काठमाडौं- नेपालमा भेटिएका कुल कोरोना संक्रमितको आधाभन्दा बढी काठमाडौं उपत्यकामा मात्र भेटिन थालेका छन्। स्वास्थ्य तथा जनसंख्या मन्त्रालयले सार्वजनिक गरेको तथ्यांक अनुसार काठमाडौं उपत्यकामा कोरोना संक्रमितको संख्या बढ्दै गएको देखिएको हो।
मन्त्रालयले दिनहुँ थपिएका नयाँ संक्रमितको संख्या जिल्लागत रूपमा सार्वजनिक गरे पनि दैनिक भएको परीक्षण संख्या भने सार्वजनिक गर्ने गरेको छैन।
पछिल्लो १५ दिनदेखि उपत्यकामा संक्रमितको तुलनात्मक रूपमा बढी रहेको छ। शुक्रबार मात्रै नयाँ थपिएका १ हजार ३ सय १३ जना संक्रमितमध्ये उपत्यकामा ६ सय ४५ रहेका छन्। यो संख्या नयाँ थपिएको संख्याको आधारमा ४९.१२ प्रतिशत हो।
भदौ २० गतेसम्म देशभर देखिएका कुल संक्रमितको संख्यामध्ये ३९ दशमलव १९ प्रतिशत संक्रमित उपत्यकामा थिए। भदौ २० गते देशभर कुल १ हजार ४१ जनामा कोरोना देखिएको थियो भने उपत्यकामा ४ सय ८ जनामा कारोना देखिएको थियो।
तर, पछिल्ला दिनहरुमा देशभर देखिएका संक्रमितमध्ये उपत्यकाको मात्रै ५० प्रतिशत भन्दा बढी पुगेको छ। यही अवस्थामा रहेमा अबको एक सातामा देशभर देखिएको संक्रमितको संख्याको ७० प्रतिशतसम्म उपत्यकाकै हुने मन्त्रालयको आँकलन छ।
असोज ३ गते भने देशभर देखिएका संक्रमित मध्ये ५९.०५ प्रतिशत संक्रमित काठमाडौंका थिए। असोज ३ गते देशभर १ हजार २ सय ४ जनामा कोरोना संक्रमण देखिएको थियो भने उपत्यमा मात्रै ७ सय ११ जना नयाँ संक्रमित थपिएका थिए।
उपत्यकाको संक्रमित संख्या र प्रतिशत चार्टमा
असोज ९ गते शुक्रबार नयाँ थपिएका १ हजार ३ सय १३ जना संक्रमित मध्ये उपत्यका ६ सय ४५ रहेको छ। यो संख्या नयाँ थपिएको संख्याको आधारमा ४९.१२ प्रतिशत हो।
पछिल्लो २४ घण्टामा १ हजार ३ सय १३ जनामा कोरोना संक्रमितको पुष्टीसँगै नेपालमा कुल संक्रमितको संख्या ७० हजार ६ सय १४ पुगेको छ। अहिलेसम्म कोरोना संक्रमितबाट ज्यान गुमाउनेको संख्या ४ सय ५९ पुगेको छ।
स्वास्थ्य तथा जनसंख्या मन्त्रालयका अनुसार हालसम्म ९ लाख ६८ हजार १ सय ८५ जनको पिसिआर परीक्षण भइसकेको छ। कुल परीक्षण भएको संख्याको आधारमा संक्रमितको हिस्सा ७.२९ प्रतिशत हो।
मन्त्रालयका अनुसार अहिले नेपालमा १८ हजार २ सय ८९ जना सक्रिय संक्रमित रहेका छन् भने निको हुनेको संख्या ५१ हजार ८ सय ६६ रहेका छ। कुल संक्रमितको ७३.४५ प्रतिशत निको भएका छन् भने ०.६५ प्रतिशतको मृत्यु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
