १ बजे बस्ने गरी स्थगित गरिएको छ। बैठकमा पूर्व पदाधिकारी र वर्तमान पदाधिकारी सहित केही केन्द्रीय सदस्यमा पनि उपस्थित थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
