काठमाडौं– संवैधानिक इजलाशमा हेर्दाहेर्दै रहेको नेकपा नेता वामदेव गौतमको मुद्दा गत साता सुनुवाइ हुन नसक्दा आज बुधबारका लागि हेर्दाहेर्दै राखिएको छ। बर्दियाबाट प्रतिनिधि सभा निर्वाचनमा पराजित भए पनि राष्ट्रिय सभा सदस्य भएका गौतमविरुद्ध दायर भएको रिटमा निवेदक, सरकारी वकिल र उनका केही कानुन व्यवसायीले बहस गरेपछि हेर्दाहेर्दै रहेको थियो ।
असोज २१ गते बुधबारका लागि हेर्दाहेर्दै रहेको मुद्दाकाे सुनुवाइ सर्वोच्चका एक न्यायाधीशमा कोरोना संक्रमण पुष्टि भएपछि रोकिएको थियो। उक्त दिन सुनुवाइ हुन नसकेपछि असोज २८ गतेका लागि पेशी तोकिएको थियो।
हरेक बुधबार र शुक्रबार बस्दै आएको संवैधानिक इजलाश कोरोनाका कारण प्रभावित भएको थियो। आज उक्त मुद्दाको सुनुवाइ हुन नसके कात्तिक १९ गतेपछि मात्र सुनुवाइ हुने छ। तर सुनुवाइ हुने–नहुने भन्नेबारे भने १० बजे पेशीसूची आएपछि मात्र थाहा हुने निवेदक दिनेश त्रिपाठीले बताए।
असोज १ गतेदेखि घटस्थापना सुरु भएपछि दसैंअवधिमा अदालत बिदा हुने छ। बुधबार कुनै पनि अवस्थामा मुद्दाको सुनुवाइ हुनुपर्ने नत्र हेर्दाहेर्दै दसैंपछि जाने निवेदक त्रिपाठीले बताए। गौतमको हकमा अन्य कुरा केही नभए पनि मन्त्रिपरिषद विस्तार भएमा भने सर्वोच्चको आदेशले समस्या पर्ने छ। सरकारले पटक–पटक मन्त्रिपरिषद् पुनर्गठन गर्ने भने पनि सकेको छैन। मन्त्रिपरिषद पुनर्गठन दसैपछि मात्र हुने देखिएकाले गौतमले यो विवाद दसैंअघि नै टुङ्गाउन चाहेका छन्।
बुधबार सुनुवाइ भएमा आफ्ना पक्षका कानुन व्यवसायीको बहस छोट्याउँदै सुनुवाइ सक्नुपर्ने पक्षमा गाैतम रहेको उनका वकिलहरुले बताएका छन्। गौतम पक्षका केही कानुन व्यवसायी र निवेदकको जवाफी बहसमात्र बाँकी रहेको छ । यो सकिएलगत्तै सर्वाेच्चले आफ्नो निर्णय सुनाउने छ।
गौतमको मुद्दा सर्वोच्चमा विचाराधीन रहेकाले उनलाई र सचिवालयका अर्का सदस्य नारायणकाजी श्रेष्ठलाई पनि मन्त्री बनाउन नसक्ने नैतिक संकट प्रधानमन्त्रीसँग रहेको छ। नेकपाभित्र मन्त्री बन्नेको तटस्थ सूची बन्न नसकेको समयमा गौतमको मुद्दाको सुनुवाइ सर्दै आएको छ। संवैधानिक इजलाशका पाँच सदस्यमध्ये कुनै एक सदस्य आउन नसकेमा पनि आउने सुनुवाइ प्रभावित हुने छ।
गत शुक्रबारदेखि मुद्दा हेर्दाहेर्दै रहेको छ।
गौतमको मुद्दाका लागि गठन गरिएको संवैधानिक इजलाशमा प्रधानन्यायाधीसहित पाँच न्यायाधीश छन्। संवैधानिक इजलाशमा बस्ने सबै न्यायाधीशहरु कन्ट्याक्ट ट्रेसिङमा परेपछि क्वारेन्टाइनमा रहेका थिए। कोरोना संक्रमणभएका बाहेक अन्य न्यायाधीशको परीक्षण रिपाेर्ट नेगेटिभ आइसकेको छ
संवैधानिक इजलाशमा प्रधानन्यायाधीश चोलेन्द्रशमशेर राणा, न्यायाधीशहरु दीपककुमार कार्की, हरिकृष्ण कार्की, विश्वभरप्रसाद श्रेष्ठ र ईश्वर खतिवडा रहेका छन्। न्यायाधीश श्रेष्ठ गत बिहीबारदेखि सर्वोच्च आउन थालेका थिए भने प्रधानन्यायाधीश राणाले गत बुधबार न्यायपरिषद बैठकमा भाग लिएका थिए। अन्य न्यायाधीशहरु पनि क्रमश: अदालत आउन थालेका छन्।
मंगलबार दुई वटा इजलाशमात्र तोकिएको थियो । अन्य न्यायाधीशहरुको परीक्षण रिपोर्ट नेगेटिभ आएको तर पनि सर्वोच्चमा सबै इजलाश नताेकिएकाले सुनुवाइमा अन्योल देखिन्छ। संवैधानिक इजलाशमा रहेका पाँचै जना न्यायाधीशमा कोरोना पुष्टि नभएकाले इजलाश लाग्ने सम्भावना पनि रहेको छ ।
गौतमका कानुन व्यवसायी र निवेदकको जवाफ बाँकी
गौतमको सांसद पदसम्वन्धी विवादमा पहिलो दिन रिट निवेदन पक्षका कानुन व्यवसायी र महान्यायाधीवक्ताले बहस गरेका थिए। दोस्रो सुनुवाइमा सरकारी वकिलले आफ्नो बहस सक्दै गौतम पक्षका कानुन व्यवसायीले बहस गरेका थिए। गौतमका तर्फवाट वरिष्ठ अधिवक्ता युवराज संग्रौलाले बहस सुरु गरेका थिए।
अब हुने सुनुवाइमा गौतमका बाँकी कानुन व्यवसायीले बहस गर्ने छन्। गौतमका तर्फबाट ३० भन्दा धेरै कानुन व्यवसायीले बहसका लागि वकालतानामा भरेका छन्। अदालतले सबैका लागि यसअघि दुई घण्टे टाइमकार्ड लगाएको थियो। तर अब हुने सुनुवाइमा भने सबै कानुन व्यवसायीले बहस नगर्ने सम्भावना देखिन्छ। दसैंअघि नै यसको सुनुवाइ सक्ने पक्षमा गौतमपक्ष भएकाले उनीहरुले बहस छाेट्याउनु पर्ने छ। यदि उनीहरुले बहस लामो गरेमा यो मुद्दा फेरि हेर्दाहेर्दै दसैंपछि धकेलिने सम्भावना देखिन्छ।
हेर्दाहेर्दाको मुद्दाको सुनुवाइको मिति नआउँदै फुलकोर्टको बैठकमा बसेका एक न्यायाधीशलाई कोरोना देखिएपछि गत साताकाे आइतबारदेखि सर्वोच्चको सुनुवाइ प्रभावित भएको थियो। संक्रमण नफैलियोस् भनेर सर्वोच्चमा पालो-पालो गरी न्यायाधीशहरुको इजलाश गठन हुँदै आएको छ।
यसअघि न्यायाधीश आनन्दमोहन भट्टराईको इजलाशले दुवै पक्षको छलफल नभएसम्म अन्य संवैधानिक जिम्मेवारी नदिने भनेपछि संवैधानिक इजलाशमा पठाएको थियो। असोज ७ गतेको एकल इजलाशले यो विवादलाई संवैधानिक इजलाशमा पठाएको थियो। असोज १२ गते संवैधानिक इजलाशमा पुगेको मुद्दाको पहिलो सुनुवाइ १४ गतेबाट सुरु भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
