काठमाडौं- दसैँका लागि काठमाडौं ल्याइएका निरोगी खसी-बोका, भेडा-च्याङ्ग्राको सिङमा हरियो रङ लगाउन सुरु गरिएको छ। काठमाडौं महानगरको पशु सेवा महाशाखाले शनिबारबाट टुकुचा र कलंकीबाट थालेको मासुजन्य खाद्य उत्पादनको निरीक्षण अनुगमनका क्रममा चौपायाको स्वास्थ्य जाँच गरेर निरोगीको सिङमा हरियो र रोगीको सिङमा रातो रङ लगाउन थालेको हो।
‘चाडपर्वमा बिक्री वितरण हुने स्वस्थ्य, स्वच्छ माछामासुजन्य खाद्य उत्पादनको उपभोग र बजारीकरण तथा मासुको स्रोतका रुपमा प्रयोग हुने चौपायाको व्यापार र बजारीकरणमा सहज होस् भनेर हामीले निरीक्षण, अनुगमनको काम थालेको महाशाखाका प्रमुख डा अवधेश झाले बताए। ‘उपभोक्तालाई स्वस्थ्य चौपाया चिन्न सजिलो होस् भनेर हामीले संकेतका रुपमा रङ्गको प्रयोग गरेका हौं‚’ झाले भने‚ ‘खसी, बोका, भेडा, च्याङ्ग्राको सिङ्मा हरियो रङ्ग छ भने त्यो निरोगी हो। किनेर लान वा त्यसको मासु खान हुन्छ। यदि रातो रङ्ग छ भने त्यो रोगी हो। त्यसलाई किनेर लान वा त्यसको मासु खान हुँदैन।’
डा झाका अनुसार बजारमा आएका चौपायाको स्वास्थ्य परीक्षण गर्दा ज्वरो आए/नआएको, नाकबाट सिँगान बगे/नबगेको, झोक्राएको/नझोक्राएको, पातलो दिसा भए/नभएको, चोटपटक भए/नभएकोजस्ता सामान्य स्वास्थ्य अवस्थाका विषयमा पशु चिकित्सकले परीक्षण गरेपछि सिङमा रङ लगाउने गरिन्छ।
‘बजारमा पुगेपछि हामी यतिमात्र हेर्दैनौँ‚’ महाशाखा प्रमुख झाले भने‚ ‘पशु ढुवानी मापदण्ड पालना गरे/नगरेको, खरिद बिक्री बिलको प्रयोग भए/नभएको, बिक्रीका लागि ल्याइएका चौपायाको बासस्थान उचित भए/नभएको पनि हेर्छौं।’
महानगरपालिकाको नियमित अनुगमनको क्रममा व्यापारीलाई दिइएका सुझावको पालना गरेको नपाइएमा कारवाहीको प्रक्रियामा पनि जानुपर्ने र यसका लागि संघ र प्रदेश सरकारको पनि समन्वय लिइएको छ।
महानगरपालिकाले शनीबार टुकुचा र कलंकी खसी बजारमा भएका चौपायाको स्वास्थ्य जाँच र सिङमा रातो लगाउने काम गरेको छ।
महाशाखाका पशु विकास अधिकृत डम्मरबहादुर बमका अनुसार आज स्वास्थ्य अवस्था खराब देखिएका २ वटा खसी भेटिएका छन्।
‘तिनीहरुलाई अलग राखेर उपचार गर्न व्यापारीलाई भनेका छौं। उपचार गरेर निको नहुञ्जेल तिनीहरु बिक्रीका लागि अयोग्य हुन्‚’ उनले भने‚ ‘त्यसैले तिनीहरुको बिक्री रोक्का गरिएको छ। उपचार गरेर निको भएपछि तिनीहरुलाई पनि बेचबिखन गर्न सकिन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770478002.png)
-1764146706.png)
