काठमाडौं–नेकपा अध्यक्ष एवं प्रधानमन्त्री केपी ओलीले कर्णाली विद्रोहमा सामेल भएका सबैलाई पत्र काटेर बोलाएका छन्। अर्का अध्यक्ष पुष्पकमल दाहाल‘प्रचण्ड’ सँगकाे बैठकपछि प्रधानमन्त्री ओलीले सबै पदाधिकारीलाई काठमाडौं आउन असोज २९ गते पत्र काटेका थिए।
कर्णाली प्रदेशको विवाद काठमाडौंबाट गएका केन्द्रीय सदस्य निरज आचार्यले सल्टाईसकेका थिए। वरिष्ठ नेता माधवकुमार नेपालको दूतको रुपमा गएका आचार्यले अविस्वास प्रस्ताव फेल गराएका हुन्। तर, मंगलबार बसेको दुई अध्यक्षको बैठकपछि प्रधानमन्त्री ओलीले कर्णाली विद्रोहमा सहभागीलाई काठमाडौं आउन पत्र काटेका हुन्। केन्द्रीय सदस्य आचार्यले नेपाल पक्षका नेताहरुलाई अविस्वास प्रस्तावबाट पछि हट्न कन्भिन्स गरेपछि अविस्वास प्रस्ताव अलपत्र परेको हो।
‘कर्णाली विद्रोह’ प्रकरणमा प्रधानमन्त्री ओलीले बोलाएकामा मुख्यमन्त्री महेन्द्रबहादुर शाही, कर्णाली प्रदेश इन्चार्ज जनार्दन शर्मा, सह–इन्चार्ज एवं प्रदेश सभा सांसद यामलाल कँडेल, सह–इन्चार्ज एवं आर्थिक मामिला मन्त्री प्रकाश ज्वाला, केन्द्रीय सदस्य एवं सह–इन्चार्ज कालीबहादुर मल्ल छन्। प्रदेशका अध्यक्ष गोरखबहादुर बोगटी, सचिव मायाप्रसाद शर्मा, सासद चन्द्रबहादुर शाही, निलम्बित सचेतक गुलाबजंग शाहीलगायत कर्णाली विद्रोहमा सामेल भएका नेताहरुलाई पत्र काटिएको एक प्रदेश सभा सांसदले बताए।
प्रधानमन्त्रीले पत्र काटेका सबैजसो काठमाडौं आइपुगेका छन्। तर, केन्द्रीय सदस्य कालीबहादुर मल्ल कर्णाली विद्रोहमा सहभागी नभएकाले पत्र काटे पनि आएका छैनन् । कर्णाली विद्रोह भएका ओली पक्षका नेताहरुले अविस्वास प्रस्ताव फिर्ता नलिएको बताईरहेका छन्। त्यो विद्रोहलाई ओली पक्षले कसरी सल्टाउने भन्ने विषयमा निष्कर्षमा नपुगेकाले छलफल नभएको एक प्रदेश सभा सदस्यले बताए।
‘‘कर्णाली विद्रोह कसरी सल्टाउने भनेर अर्का अध्यक्ष प्रचण्डले सोध्दा प्रधानमन्त्री चुपचापजस्तै हुनुहुन्थ्यो । खै मलाई थाहा छैन कसरी सल्टाउने सोचौला भन्नु भएको थियो,’ ती नेताले भने, ‘जब सुर्खेत पुगेका केन्द्रीय सदस्य आचार्यले अविस्वास प्रस्ताव असफल बनाए, प्रधानमन्त्री ज्यूले पत्र काटेर काठमाडौ बोलाउनु भयो ।’
अहिले प्रधानमन्त्री ओलीले आफू पक्षका नेताहरु बोलाएर कर्णाली विद्रोह कसरी सल्टाउने भन्ने विषयमा परामर्श गरिरहेको अर्का एक नेताले बताए । कर्णाली विद्रोह सल्टाउने उपाय ओलीले पाउनेत्रित्तिकै छलफल सुरु हुने ती नेताले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
