काठमाडौं- नेकपा स्थायी कमिटी बैठकको अन्तिम दिन वरिष्ठ नेता माधवकुमार नेपाल पक्षीय नेताहरूले ‘एक व्यक्ति एक पद’ कार्यन्वयन हुनुपर्ने माग छन्। बैठकमा बोल्ने अधिकांश नेपाल पक्षका स्थायी कमिटी सदस्यहरूले पार्टी विधानको धारा ४६ को ‘क’मा उल्लेख भएको सो व्यवस्था कार्यान्वयन गर्न माग गरेका हुन्।
बैठकमा बोल्ने नेताहरुले नेताहरुले दुई अध्यक्षको कार्यविभाजन भएपनि विधानमा भएको एक व्यक्ति एक पदको व्यवस्था कार्यन्वयन हुनुपर्ने मत राखेको बैठकमा सहभागी स्थायी कमिटी सदस्य बेदुराम भुसालले नेपाल लाइभलाई जानकारी दिए।
बैठकमा वरिष्ठ नेता झलनाथ खनालसहित माधव नेपाल, भीम रावल, अष्टलक्ष्मी शाक्य, अमृतकुमार बोहरा, युवराज ज्ञवाली, घनश्याम भुसाल, रघुजी पन्त, भीम आचार्यलगायत नेताहरुले 'एक व्यक्ति, एक पद'को कार्यन्वयन गरेर जानु पर्ने दृढतापूर्वक आफ्नो मत राखेका थिए। प्रचण्ड पक्षका नेताबाट प्रवक्ता नारायणकाजी श्रेष्ठ, देव गुरुङ, लिलामणि पोखरेल र मातृका यादवले पार्टीलाई विधि पद्धतिमा चलाउनुपर्ने मत राखेका थिए। ओली पक्षका नेताहरु कोही बोलेका थिएनन्।
बैठकमा बोल्दै नेपालले आफूले कुनै पद प्राप्त गर्न संघर्ष नगरेको बताउँदै पार्टीलाई विधि र पद्धतिमा चलाउनु पर्ने बताएका थिए। 'पार्टीलाई विधिमा पद्धतिमा चलाउनु पर्यो। दुई अध्यक्षको कार्यविभाजन भयो। अध्यक्ष मिल्दा पार्टी राम्रो हुन्छ भने केही छैन,’ नेपालको भनाई उद्धृत गर्दै भुसालले भने, ‘तर, विधानमै भएको 'एक व्यक्ति, एक पद'को व्यवस्था तत्काल कायन्वयन हुनुपर्यो।’
आफूले विधान र पद्धतिभन्दा बाहिर गएर आलोचना नगरेको नेपालले बताएका थिए। ‘भ्रष्टाचारका विषयमा एकपछि अर्को गर्दै काण्डैकाण्ड आइरहेका छन्। कतै छानबिन भएको भएको छैन,’ नेपालले बोलेको कुरालाई जोड्दै भुसालले भने, ‘भ्रष्टाचारीलाई कडाभन्दा कडा कारबाही गरेर जनतालाई सुशासनको अनुभुति दिलाउनु पर्यो। राजनीतिक नियुक्तिमा बिचौलिया र विवादस्पत व्यक्ति नियूक्त भएका छन्। त्यसमा कस्तो खालको मापदण्ड बनाएर नियुक्ति गर्ने त्यसमा सल्लाह हुनुपर्यो।’
पार्टीलाई विवादरहित ढंगले चलाए आफ्नो विरोध नहुने नेपालको धारणा थियो। बैठकमा बोल्दै वरिष्ठ नेता झलनाथ खनालले दुई अध्यक्ष एक भएर मात्रै नहुने भन्दै पार्टीलाई विधि पद्धति चलाउनु पर्ने धारणा राखेका थिए। विधानमै भएको 'एक व्यक्ति, एक पद'को व्यवस्था कार्यन्वयन गरेर जानुपर्ने खनालले मत राखेको भुसालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_9DjWlLHwUU-1748326423.jpg)
-1749370216.png)
